- રાજ્યમાં ખરીફ વાવેતરમાં થયો વધારો
- રાજ્યમાં ખરીફ વાવેતર 87 ટકા થયું
- ગત વર્ષ કરતા 4 લાખ હેક્ટર વધુ ખરીફ વાવેતર થયું
હાલ ચોમાસાની સીઝન ચાલી રહી છે અને મેઘરાજા ધડબડાટી બોલાવી રહ્યા છે. ચાલુ સિઝનમાં મેઘરાજાના મંડાણા જ સારા થયા બાદ અવિરત વરસાદ વર્ષી રહ્યો છે જેના પરિણામે ખેડૂતોએ પણ ગેલમાં આવીને કપાસ, મગફળી સહિતના પાકનું વાવેતર કર્યું છે. રાજ્યમાં લગભગ 80 ટકા જેટલો વરસાદ નોંધાઇ ચુક્યો છે. હાલ આવકારદાયક વરસાદને લઈને રાજ્યમાં ખરીફ પાકના વાવેતરમાં વધારો નોંધાયો હોવાનું સબંધિત વિભાગ દ્વારા સત્તાવાર રિતે જાહેર થવા પામ્યું છે. હાલ રાજ્યમાં 87 ટકા ખરીફ પાકનું વાવેતર થયુ છે.
મગફળીનું વાવેતર ઘટ્યું
ચોમાસાની સિઝન દરમિયાન ગત વર્ષ કરતા 4 લાખ હેક્ટર જમીનમાં વાવેતરનો વધારો થયો છે. બીજી બાજુ મગફળીના વાવેતરમાં ઘટાડો થયો હોવાનું પણ આંકડા પરથી ફલિત થાય છે. ગતવર્ષે 16.72 લાખ હેક્ટરમાં મગફળીનું વાવેતર નોંધાયું હતું. જ્યારે તે ઘટીને ચાલુ વર્ષે 16.21 લાખ હેક્ટર જ નોંધાયું છે. બીજી બાજુ કપાસના વાવેતરમાં વધારો નોંધાયો છે. જેના આંકડા પર નજર કરીએ તો ગત વર્ષે કપાસનું 25.04 લાખ હેક્ટરમાં વાવેતર થયુ છે. જેમાં વધારો નોંધાયા બાદ ચાલુ વર્ષે 26.64 લાખ હોક્ટર વિસ્તારમાં કપાસનું વાવેતર નોંધાયું છે.
કઠોળ પ્રત્યે ખેડૂતોની નિરસતા
તે જ રીતે ડાંગરનું 7.09 લાખ હેક્ટર વિસ્તારમાં 84 ટકા વાવેતર થયું છે. જ્યારે બાજરીનું 1.81 લાખ હોક્ટર વિસ્તારમાં 102 ટકા વાવેતર, મકાઈનું 2.79 લાખ હેક્ટર વિસ્તારમાં 96 ટકા વાવેતર થયું છે. વધુમાં ચાલુ વર્ષે ખેડૂતોએ કઠોળના પાક પ્રત્યે નીરસતા દાખવતા ગત વર્ષે ૩.૩૩ લાખ હેક્ટર વિસ્તાર કઠોળનું વાવેતર થયું જે ચાલુ વર્ષે 3.18 લાખ હેક્ટર વિસ્તારમાં થયું છે.
