આદેશ / 3 વર્ષ સુધી આરોપીને જેલમુક્ત ન કરાતા સાબરમતી જેલના સત્તાધીશો વિરૂદ્ધ હાઇકોર્ટ નારાજ, કહ્યું '14 દિવસમાં વળતર ચૂકવો'

• અમદાવાદની સાબરમતી જેલ સત્તાધીશોની બેદરકારી 
• 3 વર્ષ સુધી જેલમુક્ત ન કરાતા HC નારાજ
• 3 વર્ષ અગાઉ આરોપીને જામીન પર છોડવા કર્યો હતો હુકમ 

Gujarat High Court : અમદાવાદની સાબરમતી જેલ સત્તાધીશોની ગંભીર બેદરકારી સામે આવી છે. વાત જાણે એમ છે કે, આજથી લગભગ ત્રણ વર્ષ પહેલા ગુજરાત હાઇકોર્ટે એક કેસમાં આરોપીની જામીન આપ્યા હતા. જોકે અમદાવાદની સાબરમતી જેલના સત્તાધીશોએ હાઇકોર્ટના આદેશ બાદ પણ આરોપી યુવકને 3 વર્ષ સુધી જેલમુક્ત ન કરાતા ગુજરાત હાઇકોર્ટે નારાજગી વ્યક્ત કરી છે. આ સાથે આવા કેસની યાદી બનાવી હાઇકોર્ટ સમક્ષ રજૂ કરવા રજીસ્ટ્રીને આદેશ કર્યો છે. 

ગુજરાત હાઇકોર્ટે આજથી ત્રણ વર્ષ પહેલા મહેસાણાના એક આરોપીને જામીન પર છોડવા હુકમ કર્યો હતો. જોકે અમદાવાદની સાબરમતી જેલના સત્તાધીશોએ હાઇકોર્ટના આદેશને પણ અવગણી અને 3 વર્ષ સુધી આરોપીને છોડ્યો ન હતો. આ તરફ હવે આ બાબત ગુજરાત હાઇકોર્ટના ધ્યાને આવતા કોર્ટે ભારે નારાજગી વ્યક્ત કરી છે. નોંધનીય છે કે, આ પહેલા પણ જેલમાંથી મોબાઈલ મળવાને લઈને પણ સાબરમતી જેલ વિવાદમાં આવી ચૂકી છે. 

શું કહ્યું જેલ સત્તાધીશોએ ? 
હાઇકોર્ટે મહેસાણાના એક આરોપીને 3 વર્ષ પહેલા જામીન પર મુક્ત કરવાનો આદેશ કર્યા બાદ પણ સાબરમતી જેલના સત્તાધિશોએ આરોપીને જેલમુક્ત કર્યો ન હતો. જેને લઈ હવે જેલ સત્તાધીશોએ હાઇકોર્ટમાં કહ્યું છે કે, કોરોનાકાળ હોવાથી હાઈકોર્ટના હુકમ પર ધ્યાન ન ગયું. આ તરફ હવે ગુજરાત હાઇકોર્ટે કહ્યું કે, જેલ સત્તાધીશોએ યુવકના 3 વર્ષ બગાડ્યા હોવાથી 14 દિવસમાં વળતર ચૂકવો. આ  સાથે હાઈકોર્ટે બેદરકારીની નોંધ લઇ રૂ. 3 લાખનો દંડ ફટકાર્યો હોવાનું સામે આવ્યું છે. આ સાથે આવા કેસની યાદી બનાવી હાઇકોર્ટ સમક્ષ રજૂ કરવા રજિસ્ટ્રીને આદેશ કર્યો છે.