શ્રદ્ધા / ગુજરાતના આ NRIઓના ગામમાં થાય છે મુસ્લિમ દેવીની પૂજા, હિન્દુ મુસ્લિમ એખલાસનું છે પરફેક્ટ પ્રતિક

• અંતરિક્ષયાત્રી સુનીતા વિલિયમ્સનું છે માદરે વતન
• ઘેરઘેર લોકો વસે છે વિદેશમાં
• ગામમાં નથી એક પણ મુસ્લિમ પરિવાર

ગાંધીનગરથી અંદાજે 20 કિલોમીટરના અંતરે આવેલા આ ગામમાં અંદાજે પાંચ હજારની વસતી છે. આ ગામમાં એક પણ એવો પરિવાર નથી, જેમના ઘરેથી કોઇ વિદેશમાં ના હોય. ગામમાં આઠસો વર્ષ જૂનું ડોલા માતાજીનું મંદિર છે.

ગામને લૂંટારૂઓથી પણ બચાવ્યું

પહેલાના જમાનામાં  ગામમાં લૂંટારૂઓ આવતા હતા અને ગામને લૂંટીને જતા રહેતા હતા, ત્યારે પાડોશના ગામમાંથી પસાર થતા એક મુસ્લિમ મહિલાએ જોયું કે ઝુલાસણ ગામમાં લૂંટ મચી છે.
તેઓ ત્યાં જ રોકાઈ ગયાને લૂંટારુઓ સામે બાથ ભીડી અને લડતા-લડતા મૃત્યુ પામ્યા. આજે જ્યાં મંદિર છે ત્યાં જ તેમનું મોત થયું હતું. તેના ઘણા વર્ષો બાદ તેમના નામ પર મંદિર બન્યું. અમારી તેમાં શ્રદ્ધા છે. તેઓ અમારીરક્ષા કરે છે અને અમારી તકલીફો દૂર કરે છે.

અંતરિક્ષ યાત્રી સુનિતા વિલિયમ્સ પણ છે ભક્ત

ઝુલાસણ ગામના જે લોકો વિદેશોમાં વસ્યા છે તેમાં અંતરિક્ષ યાત્રી સુનિતા વિલિયમ્સના પિતા દિપક પંડ્યા પણ છે. દિપક પંડ્યા 22 વર્ષના હતા ત્યારે અમેરિકા ગયા હતા. સુનીતા વિલિયમ્સ જ્યારે અંતરિક્ષમાં જવાના હતા ત્યારે તેઓ પોતાના પિતાની સાથે ડોલા માતાના આશીર્વાદ લેવા માટે ઝુલાસણ આવ્યા હતા. મંદિરના પૂજારીનું પણ કહેવું છે કે કોઇપણ એનઆરઆઈ કે વિદેશમાં લગ્ન કરીને ઝુલાસણ આવનાર કોઇ પણ હોય એરપોર્ટથી સીધા ડોલા માતાજીના મંદિરે દર્શન કર્યા બાદ જ ઘરે જાય છે. સુનીતા ગામની દિકરી છે. તેઓ અંતરિક્ષથી પાછા આવ્યા બાદ પણ ડોલા માતાના દર્શન કરવા માટે ફરીથી આવ્યા હતા.

ગામમાં એક પણ મુસ્લિમ પરિવાર નથી

ડોલા માતાજી મુસ્લિમ હોવા છતાં ગામમાં એક પણ મુસ્લિમ પરિવાર નથી. જો કે રવિવાર અને ગુરૂવારના રોજ ડોલા માતાજીની માનતાનો દિવસ મનાય છે. આ દિવસે આજુબાજુના ગામમાંથી મોટી સંખ્યામાં મુસ્લિમ પણ આવે છે.

ગુજરાતના કોમીરમખાણોમાં મંદિરને ઉની આંચ નહોતી આવી

2002ના હુલ્લડમાં ઉત્તર ગુજરાતના કેટલાંય ગામમાં દંગા થયા હતા. મંદિરો અને મસ્જીદોને તોડ્યા હતા પરંતુ આશ્ચર્યની વાત એ છે કે ડોલા માતાજીના મંદિરને કોઇએ નુક્સાન પહોંચાડ્યું નહોતું.