ભાવ વઘારો / ગુજરાતની ગૃહિણીઓનું બજેટ ખોરવાશે, સિંગતેલ બાદ જુઓ શેના ભાવમાં થયો તોતિંગ વધારો

• કપાસિયા તેલના વધ્યા છે ભાવ
• સિંગતેલની જેટલા થયા છે કપાસિયાના ભાવ
• બજારમાં કપાસિયા તેલની અછત હોવાની ચર્ચા

એક તરફ મોંઘવારીએ માજા મુકી છે ત્યારે બીજી તરફ ખાધતેલના ભાવમાં ધરખમ વધારો થઈ રહ્યો છે,પેટ્રોલ ડીઝલ, શાકભાજી સહિત તમામ જીવન જરૂરી ચીજવસ્તુઓના ભાવ ખૂબ વધી રહ્યા છે એવામાં ખાદ્યતેલના ભાવમાં વધારો થતા ગૃહિણીઓનું બજેટ ખોરવાયું છે.  

સિંગતેલ કરતા કપાસિયા તેલના ભાવ થયા છે વધુ

તહેવારો નજીક છે ત્યારે તેલના ભાવમાં પણ વધારો જોવા મળી રહ્યો છે. જોકે આ વખતે ઇતિહાસમાં પહેલીવાર કપાસિયા તેલના ભાવે સિંગતેલના ભાવની તોતિંગ વધારો જોવા મળી રહ્યો છે. એક સમયે સિંગતેલના ભાવ ઉંચા હોય કરકસર માટે લોકો કપાસિયા તેલ તરફ વળ્યા હતા પરંતુ, પ્રથમવાર બજારમાં ઉલ્ટુ ચિત્ર સર્જાતા ભારે વિમાસણ સર્જાઈ છે. કપાસિયા તેલમાં ભાવ વધતા ગરીબ અને મધ્યમ વર્ગનું બજેટ ખોરવાઈ ગયું છે તો સાથે જ ફરસાણના ભાવોમાં પણ હવે ભાવ વધારો જોવા મળી રહ્યો છે. 

 

મોટી કંપનીઓના હાથમાં ટ્રેડની લગામ હોવાની ચર્ચા

આગામી દિવસોમાં શ્રાવણ મહિનો આવી રહ્યો છે. જેની સાથે જ રક્ષાબંધન, સાતમ આઠમ અને દિવાળી જેવા તહેવારો પણ ખૂબ જ નજીક છે. આવા સમયે લોકો ઘરમાં ફરસાણ અને મિસ્ટાન બનાવે છે અથવા તો બહારથી ખરીદી કરતા હોય છે. ત્યારે આ સમયે કપાસિયા તેલના ભાવમાં વધારો જોવા મળી રહ્યો છે અને જેને કારણે મોંઘવારીનો વધુ એક માર લોકોને સહન કરવાનો વારો આવી ચૂક્યો છે.


 

સિંગતેલની જેટલા થયા છે કપાસિયાના ભાવ

મિલોનું સિંગતેલ આજે કપાસિયા કરતા રુ.10-15 ઓછા ભાવે વેચાઈ રહ્યું હોવા છતાં ફરસાણના ધંધાર્થીઓ અને હોટલવાળા તેમના ફૂડના ટેસ્ટમાં ફેરફાર ન થાય તે માટે કપાસિયા તેલની જ માંગ કરી રહ્યા છે. તો ઘરેલુ વપરાશ માટે ગૃહિણીઓ હવે સિંગતેલ તરફ વળી રહી છે. સિંગતેલ અને કપાસિયા તેલના ભાવની વાત કરીએ તો રાજકોટમાં આજે 15 કિલો સિંગતેલ નવા ડબ્બાના સોદા રુ.2435થી મહત્તમ રુ. 2485ના ભાવે થયા હતા. ગઈકાલે પણ તેના ભાવ આટલા જ રહ્યા હતા. જ્યારે ગઈકાલે રુ. 2435થી 2465 વચ્ચે વેચાયેલ કપાસિયા તેલમાં આજે રુ.10નો વધારો થતાં આજે કપાસિયા તેલના ડબ્બાના રુ. 2455-2485ના ભાવે સોદા થયા હતા.

 

સંગ્રહખોરી પર કોઈ અંકુશ ન હોવાથી પણ વધ્યા છે ભાવ

મહત્વનું છે કે છેલ્લા કેટલાક સમયથી સિંગતેલ અને કપાસિયા તેલમાં ધરખમ ભાવ વધારો જોવા મળી રહ્યો છે. લોકડાઉન વખતે પણ કપાસિયા તેલના ડબ્બાનો ભાવ રૂપિયા 1500 થયો હતો જ્યારે વર્ષ 2017માં કપાસિયા તેલ 1200 રૂપિયા ભાવ બોલાતો હતો અને સિંગતેલના ડબ્બાનો 1500 રૂપિયા ભાવ બોલાતો હતો. પરતું ખાદ્યતેલોમાં બેફામ સટ્ટાખોરીના પગલે ચાલુ વર્ષે ભાવમાં સતત ઉથલપાથલ થતી રહી છે ત્યારે આજે ઈતિહાસમાં પ્રથમવાર રાજકોટમાં સિંગતેલ કરતાંય કપાસિયા તેલ રૂ।.10 ઉંચા ભાવે સોદા થયા હતા. વેપારી સૂત્રોએ જણાવ્યું કે કેટલીક મિલોનું સિંગતેલ કપાસિયા કરતા પણ ઓછા ભાવે મળે છે.

 

ખાદ્યતેલમાં આવશ્યક ચીજવસ્તુધારો લાગુ થતો નથી

જો વાત કરવામાં આવે તો ખાધતેલમાં આવશ્યક ચીજવસ્તુધારો લાગું પડતો નથી બીજી તરફ મોટી કંપનીઓના હાથમાં ટ્રેડની લગામ હોવાથી ભાવમાં સતત ઉથલપાથલ જોવા મળતી હોય છે વળી કટેલીક વાર ખાધતેલમાં સંગ્રહખોરી અને સટ્ટાખોરીને કારણે ચાલુ વર્ષ ભાવમાં સતત ઉથલપાથલ થઈ રહી છે. ઈતિહાસમાં આજે પ્રથમવાર સિંગતેલ કરતા પણ વધુ કપાસિયા તેલમાં ભાવ વધારો નોંધાયો છે. સિંગતેલ કરતા પણ વધુ ભાવે કપાસિયા તેલ મળતું હોય તેવું મનાઈ રહ્યું છે.