શિક્ષણ વિભાગ / રાજ્યમાં શિક્ષણ બોર્ડની ચૂંટણીને લઈ મોટા સમાચાર, કોરોનાના કારણે અંતે લેવાયો આ નિર્ણય

• કોરોનાના કારણે લીધો નિર્ણય
• શિક્ષણબોર્ડની ચૂંટણી મોકૂફ
• 80 હજારથી વધુ લોકો કરે છે મતદાન

ગુજરાતમાં 25મી એપ્રિલે યોજાનારી ગુજરાત માધ્યમિક અને ઉચ્ચતર માધ્યમિક શિક્ષણબોર્ડની ચૂંટણી મોકૂફ કરી દેવાઈ છે. ગુજરાતના 80 હજારથી વધુ મતદારો આ ચૂંટણીમાં મતદાન કરતા હોય છે. પરંતુ કોરોનાના કારણે આ પ્રક્રિયાને હાલ પૂરતી ટાળી દીધી છે. જિલ્લા અને તાલુકાકક્ષાએ 80 હજારથી વધુ મતદારો ચૂંટણીમાં મતદાન કરે છે. સંચાલક મંડળ અને શૈક્ષણિક સંઘોએ ચૂંટણી મોકૂફ રાખવા વિનંતી કરી હતી. જે બાદ શિક્ષણબોર્ડના સચિવે સત્તાવાર રીતે નિર્ણય લઈને જાહેરાત કરી છે. અને કોરોનાના કારણે 25મી એપ્રિલે યોજાનારી શિક્ષણબોર્ડની ચૂંટણી મોકૂફ રખાઈ છે.

શિક્ષણ વિભાગ દ્વારા કોલેજોમાં શિક્ષણકાર્ય બંધ કરવાનો નિર્ણય

રાજ્યમાં વકરેલા કોરોના સંક્રમણને લઈ રાજ્ય સરકારે સૌથી મોટો નિર્ણય કર્યો છે. આગામી 30 એપ્રિલ સુધી તમામ સરકારી અને ખાનગી કોલેજો બંધ રાખવાનો નિર્ણય હાલ પુરતો કરાયો છે. પરિસ્થિતિ અનુસાર આગામી દિવસોમાં નવા નિર્ણય સામે આવી શકે છે. જો કે, રાજ્યમાં શાળાઓ બંધ કરવાનો નિર્ણય સરકારે પહેલા જ આપી દીધો હતો. કોલેજોમાં શિક્ષણ બંધ કરાયું છે પરંતુ ઓનલાઈન માધ્યમથી શિક્ષણ આપી શકાશે. કોરોનાની બગડતી પરિસ્થિતિને ધ્યાનમાં રાખી પરીક્ષા મુદ્દે યુનિવર્સિટીએ પહેલા જ કેટલીક જાહેરાતો કરી દીધી છે. અને પરીક્ષાઓ મોકૂફ રાખી દીધી છે. 

રાજ્યમાં કોરોનાની સ્થિતિ

ગુજરાતમાં કોરોના વાયરસની લાથડતી પરિસ્થિતિ પર આજે ગુજરાત હાઇકોર્ટમાં સુનાવણી કરવામાં આવી હતી જેમાં રેમડેસિવિર ઈન્જેક્શનથી લઈને રાત્રિ કર્ફ્યૂ મુદ્દે હાઇકોર્ટે ગુજરાત સરકારને આડે હાથ લીધી છે ત્યારે હવે હાઇકોર્ટે રાજ્ય પાસે એક્શન પ્લાનનો રિપોર્ટ માંગ્યો છે.  

15 એપ્રિલના સવારે 11 વાગ્યે વધુ સુનાવણી હાથ ધરાશે

કોરોના મામલે  2 દિવસ બાદ હાઇકોર્ટમાં ફરી સુનાવણી હાથ ધરાશે અને બે દિવસમાં હાઇકોર્ટે કોરોના સામે શું એક્શન પ્લાન રહેશે તેના પર એફિડેવિટ દાખલ કરવાના આદેશ આપ્યા છે. હવે 15 એપ્રિલના સવારે 11 વાગ્યે વધુ સુનાવણી હાથ ધરાશે. 

તમે મીડિયાના રિપોર્ટમાં તથ્ય ન હોવાનું ન કહી શકો: HC

નોંધનીય છે કે આજે સરકાર તરફથી હાઇકોર્ટમાં મીડિયા રિપોર્ટ પર સવાલો ઉઠાવવામાં આવ્યા હતા ત્યારે હાઇકોર્ટે સરકારને ખખડાવતા કહ્યું કે મીડિયામાં પણ કોઇ આધાર પર જ સમાચાર લખતા હશે. તમે મીડિયાના રિપોર્ટમાં તથ્ય ન હોવાનું ન કહી શકો.