અરેરાટી / અમદાવાદ : મરી જાવને તો દુકાનમાં જગ્યા થાય કહીને માલિક ટોર્ચર કરતા કર્મીએ ભર્યું ચોંકાવનારું પગલું

• દીપકલા જંકશનના માલિક સામે ફરિયાદ
• પ્રદીપ શાહ સામે ફરિયાદ નોંધાઇ
• કનુભાઇ નામના કર્મીએ કર્યો હતો આપઘાતનો પ્રયાસ

શો-રૂમના માલિક કર્મચારીને તમારાથી કામ ન થતું હોય તો પછી શા માટે ધરતી પર ભાર બનીને જીવો છો, મરી જાવને તો મારી દુકાનમાં જગ્યા થાય એમ કહી ટોર્ચર કરતા હતા.

દીપકલાના માલિક વિરૂદ્ધ નોંધાઇ ફરિયાદ

ખોખરા વિસ્તારમાં આવેલ હરિદર્શનપાર્ક કર્ણાવતીમાં રહેતા કનુભાઈ પ્રજાપતિએ દીપકલાના માલિક પ્રદીપ શાહ વિરુદ્ધ ફરિયાદ નોંધાવી છે. કનુભાઈ છેલ્લાં સાતેક વર્ષથી શિવરંજની ચાર રસ્તા પર આવેલ દીપકલા જંક્શન નામના સાડીના શો-રૂમમાં નોકરી કરે છે. છેલ્લા બે મહિનાથી શો-રૂમના માલિક પ્રદીપ શાહ કનુભાઈને કોઈ પણ કારણસર  ટાર્ગેટ કરી હેરાન- પરેશાન કરતા હતા. 

પ૦ ટકા પગાર કાપી લેતા હોવાની કર્મચારીએ કરી વાત 

ફરિયાદમાં જણાવ્યા મુજબ કનુભાઈ જો પાંચ મિનિટ નોકરીના સમયમાં મોડા પહોંચતા તો તેમનો ૨૫ ટકા પગાર અને જો નોકરી પર પહોંચવામાં વધુ મોડું થાય તો પ૦ ટકા પગાર કાપી લેતા હતા, જ્યારે શનિવાર અને રવિવાર ફરજિયાત આવવા માટે પ્રદીપભાઈ કહેતા હતા અને જો ના આવે તો સોમવારે નોકરી પર હાજર ગણતા નહિ અને જાવ રજા ભોગવો એમ કહી ગેરહાજર ગણતા હતા.

ગળાની ડાબી બાજુના ભાગે બ્લેડના ઘા માર્યા 

પ્રદીપભાઈએ કનુભાઇને કહ્યું હતું કે તારે નોકરી કરવી હોય તો કર, મારે તારી કોઈ જરૂર નથી, તું બધાંનો નેતા ના બનતો, નહીં તો તારું જીવવું ભારે કરી દઈશ, હું કોણ છું તેનું તને ભાન નથી, મારી ઊંચી ઊંચી લાગવગ છે. આમ, વારંવાર બધાંની વચ્ચે અપમાન થયું હોવાથી કનુભાઈ લાગી આવતાં ૨૫ ફેબ્રુઆરીએ મોડી રાતે સ્યૂસાઇડ નોટ લખી નારોલ-નરોડા હાઇવે સામે એક્સપ્રેસ હાઇવેના ઝીરો પોઈન્ટ બગીચામાં ગયા હતા, જ્યાં કનુભાઇએ  તેમના હાથ-પગ અને ગળાની ડાબી બાજુના ભાગે બ્લેડના ઘા મારી દીધા બાદ આત્મહત્યાનો પ્રયાસ કર્યો હતો. 

પોલીસે હાથ ધરી તપાસ 

કનુભાઈ લોહીલુહાણ હાલતમાં જ બેભાન થઇ જતાં તેમને આસપાસના લોકો દ્વારા તાત્કા‌િલક સારવાર માટે એલ.જી. હોસ્પિટલ ખસેડવામાં આવ્યા હતા, જ્યાં તેમની સારવાર હાલ ચાલી રહી છે. સારવાર દરમિયાન સમગ્ર ઘટનાની જાણ પોલીસને કરાતાં પોલીસે આ મામલે પ્રદીપ શાહ વિરુદ્ધ ફરિયાદ નોંધી વધુ કાર્યવાહી હાથ ધરી છે.