હેરાફેરી / DRIની મોટી કાર્યવાહીઃ જો આ કામ ન થયું હોત તો કેન્યાનું 60 કરોડનું હેરોઇન અમદાવાદ શહેરમાં ઘુસી જાત

• અમદાવાદથી 60 કરોડનુ ડ્રગ ઝડપાયુ
• DRIએ 2 આરોપીને ઝડપ્યા
• મેડિકલ વિઝા પર આવેલ શખ્સોની ધરપકડ

રાજ્યમાં છેલ્લા ઘણા સમયથી તમામ મહાનગરોમાં ડ્રગ્સનું દૂષણ મોટાપાયે વધતું જઈ રહ્યું છે.આથી ગુજરાત પોલીસ અને DRI દ્વારા ડ્રગ્સ અને તેના સપ્લાયરને ઝડપી લેવા માટે ખાસ કવાયત હાથ ધરવામાં આવી છે. ત્યારે અદાણી સંચાલીત અમદાવાદ ઇન્ટરનેશનલ એરપોર્ટમાં DRIએ મોટી કાર્યવાહી હાથ ધરી છે.  60 કરોડના હેરોઇન સાથે 2 આરોપીની ધરપકડ કરી લીધી છે.બેગમાં સ્પેશિયલ ખાનું બનાવીને કેન્યાથી ડ્રગ્સ લઈ બંને આરોપીઓ અમદાવાદ એરપોર્ટ પર પહોંચ્યા હતા.બન્ને ઈસમો મેડિકલ વિઝા પર ગુજરાત આવ્યા હતા.

કઈ રીતે DRIને મળી સફળતા?
પ્રાથમિક માહિતી મુજબ અધિકારીઓને ડ્રગ્સ એરપોર્ટ મારફતે ઘૂસાડવામાં આવશે તેવા ઈનપુટ મળ્યા હતા. જે બાદ કેન્યાથી બે ઈસમોને ઝડપવા અમદાવાદ એરપોર્ટ ટીમો તૈનાત કરી દેવામાં આવી હતી.  મોડી રાત્રે એરપોર્ટ પર કેન્યાની ફ્લાઈટ ઉતરી હતી અને અગાઉ મળેલી બાતમીને આધારે બે મુસાફરોને માદક પદાર્થો સાથે પકડી પાડ્યા હતા. જેમાં એક મહિલા અને એક યુવક આરોપી છે. પ્રથમ વખત ચકાસણી દરમિયાન એનડીપીએસ ડ્રગ હેરોઇન મળી આવ્યું હતું અને વધુ તપાસમાં પ્લાસ્ટિકની થેલીઓમાંથી કુલ 8.5 કિલો હેરોઈન જપ્ત કરવામાં આવ્યું હતું જેથી બજાર કિમત 60 કરોડ રૂપિયા આંકી શકાય. 

બેગમાં સ્પેશિયલ ખાનું બનાવીને લાવી રહ્યા હતા ડ્રગ્સ
આ દૂષણ દેશમાં અને ગુજરાતમાં ઘૂસાડવા ડ્રગ્સ પેડલરો અનેક અવનવા કિમિયા અપનાવતા હોય છે. આરોપીઓએ કેન્યાથી એરપોર્ટ પરથી ડ્રગ્સ અંદર ઘૂસાડવા બેગમાં સ્પેશિયલ ખાનાનો ઉપયોગ કર્યો હતો. ખાલી થેલીઓમાં વણજોઈતું વજન હતું અને તે બેગની અંદર ખોટું પોલાણ હતું. બેગ ફાડી ચકાસણી કરતાં દાણા-પાઉડર સાથેના આઠ પ્લાસ્ટિક પેકિંગ છૂપાયેલા હતા. જેને હાજર સાક્ષીઓની સામે ખૂલવામાં આવ્યા હતા અને તપાસ અર્થે તાત્કાલિક મોકલવામાં આવ્યા હતા જેમાં હેરોઇન ડ્રગ્સ હોવાનું ખૂલ્યું હતું. આરોપીઓને સાથે ડ્રગ્સના જથ્થાને પકડી ડ્રગ્સ એનડીપીએસ એક્ટ, 1985 ની જોગવાઈઓ હેઠળ મેડિકલ સારવારના મુલાકાતના બહાને ભારત અને ગુજરાતની મુલાકાતે આવેલા બંને આરોપી સામે કાયદેસરની કાર્યવાહી હાથ ધરવામાં આવી છે