સાવધાન / બેદરાકારી જોજો મોંઘી ન પડે! બિલ્લી પગે અમદાવાદમાં વકરી રહ્યો છે કોરોના, જાણો એક દિવસમાં કેટલા કેસ નોંધાયા

• ગુજરાતમાં કોરોનાના કેસોમાં વધારો
• અમદાવાદ એરપોર્ટ પર યાત્રીઓ પોઝિટિવ
• એક દિવસમાં 8 યાત્રી પોઝિટિવ

એક તરફ ઓમિક્રોનની દહેશત વધી રહી છે ત્યારે અમદાવાદમાં કોરોનાના કેસમાં એકાએક ઉછાળો આવતા ચિંતા વધી છે. અમદાવાદ એરપોર્ટ પર એક જ દિવસમાં 8 પ્રવાસીઓ કોરોના સંક્રમિત નોંધાતા આવનારા તંત્ર સફાળું જાગ્યું છે અને હરકતમાં આવ્યું છે.

એક વ્યક્તિમાં ઓમિક્રોનના લક્ષણ 

ઉલ્લેખનીય છે કે, લંડનથી આવેલ 6, તાન્ઝાનિયા અને પોલેન્ડના 1-1 મુસાફર સંક્રમિત હોવાનું સામે આવ્યું છે, તો એક વ્યક્તિમાં ઓમિક્રોનના લક્ષણો દેખાતા જીનોમ સિક્વન્સ માટે તાત્કાલિક અસરથી સેમ્પલ મોકલવામાં આવ્યા છે. આ સાથે જ અત્યાર સુધીમાં ગુજરાતમાં વિદેશથી આવનાર 20 મુસાફરો કોરોના પોઝિટિવ નોંધાયા છે. 

મંગળવારે નોંધાયેલા કેસની વિગત
 
છેલ્લા 24 કલાકમાં બીજી લહેર શાંત પડ્યા બાદ સૌથી વધુ કોરાનાના વધુ 87 કેસ નોંધાયા છે જે છેલ્લા 5 મહિનાની સરખામણીએ મોટો વધારો છે. એક સાથે અચાનક 87 કેસ પોઝિટિવ આવતા કોરોનાના એક્ટિવ કેસની સંખ્યા 589 સુધી પહોંચી ગઈ છે. કોરોનાને માત આપીને 73 દર્દીઓ ડિસ્ચાર્જ થઈ હેમખેમ ઘેર પરત ફર્યા છે તો જ્યમાં વધુ 2 દર્દીઓનું કોરોનાને કારણે મૃત્યુ થયુ છે.  8 દર્દી વેન્ટિલેટર પર સારવાર લઇ રહ્યા છે.

રાજકોટ અને વલસાડમાં 1-1 દર્દીનું મોત 

રાજકોટ અને વલસાડમાં એક-એક દર્દીનું મૃત્યુ થયું છે જો જિલ્લા વાઈઝ કોરોના કેસ પર નજર કરીએ તો અમદાવાદમાં સૌથી વધુ 33 નવા કેસ નોંધાયા઼ છે છેલ્લા 173 દિવસ બાદ સૌથી વધુ છે. સુરતમાં 12 કેસ, વડોદરામાં 11 કેસ, રાજકોટમાં 7 કેસ, ખેડામાં 5 કેસ, વલસાડમાં 5 કેસ, નવસારીમાં 4 કેસ, આણંદમાં 3 કેસ, ગાંધીનગરમાં 2 કેસ, કચ્છમાં 2 કેસ,ભરૂચ, જામનગર અને મહેસાણામાં કોરોનાનો એક-એક કેસ સામે આવ્યો છે. ગ્રામ પંચાયતની ચૂંટણી બાદ આ કેસો વધશે તેવી પૂરેપૂરી શક્યતાઓ સેવાઇ રહી છે.

રાજ્યમાં 10,104 દર્દીના અત્યાર સુધીમાં થયાં મોત

જો રાજ્યભરમાં અત્યાર સુધીના કોરોનાના આકડા પર નજર કરીએ તો અત્યાર સુધી 8,18,010 દર્દીઓ ડિસ્ચાર્જ થયા છે, તો 10,104 દર્દીને કોરોનાને કારણે જીવ ગુમાવવાનો વારો આવ્યો છે.

સાજા થવાનો દર 98.71 ટકા 

ગુજરાતમાં કોરોનાથી સાજા થવાનો દર 98.71 ટકા છે જે અન્ય રાજ્યો કરતાં ઘણો સારો છે જેનું એક માત્ર કારણ વેકસીનેશન છે. જો રસીની વાત કરીએ તો આજે 2.16 લાખ નાગરિકોનું રસીકરણ થયું છે.અત્યાર સુધી રાજ્યમાં રસીના 8.75 કરોડથી વધુ ડોઝ આપી દેવાયા છે. ઓમીક્રૉનનો ખતરો માથા પર મંડારાઈ રહ્યો છે ત્યારે બુસ્ટર ડોઝની કેન્દ્ર સરકાર વિચારણા કરી રહી છે.