કૌભાંડ / કાળો કારોબારઃ સસ્તા ભાવે મળતાં અનાજનો બારોબાર વહીવટ, સરકાર મૌન!

સાબરકાંઠા જિલ્લામાં અનાજની ચોરીનો પર્દાફાશ થયો છે. ગરીબોને માટે સસ્તા અનાજની દુકાનમાં પહોંચાડવામાં આવતું અનાજ બારોબાર જ રસ્તામાં જ ચોરાઈ જતું હતું. તેમ છતાં સરકારને તેની કંઈ જ ખબર નથી. એક બાજુ ગરીબોનાં ઉદ્ધારની વાત કરતી સરકાર ગરીબોનું અનાજ ચોરાઈ જવા છતાં અકળ મૌન રાખીને બેસી છે. શું અનાજ ચોરીનું કોઈ મોટું કૌભાંડ આચરવામાં આવી રહ્યું છે? ગરીબો માટેનું અનાજ બારોબાર ચોરાઈ જતું હોવાંથી સરકારનાં પેટનું પાણી હલતું નથી. ત્યારે જોઇએ કેવો છે આ અનાજનો કાળો કારોબાર.

કઈ રીતે અનાજની ચોરી કરવામાં આવી રહી છે. આ અનાજ છેવાડાનાં માનવીની ભૂખ મિટાવવા માટે સરકાર દ્વારા પહોંચાડવામાં આવી રહ્યું છે. પરંતુ કેટલાંક તસ્કરો અનાજનાં કોથળામાં પીવીસીનો પાઈપ નાખી ગરીબોનાં નસીબનું અનાજ પણ ચોરી કરી રહ્યાં છે. જે અનાજનાં જથ્થામાંથી અનાજ ચોરાઈ રહ્યું છે તે સાબરકાંઠા જિલ્લાની સસ્તા અનાજની દુકાનોમાં ગરીબ લોકો માટે પહોંચાડવામાં આવી રહ્યું હતું. સસ્તા અનાજની દુકાનોમાં આ અનાજ પહોંચે તે પહેલાં જ આ અનાજની રીતસરની લૂંટ થઈ રહી છે.

જો કે, કેટલાંક જાગૃત નાગરિકોએ હિંમતનગર-શામળાજી હાઈવે પર ચાલુ ગાડીએ થતી અનાજની ચોરી જોઈ લીધી અને ગાડીઓ અટકાવીને સીધી જ જિલ્લા કલેક્ટરને જાણ કરતાં આ ઘટના પ્રકાશમાં આવી. જીલ્લા કલેકટરે આ ગાડીઓની તપાસ કરાવી તો તેમાંથી મોટા પ્રમાણમાં અનાજ ઓછું થયું હોવાનું પકડાયું. પકડાયેલી બે ગાડીઓને પુરવઠા ગોડાઉનમાં લાવવામાં આવી અને ગાડીનાં કોથળા તોલવામાં આવ્યાં. તો જે કોથળા અહીંથી 50 કિલો 500 ગ્રામનાં વજન સાથે મોકલવામાં આવેલાં. જે ફરી વજન કરતાં 35 કિલો, 42 કિલો, 45 કિલોનાં નીકળ્યાં.

ગાડી ગોડાઉનમાંથી નીકળ્યાં બાદ ગાડીમાં બેસેલા માણસો 50 કિલોનાં એક-એક કોથળામાંથી 5થી 7 કિલો અનાજ કાઢી નાખે છે. આ ઓછાં અનાજ બાબતે પુરવઠા ગોડાઉનનાં મેનેજરને પૂછતાં તેમણે હાથ ઊંચા કરી દીધાં. જો કે, સાબરકાંઠા જીલ્લામાં અનાજનો કાળો કારોબાર એ આજની વાત નથી. આ પહેલાં પણ આવી જ રીતે અનાજની આખે આખી બોરીઓ ગાયબ થયેલી છે.

તો કેટલાંક અધિકારીઓ પણ વર્ષો સુધી એક જ જગ્યા પર ચિટકી રહી અનાજનાં કાળાબોરને સાથ આપી રહ્યાં તેવાં આરોપો પણ થઈ રહ્યાં છે. લોકોનું કહેવું એમ છે કે જ્યાં વાડ જ ચીભડા ગળતું હોય ત્યાં બીજાને દોષ ક્યાં દેવો. સરકાર પણ અનાજનાં કાળા કારોબાર વિશે બધું જ જાણતી હોવા છતાં આખરે કેમ મૌન છે? આવો સવાલ સાબરકાંઠાનાં જનજનનાં મનમાં ઊઠી રહ્યો છે.