પરંપરા / ગુજરાતમાં રાજવી પરિવાર દ્વારા કરાયેલ પ્રથાનું આજે પણ પાલન, ગૌમાતાના પગ નીચે સૂઈને જુઓ લોકોએ શું કર્યું

• દાહોદ જિલ્લામાં નવા વર્ષના દિવસે ગાય ગોહરીની ઉજવણી 
• ગાય ગોહરીમાં લોકો ગાય નીચે સુઈને કરે છે પોતાની માનતા પુરી 
• ગાયના પગ નીચે કચડાવાને માને છે સૌભાગ્ય

દાહોદ જિલ્લામાં અનોખી રીતે દિપોત્સવની ઉજવણીની પરંપરા છે. પશ્ચાયાતાપના ભાગરૂપે લોકો ગામના રસ્તા ઉપર લાંબા થઈ જાય છે અને તેમના ઉપરથી ગાયોના ધણને દોડાવવામાં આવે છે. આ તહેવારનો લાહવો લેવા માટે દૂર-દૂરથી આદિવાસીઓ અહીં આવે છે. દાહોદ જિલ્લાના ગરબાડા, લીમડી, લીમખેડા, ગાંગરડીમાં ગાય ગોહરીની થતી આ ઉજવણીમાં હ્દયદ્રાવક દ્રશ્યો સર્જાતા હોય છે.

દંડવત પ્રણામ કરીને સૂઈ જાય છે લોકો
ગાય ગોહરી તળે અનેક લોકો ગાયને દંડવત પ્રણામ કરીને સૂઇ જાય છે. તેમના પરથી ગાયો પસાર થતી હોય છે. જેમના પરથી ગાયોના ધણને પસાર કરવામાં આવે છે જેને ગાય ગોહરી પડી એવું કહેવામાં આવે છે. આ વખતે શ્રધ્ધાળુઓ પોતપોતાની બાધા-આખડીઓ પૂરી કરીને એક પરંપરા નિભાવે છે.   

ગાયના પગ નીચે કચડાવાને માને છે સૌભાગ્ય
મોટી સંખ્યામાં ગાયને સજાવીને લાવવામાં આવે છે, તેની પૂજા કરવામાં આવતી હોય છે બાદમાં ફટાકડા ફોડીને ગાયને તેના અવાજથી ભડકાવવામાં આવે છે ભડકીને ગાયો દોડે છે અને રસ્તામાં સુઈ રહેલા લોકોને કુચડતી જાય છે. રસ્તામાં અનેક લોકો સૂઇ જતા હોવા છતાં કોઇ જ વ્યક્તિ ઘાયલ થઇ હોવાના કોઇ કિસ્સા બહાર આવતાં નથી.

ખેડૂતો ગૌધનની માંગે છે માફી
મેળામાં ભાગ લેવા આવતા ખેડૂતોનું માનવું  છે કે, વર્ષની અંદર ગાયો કે બળદની સાથે ખેતી દરમ્યાન ગાયોને સોટી કે કઈ પણ માર્યું હોય તો હાથ જોડી દંડવત કરી ગાયનાં ટોળાની નીચે સુઈ જઈ પશ્યતાપ કરતા હોય છે. તેની સાથે આવનાર વર્ષમાં સારી ખેતી પાકે તે માટે ખેડૂતો પોતાની બાધા આખડીઓ પૂર્ણ કરતા હોય છે. 

નવા વર્ષે મોટી સંખ્યામાં ભાગ લેવા 
ગાય ગોહરીને જોવા ગરબાડા સહિત નજીકના ગામના લોકો મોટી સંખ્યામાં ઉમટતાં ગંગારડીના બજારોમાં માનવમહેરાણણ જોવા મળે છે. જિલ્લાના ગંગારડીમાં ગાય ગોહરીનું આયોજન મોટા પાયે કરવામાં આવે છે.  આ જિલ્લાની આ પરંપરા છે અને પ્રતિ વર્ષ આ જ રીતે નવા વર્ષના દિવસે ગાય ગોહરીની ઉજવણી કરવામાં આવે છે.

ગાયોને શણગારવામાં આવે છે
આ ઉત્સવમાં આદિવાસીઓ તેમની ગાયોને શણગારીને લાવે છે. ગાયને નવડાવીને કલર કરે છે, મેંદી લગાડે છે, પગે ઘૂઘરા બાંધે છે અને મોરપીંછથી શણગારે છે. આ શણગાર પાછળ અંદાજે ત્રણ–ચાર હજાર રૂપિયાનો ખર્ચ પણ તેઓ કરે છે.