મહામારી / મોટા સમાચાર : સ્કૂલોને ફરી ખોલવા માટે કેન્દ્ર સરકારે બહાર પાડી નવી ગાઈડલાઈન, આ નિયમોનું કરવું પડશે પાલન

• દેશમાં ફરી સ્કૂલો શરુ કરવા કેન્દ્ર સરકારે બહાર પાડી ગાઈડલાઈન
• 16 રાજ્યોમાં આંશિક રીતે શાળાઓ ખુલી
• કોરોનાની ત્રીજી લહેરમાં બંધ પડી છે સ્કૂલો
• કેટલાક રાજ્યોએ ફરી શરુ કરી છે સ્કૂલો

કેન્દ્ર સરકારે દેશભરમાં ફરીથી ખુલી રહેલી શાળાઓ અને કોલેજો માટે નવી અને સુધારેલી માર્ગદર્શિકા અને કોવિડ પ્રોટોકોલ જારી કર્યા છે. વિસ્તૃત ચર્ચા કર્યા બાદ, શાળાઓ ફરીથી ખોલવા માટે કેન્દ્ર દ્વારા માર્ગદર્શિકા તૈયાર કરવામાં આવી છે, જેનું પાલન રાજ્યો અને કેન્દ્રશાસિત પ્રદેશો દ્વારા ફરજિયાતપણે કરવું પડશે.

16 રાજ્યોમાં આંશિક રીતે શાળાઓ ખોલવામાં આવી

શાળા શિક્ષણ અને સાક્ષરતા વિભાગના સંયુક્ત સચિવ (જેએસ)એ જણાવ્યું હતું કે, "શાળાઓને ફરીથી ખોલવા અને સોશિયલ ડિસ્ટન્સિંગ સાથે શીખવા માટે આરોગ્ય અને સલામતી પ્રોટોકોલ માટેની માર્ગદર્શિકાનું પાલન કરવું જરૂરી છે." 16 રાજ્યોમાં આંશિક રીતે શાળાઓ ખોલવામાં આવી છે જ્યારે 9 રાજ્યોમાં શૈક્ષણિક સંસ્થાઓ બંધ કરી દેવામાં આવી છે.

કેન્દ્રની આ ગાઈડલાઈનનું પાલન કરવું ફરજિયાત
- શાળામાં યોગ્ય સફાઇ અને સ્વચ્છતા સુવિધાઓની ખાતરી અને દેખરેખ રાખવી.
- બેસવાની વ્યવસ્થામાં વિદ્યાર્થીઓ વચ્ચે ઓછામાં ઓછું 6 ફૂટનું અંતર રાખવું 
- સ્ટાફ રૂમ, ઓફિસ એરિયા, એસેમ્બલી હોલ અને અન્ય સામાન્ય વિસ્તારોમાં સોશિયલ ડિસ્ટન્સિંગનું પાલન કરવું.
- વિવિધ વર્ગો માટે મર્યાદિત અને અનુકૂળ સમય
- તમામ વિદ્યાર્થીઓ અને સ્ટાફે ફેસ કવર/માસ્ક પહેરીને શાળાએ પહોંચવું જોઈએ અને સમગ્ર સમય દરમિયાન પહેરવું જોઈએ.
- પીએમ ન્યૂટ્રિશન (મિડ ડે મીલ)ની ડિલિવરી દરમિયાન સોશિયલ ડિસ્ટન્સિંગનું પાલન કરવું.
- નિયમિત ધોરણે શાળા પરિવહનનું સેનિટાઇઝેશન
- છાત્રાલયોમાં પથારીઓ વચ્ચે પૂરતું અંતર સુનિશ્ચિત કરવું.
- હોસ્ટેલમાં દરેક સમયે સોશિયલ ડિસ્ટન્સિંગનું પાલન કરવું.
- માતા-પિતાની સંમતિથી ઘરેથી અભ્યાસ કરવા ઇચ્છતા વિદ્યાર્થીઓને મંજૂરી