- લોકસભા ચૂંટણી પહેલા ગુજરાત કોંગ્રેસમાં મોટી હિલચાલ
- શક્તિસિંહ ગોહિલ પ્રદેશ કોંગ્રેસ પ્રમુખ બન્યા બાદ નવી ટીમ જાહેર થશે
- કામ નહીં કરનાર નેતાઓને જવાબદારીથી મૂક્ત કરાશે
લોકસભાની ચૂંટણીને લઈ ભાજપ, કોંગ્રેસ તેમજ આપ દ્વારા તૈયારીઓ શરૂ કરી દીધી છે. ગુજરાત કોંગ્રેસને લઈ મહત્વનાં સમાચાર મળી રહ્યા છે. જેમાં પ્રદેશ કોંગ્રેસ દ્વારા નવીન માળખું બનાવવાની હિલચાલ તેજ બનાવી છે. નવીન પ્રદેશ પ્રમુખ શક્તિસિંહ ગોહિલ દ્વારા પ્રદેશ કોંગ્રેસ પ્રમુખ બન્યા બાદ હવે નવી ટીમ જાહેર થશે. સપ્ટેમ્બર મહિનાનાં અંતમાં અને ઓક્ટોમ્બર મહિનાનાં પ્રથમ સપ્તાહમાં પ્રદેશ કોંગ્રેસનું દ્વારા નવીન માળખું જાહેર થઈ શકે છે.
વર્તમાન પદાધિકારીઓની કામગીરીનું થશે મૂલ્યાંકન
કોંગ્રેસનું નવીન માળખું બે તબક્કામાં જાહેર થશે. તેમજ પ્રદેશ કોંગ્રેસનું માળખું જમ્બો નહી હોય. તેમજ વર્તમાન પદાધિકારીઓની કામગીરીનું મૂલ્યાંકન થશે. અને કામનાં આધારે પાર્ટી સંગઠનમાં જવાબદારી આપશે.
કામ નહીં કરનાર નેતાઓને જવાબદારીથી મુક્ત કરાશે
ગુજરાત મુલાકાતે આવેલા નવીન પ્રભારીની કડક સૂચનાનાં આધારે સંગઠનમાં કામ કરનારને જવાબદારી અપાશે. તેમજ પદયાત્રા અને હાથ સે હાથ જોડો અભિયાનની કામગીરીનું પણ મૂલ્યાંકન કરવામાં આવશે. ત્યારે જીલ્લા પ્રમુખોથી લઈ તમામ હોદ્દેદારોનાં કામનૂં મૂલ્યાંકન થશે. તેમજ કામ નહી કરનાર નેતાઓને જવાબદારીથી મુક્ત કરાશે.
33 જિલ્લા અને 8 મહાનગર પાલિકામાં યોજાશે પદયાત્રા
કોંગ્રેસ દ્વારા પદયાત્રા અને હાથ સે હાથ જોડો અભિયાન મહત્વપૂર્ણ રહેશે. કોંગ્રેસ પ્રદેશ પ્રમુખ શક્તિસિંહ ગોહિલે જન અધિકાર પદયાત્રા શરૂ કરી છે. ત્યારે 33 જીલ્લા અને 8 મહાનગર પાલિકામાં પદયાત્રા યોજાશે. લોકસભા ચૂંટણી પહેલા કોંગ્રેસમાં નવા પ્રાણ ફૂંકવા પદયાત્રા શરૂ કરાશે.
