માનસિકતા / મહિલાઓ માસિકર્ધમમાં રસોઈ કરી પતિને ખવડાવે તો આગળનો જનમ કૂતરીનો આવે: સ્વામિનારાયણના સાધુનો બફાટ

• કયા શાસ્ત્રને આધારે આવી ભદ્દી મજાક કરી રહ્યા છે સ્વામી
• માસિક ધર્મ વિશે એલફેલ વાતો કરવાથી સમાજ સુધારક થઈ જવાય?
• બહેન દીકરીઓની ઈજ્જત નહી કરો તો તમે આમેંય પતનના માર્ગે છો

ભુજના સ્વામિનારાયણ મંદિરના સ્વામી કૃષ્ણસ્વરૂપ દાસજી પોતે ઉભા કરેલા ધર્મ અને આડંબરના નશામાં એટલા ચકચૂર થઈ ગયા છે કે તે શું નિવેદન આપી રહ્યા છે તે પણ કદાચ તેમને નથી ખબર. તે માસિકધર્મ કે જે તેમની અને આ સમગ્ર બ્રહ્માંડની ઉત્પત્તીનું કેન્દ્ર છે તેને અવગણી સ્વર્ગ નર્કની વાત કરી રહ્યા છે. હવે આવા નામ વગરના શાસ્ત્રો તેમના અનુયાયીઓ નક્કી કરશે કે બહેન દીકરીઓ માસિક વખતે શું કરવું?

શું કહ્યું સ્વામીએ?

ભુજ સ્વામિનારાયણ મંદિરના સ્વામીએ નિવેદન આપ્યું હતું.  એકવાર તમે માસિક ધર્મમાં રહેલી સ્ત્રીના હાથના તમે રોટલા ખાઇ જાઓ એટલે બીજો અવતાર બળદનો જ છે. એટલું જ નહીં પરંતુ જે સ્ત્રી માસિકધર્મમાં પોતાના પતિને રસોઈ બનાવીને જમાડે છે તેનો બીજો જન્મ કૂતરીનો આવે છે. તેમણે કહ્યું હતું કે માસિક ધર્મ દરમિયાન મહિલાઓએ કામ ન કરવા જોઇએ. આ સમયે ઘરનું કામ કરવાથી અનિષ્ટ થાય છે. 

આ કયા પ્રકારનું ધાર્મિક જ્ઞાન છે?

જાહેરમાં સ્ત્રીની અવગણના કરનાર આ સ્વામી કયા શાસ્ત્રની વાત કરે છે? અને શું એમને એ ખબર નહીં હોય કે, તે પણ એક માતાની કૂખે જન્મ્યા હશે. ભગવાનને પણ માનવ અવતારે જન્મવા માટે માતાની કૂખ જોઈ હશે. અને એમના માતા પણ માસિકધર્મમાં થતાં હશે. આ કયા પ્રકારનું ધાર્મિક જ્ઞાન છે?

ક્યા શાસ્ત્રના આધારે તેઓ આવો દાવો કરે છે ?  

અહીં સવાલ એ થાય છે કે, સ્વામીકૃષ્ણસ્વરૂપ દાસ ક્યા શાસ્ત્રના આધારે દાવો કરે છે કે, આ રીતે અનુયાયીઓને ડરાવવા કેટલા યોગ્ય છે ? શા માટે ભક્તોને આવું જ્ઞાન આપે છે સ્વામી ? માસિક ધર્મ પાળવો કે નહીં તે નક્કી કરવા માટે મહિલા સંવતંત્ર છે તો પછી આ રીતનું દબાણ કેમ ? સ્વાભાવિક છે કે, ધર્મના ઠેકેદાર બનેલા સ્વામી આ પ્રકારનો બફાટ કરે ત્યારે સવાલો અનેક ઉઠવાના. પરંતુ માત્ર સવાલ ઉઠાવવાથી આવા સમાજના દુશ્મનો ખતમ થઈ જશે ? નહીં જ થાય. પરંતુ જો આવા ઢોંગીઓનું આપણે જ સાંભળવાનું બંધ કરી દેશું તો ચોક્કસથી આપણો સમાજ અને આપણી દીકરીઓ સુરક્ષિત રહી શકશે. સુરક્ષિત જીવી શકશે.