ઇલેક્શન 2022 / ઈતિહાસમાં કોઈને લીડ નહીં મળી હોય તેટલી લીડથી જીતીશ, કોંગ્રેસમાંથી આવી સીધી જ ભાજપની ટિકિટે લડતા નેતાનો હુંકાર

• તાલાળા બેઠક પરથી ભાજપના ઉમેદવારે ફોર્મ ભર્યુ
• કોંગ્રેસમાંથી ભાજપમાં જોડાયા હતા ભગવાન બારડ
• ઈતિહાસમાં કોઈને લીડ નહીં મળી હોય તેટલી લીડ મળશે: બારડ

ગુજરાતમાં ચુંટણીનો દમદાર માહોલ જામ્યો છે. તમામ પક્ષના જીતના દાવાઓ વચ્ચે સભા, રેલી, શક્તિ પ્રદર્શન, પ્રચાર અભિયાન જોરશોરથી ચાલી રહ્યું છે. તેવામાં આજે તાલાળા બેઠક પરથી ભાજપના ઉમેદવાર ભગવાન બારડએ ઉમેદવારી ફોર્મ ભર્યું હતું. આ વેળાએ તેમણે જીતનો આશાવાદ વ્યકત કરીને હુંકાર કરતા કહ્યું હતું કે ઈતિહાસમાં કોઈને લીડ નહીં મળી હોય તેટલી લીડથી હું જીત હાંસલ કરીશ. તાલાળા વિસ્તારની પ્રજાએ મને પ્રેમ આપ્યો છે અને હું વિકાસની રાજનીતિ સાથે જોડાયેલો વ્યક્તિ હોવાનું ભગવાન બારડે ઉમેર્યું હતું. 

કોંગ્રેસમાંથી ભાજપમાં જોડાયા હતા ભગવાન બારડ
ઉલ્લેખનીય છે કે 5 દિવસ અગાઉ કોંગ્રેસનાં દિગ્ગજ નેતા ભગાભાઇ બારડે કોંગ્રેસ પક્ષમાંથી રાજીનામું આપી દીધું હતું. જે બાદ ભગવાન બારડે કમલમ ખાતે કેસરિયો ધારણ કરી વિધિવત રીતે ભાજપમાં જોડાયા હતા. ભગવાન બારડ આહીર સમાજના અગ્રણી અને પૂર્વ સાંસદ સ્વ.જશુભાઈ બારડના ભાઈ છે. તેમના પિતા ધાનાભાઈ માંડાભાઈ બારડ કોંગ્રેસી આગેવાન હતા. એટલુ જ નહિ તેમનો પરિવાર વર્ષોથી કોંગ્રેસ સાથે જોડાયેલો છે. ગત  વિધાનસભાની ચુંટણીમાં ભગવાન બારડ કોંગ્રેસ તરફથી તાલાલા બેઠક પર ચૂંટણી લડ્યા હતા, જેમાં 31730 જેટલા જંગી લીડથી જીત થઇ હતી. જોકે હાલ તેમને ભાજપ તરફથી ચુંટણી જંગમાં ઉતારવામાં આવ્યા છે.

ઉના બેઠક પરથી ભાજપના કે. સી. રાઠોડએ ઉમેદવારી રજુ કરી  
બીજી બાજુ ઉના વિધાનસભા બેઠક પર ભાજપના કે. સી. રાઠોડએ ઉમેદવારી રજુ કરી છે.  જેમણે આ અગાઉ રોડ શો કર્યો હતો આ દરમિયાન સંખ્યાબંધ ટેકેદારો ઉમટી પડ્યા હતા. પક્ષના કાર્યકરો અને તેમના ટેકેદારોના વિશાળ કાફલા સાથે કે સી રાઠોડ ઉમેદવારી પત્ર ભરવા પ્રાંત ઓફિસએ પહોંચ્યા હતા. ઉલ્લેખની છે કે ઉના બેઠક પર કે સી રાઠોડનો ચૂંટણી જંગ કોંગ્રેસના પુંજાભાઈ વંશ સાથે છે.