વિખવાદ / ગુજરાત વિધાનસભા ચૂંટણી પહેલા કોંગ્રેસ બાદ હવે ભાજપમાં આંતરિક ડખો!, સોજીત્રા ન.પા.ના 5 કાઉન્સિલરોએ ધરી દીધા રાજીનામા

• આણંદ જિલ્લા ભાજપમાં આંતરિક વિખવાદ
• ચૂંટણી પહેલા 5 કાઉન્સિલરોના રાજીનામા
• ભાજપમાંથી પ્રાથમિક સભ્ય પદેથી આપ્યું રાજીનામું

વિધાનસભાની ચૂંટણી પહેલા આણંદ જિલ્લામાં ભાજપના 5 કાઉન્સિલરોએ રાજીનામા ધરી દીધા છે. સોજીત્રા નગરપાલિકાના 5 કાઉન્સિલરોએ રાજીનામા આપી દીધા. ભાજપમાંથી પ્રાથમિક સભ્ય પદેથી તેઓએ રાજીનામું આપી દીધું છે. કાઉન્સિલરોએ સ્થાનિક સંગઠનથી નારાજ થઇને રાજીનામું આપ્યું હોવાનું જાણવા મળી રહ્યું છે. તદુપરાંત કેટલાક હોદ્દેદારો પર બદનામ કરવાનો પણ આક્ષેપ મૂકવામાં આવ્યો છે.

અગાઉ જસદણ તાલુકા ભાજપ પ્રમુખે રાજીનામું આપતા સૌરાષ્ટ્રનું રાજકારણ ગરમાયું હતું

ઉલ્લેખનીય છે કે, તાજેતરમાં જ થોડા દિવસો પહેલા જસદણ તાલુકા ભાજપ પ્રમુખ વલ્લભ રામાણીએ પણ રાજીનામું આપી દીધું હતું. વિધાનસભાની ચૂંટણી માથે હોવા છતાં રાજકોટ પંથકમાં કુંવરજી બાવળીયા અને ભરત બોઘરા વચ્ચેનો વિવાદ શમ્યો ન હોવાના પુરાવારૂપ આ રાજીનામું લેવાયું હોવાની ચર્ચા જાગી હતી.

વલ્લભ રામાણીએ રાજીનામું ધરી દેતા ભાજપમાં આંતરિક ડખ્ખો ખુલીને સામે આવ્યો હતો. બીજી તરફ ભાજપમાં ભડાકાને લઇને સૌરાષ્ટ્રનું રાજકારણ ગરમાયું હતું. આ રાજીનામા બાદ સંગઠન માળખામાં વધુ પણ રાજીનામાં પડે તેવી શક્યતા સેવવામાં આવી હતી.

જાણો કયા 5 કાઉન્સિલરોએ રાજીનામા ધરી દીધા?

• વોર્ડ નંબર 1 કલ્પનાબેન મકવાણા, કાઉન્સિલર તેમજ ઉપપ્રમુખ
• વોર્ડ નંબર 2 ના રાહુલ વાઘરી
• વોર્ડ નંબર 3 ઉન્નતિબેન રાણા
• વોર્ડ નંબર 4 જીજ્ઞેશ પટેલ
• વોર્ડ નંબર 5 કોકિલાબેન વાઘરીએ રાજીનામા આપી દીધા.

તાજેતરમાં જ કોંગ્રેસમાં પણ અનેક યુથ કોંગ્રેસ અને NSUIના નેતાઓએ રાજીનામા ધરી દીધા

એ સિવાય તાજેતરમાં કોંગ્રેસમાં પણ એકબાદ એક દિગ્ગજોએ રાજીનામા ધરી દીધા હતા. ગુજરાત યુથ કોંગ્રેસના પૂર્વ પ્રમુખ વિશ્વનાથસિંહ વાઘેલા, વિનયસિંહ તોમર સહિત જીગર માળી, પાર્થ દેસાઈ, વિશાલ ઠાકોર, ભાવરી સમાજના ગુજરાત પ્રમુખ માલારામ ભાવરી સહિત અનેક યુથ કોંગ્રેસ અને NSUIના નેતાઓએ રાજીનામા ધરી દેતા ચૂંટણી પહેલા કોંગ્રેસને પણ મોટો ઝટકો લાગ્યો હતો.