ખુલાસો / PSI,લોકરક્ષક દળની ભરતી માટે 5થી10 લાખ રુપિયા લેવાતા, આરોપીઓને લઈને અમદાવાદ ક્રાઇમબ્રાંચે જુઓ શું કર્યો ખુલાસો

• દહેગામમાં ટ્રેનિંગ એકેડમીમાં ક્રાઈમબ્રાંચના દરોડા, 3ની ધરપકડ
• આરોપીની પૂછપરછમાં ચોંકાવનારા ખુલાસા
• તલાટી, કોન્સ્ટેબલ,પીએસઆઈની પરીક્ષામા ભરતી માટે પૈસા લેતા

રાજ્યમાં સરકારી પરીક્ષાઓમાં ગેરરીતિ અને કૌભાંડોના અનેક બનાવો બની ચૂક્યા છે. ચાલુ પરીક્ષાએ ચોરી કરાવવી, પેપર ફરતા થવા સહિતના અનેક અનિચ્છનીય બનાવો સામે આવ્યા છે ત્યારે ભરતી પરીક્ષામાં ઠગાઇ કરવા મામલે ક્રાઇમબ્રાંચે કેટલાક ચોંકાવનારા ખુલાસા કર્યા છે.  ગાંધીનગરના દહેગામમાં ટ્રેનિંગ એકેડમીમાં ક્રાઈમબ્રાંચે દરોડા પાડીને ઠગાઈને પર્દાફાશ કર્યો હતો. જે મામલે ત્રણ આરોપીને જેલ ભેગા કરાયા હતા.  આ મામલે ક્રાઇમ બ્રાંચે પત્રકાર પરિષદ યોજીને ઠગાઇનું ષડયંત્ર ઉઘાડુ પાડ્યુ. 

આરોપીઓ મૂળ રાજસ્થાનના 

અમદાવાદ ક્રાઈમ બ્રાન્ચના જેસીપી પ્રેમવીરસિંહે પત્રકાર પરિષદ સંબોધતા જણાવ્યુ હતું કે રાજસ્થાનના શખ્સો સરકારી ભરતીના નામે પૈસા ઉઘરાવતા હતા. આ મામલે  દાહોદ SPને માહિતી મળી હતી ત્યારબાદ ક્રાઇમ બ્રાન્ચની ટિમ તપાસમાં લાગી હતી. ઝડપાયેલા 3 આરોપી પૈકી રવિસિંગની પૂછપરછ કરતા પોલીસને ડોક્યુમેન્ટ મળ્યા હતા.  જ્યારે પોલીસને હરીશ પાસેથી પણ ભરતીના ફોર્મ મળ્યા હતા. મહત્વનું છે કે હરીશ પ્રજાપતિ એ મૂળ રાજસ્થાનનો છે તે દહેગામમાં ટ્રેનિંગ અકેડમી ચલાવે છે. તે ઉમેદવારો પાસેથી પૈસા લઇને ફોર્મ ભરાવતો હોવાનું પોલીસ પૂછપરછમાં સામે આવ્યું છે.

કેવી રીતે ખંખેરતા પૈસા ?

ક્રાઇમબ્રાંચને આરોપીઓ પાસેથી ફિઝિકલ ટેસ્ટ પાસના સિક્કા પણ મળી આવ્યા હતા. વળી 10 લોકોના ફોર્મ ભર્યા વિના જ આ સિક્કા લગાવીને આપી દીધા હતા. કોલ લેટર પર ફિઝિકલ ટેસ્ટ પાસના સિક્કા લગાવીને પૈસા પડાવતા હતા. આવી રીતે કુલ 81 ઉમેદવારો પાસેથી આ આરોપીઓએ પૈસા ખંખેર્યા હતા.

2 આરોપીને ક્રાઈમબ્રાંચે વોન્ટેડ જાહેર કર્યા

આ ત્રણેય શખ્સો સ્પર્ધાત્મક પરીક્ષાના પ્રશ્નપત્રો આપવાના બહાને  લોકો પાસેથી પૈસા પડાવતા હતા. વળી હરીશ પ્રજાપતિએ તો પોતે પીએસઆઇ છે તેવી ઓળખ પણ આપતો, આ માટે તેણે PSIનું બોગસ આઈકાર્ડ પણ બનાવ્યુ હતું.  ઉમેદાવારોને પોતાની જાળમાં ફસાવવા માટે પુરવિંદર અને શાહરુખ નામના બે શખ્સો પણ રાખ્યા હતા જેઓ અન્ય રાજ્યોમાંથી ઉમેદવારો લાવી આવતા. આ બંને શખ્સોને ઝડપી પાડવા ક્રાઇમ બ્રાંચે બંનેને વૉન્ટેડ જાહેર કરી તપાસ હાથ ધરી છે. 

 'PSIનું બોગસ આઈકાર્ડ બનાવ્યુ હતું '

પરીક્ષા પાસ કરાવવા માટે પૈસાની વાત કરીએ તો પીએસઆઇ માટે 10 લાખ રુપિયા,લોકરક્ષક દળ માટે 5 લાખ રૂપિયા પડાવતા હતા. આ મામલે અમદાવાદ ક્રાઇમબ્રાંચ દ્વારા  હરીશ પ્રજાપતિ, રવિપ્રતાપસિંગ અને પૂજા ઠાકોરની ધરપકડ કરી વધુ તપાસ હાથ ધરી છે. મહત્વનુ છે કે પૂજા ઠાકોર નામની મહીલા એકેડમીમા કામ કરતી હતી.

 

ક્રાઇમબ્રાંચે પાડ્યા હતા દરોડા

ગાંધીનગરના દહેગામમાં ટ્રેનિંગ એકેડમીમાં ક્રાઈમબ્રાંચે દરોડા પાડીને ઠગાઈને પર્દાફાશ કર્યો હતો.. કોમ્પિટેટીવ પરીક્ષાના પ્રશ્નપત્ર આપવાના બહાને ઠગાઈ કરનાર 3 આરોપીને ક્રાઈમબ્રાંચે ઝડપી લીધા હતા... આરોપીઓએ અંદાજે 100થી વધુ વિદ્યાર્થીઓ સાથે ઠગાઈ કરી હતી.. આરોપીઓ અલગ અલગ ભરતી પરીક્ષાના પેપર લાવી આપવાના બહાને વિદ્યારથીઓ સાથે ઠગાઈ કરતા હતા.. આ મામલે અમદાવાદ ક્રાઈમબ્રાંચે દરોડા પાડ્યા અને 3 આરોપીને ઝડપીને જેલ હવાલે કર્યા હતા