સારવાર / ગુજરાતમાં મ્યુકર્માઈકોસિસના કેસનો ચોંકાવનારો આંકડો, સ્ત્રી-પુરુષમાંથી આ લોકોમાં સંક્રમણ વધારે

• રાજકોટમાં મ્યુકરમાઇકોસિસના દર્દીઓમાં વધારો 
• સિવિલ હોસ્પિટલ ખાતે 609 દર્દીઓ સારવાર હેઠળ
• 242 દર્દીઓની સર્જરી કરવામાં આવી

રાજકોટમાં મ્યુકર્માઈકોસિસના કેસોમાં વધારો જોવા મળી રહ્યો છે. હાલમાં સિવિલ હોસ્પિટલમાં 609 દર્દીઓ સારવાર હેઠળ છે. જ્યારે 242 જેટલા દર્દીઓની સર્જરી પૂર્ણ કરવામાં આવી છે. 100 જેટલા પોસ્ટ ઓપરેટીવ દર્દીઓને સમરસમાં રિફર કરવામાં આવ્યા છે. ઉલ્લેખનીય છે કે રાજકોટ સિવિલમાં દૈનિક 18 જેટલી સર્જરી કરવામાં આવી રહી છે.

રાજ્યોને વધુ એમ્ફોટેરિસિન-બી ઇન્જેક્શન ફળવાયા છે. કેન્દ્ર સરકારે વધુ 29,250 વાઇલ્સ રાજ્યોને ફાળવ્યા છે. રાજ્યોમાં મ્યુકર્માઈકોસિસના દર્દીના આધારે ફાળવણી કરાઈ રહી છે. હાલ દેશમાં મ્યુકર્માઈકોસિસના કુલ 11,717 દર્દીઓ હોવાની માહિતી સામે આવી છે. ગુજરાતને 7200થી વધુ એમ્ફોટેરિસિન-બીના વાઇલ્સ મળ્યા છે. ગુજરાતમાં 25મે સુધીમાં મ્યુકર્માઈકોસિસના 2859 કેસ હોવાની માહિતી છે. 

અમદાવાદ સિવિલ હોસ્પિટલમાં મ્યુકર્માઈકોસિસના ઈન્જેકશન વિતરણની કામગીરી શરૂ કરી દેવામાં આવી છે. ઈન્જેકશન દર્દીઓને આપવામાં આવશે નહીં. ઈન્જેકશન માટે જે તે દર્દીઓની હોસ્પિટલ દ્વારા સિવિલ હોસ્પિટલમાં ઈ-મેલ કરવો પડશે. આ ઈ-મેલમાં દર્દીઓના જરૂરી દસ્તાવેજ આપવાના રહેશે. આ ઈ-મેલ હોસ્પિટલના સત્તાવાર ઈ-મેલ પર સવારના 9થી 12 વચ્ચે કરી શકાશે બાદમાં બપોરે 3 વાગ્યાથી લઈને 5 વાગ્યા દરમિયાન જરૂરી ચકાસણી કર્યા બાદ ઈન્જેકશનની ફાળવણી કરવામાં આવશે.

રાજ્યમાં મ્યુકરમાયકોસીસના કેટલાક તારણો ​

• આ રોગનું પ્રમાણ સ્ત્રીઓની સરખામણી એ પુરુષોમાં વધારે જોવા મળ્યું છે. અત્યાર સુધી નોંધાયેલા કુલ દર્દીઓમાંથી ૬૭.૧% પુરુષો જયારે ૩૨.૯% સ્ત્રી દર્દીઓ છે.
• આ રોગના દર્દીઓ પૈકી માત્ર ૦.૫% દર્દીઓ ૧૮ વર્ષથી ઓછી વયના, ૨૮.૪% દર્દીઓ ૧૮ થી ૪૫ વર્ષની ઉંમરના, ૪૬.૩% દર્દીઓ ૪૫ થી ૬૦ વર્ષની ઉંમરના છે. ૨૪.૯% દર્દીઓ ૬૦ થી વધારે વયના છે.
• કુલ દર્દીઓમાંથી ૫૯.૦૦% દર્દીઓને ડાયાબીટીસ, ૨૨.૧% દર્દીઓને ઈમ્યુનો કોમ્પ્રોમાઈઝડ જયારે ૧૫.૨% દર્દીઓને કોમોર્બિડ કન્ડિશન હોવાનું સામે આવ્યું છે.
• આ રોગમાંના માત્ર ૩૩.૫% દર્દીઓને કોરોનાની સારવાર દરમ્યાન ઓક્સીજનની જરૂર પડી હતી. જયારે ૬૬.૫% દર્દીઓને ઓક્સિજન જરૂરિયાત ઊભી થઇ નહોતી
• ૪૯.૫% દર્દીઓને કોરોનાની સારવાર દરમ્યાન સ્ટીરોઇડ થેરાપી આપવામાં આવી હતી
• જયારે ૫૦.૫% દર્દીઓમાં સ્ટીરોઇડ થેરાપીની જરૂર પડી નહોતી.

રાજ્યમાં મ્યુકર્માઈકોસિસની સર્જરીનું પ્રમાણ વધ્યું

રાજ્યમાં મ્યુકર્માઈકોસિસનો ખતરો વધ્યો છે. મ્યુકર્માઈકોસિસના કારણે મે મહિનામાં જ 10 દર્દીઓએ આંખો ગુમાવી છે. સર્જરી માટે હજુ પણ 150 દર્દીઓ વેઇટિંગમાં છે. આંખ અને દાંતના જડબા પર દર્દીઓને ખુબ અસર થઈ છે. હાલ અમદાવાદ સિવિલ હોસ્પિટલમાં 335 દર્દીઓ સારવાર હેઠળ છે.

વડોદરામાં મ્યુકર્માઈકોસિસના નવા 19 કેસ નોંધાયા છે. વડોદરા શહેરમાંથી મ્યુકર્માઈકોસિસના 4 દર્દી ડિસ્ચાર્જ કરાયા છે. તો 2 દર્દીઓના મ્યુકર્માઈકોસિસથી મૃત્યુ થયા છે. વડોદરામાં મ્યુકર્માઈકોસિસથી કુલ મૃત્યુઆંક 9 પર પહોંચ્યો છે. ગોત્રી GMERS હોસ્પિટલમાં એક જ દિવસમાં 52 સર્જરી કરાઈ છે. ગોત્રી હોસ્પિટલમાં હાલ 79 જયારે SSG હોસ્પિટલમાં 201 દર્દીઓ દાખલ છે.