કાર્યવાહી / ગાંજાની હેરાફેરીનો પર્દાફાશ: ભરૂચ હાઈવે પર ટ્રાવેલિંગ બેગમાં 76 કિલો ગાંજો લઈ જતાં 4 શખ્સોની ધરપકડ

• ભરૂચના અંકલેશ્વર GIDC પોલીસે ગાંજાની હેરાફેરીનો પર્દાફાશ
• ટ્રાવેલિંગ બેગમાં થતી હતી ગાંજાની હેરાફેરી
• રૂપિયા 7 લાખ ઉપરાંતની કિંમતનો 76 કિલો ગાંજો જપ્ત 

ગુજરાતમા દારૂ, ગાંજા અને ડ્રગ્સનું દૂષણ દિવસેને દિવસે વકરી રહ્યું છે. જેના પૂરાવારૂપ સમયાંતરે દારૂ, ગંજાના જથ્થા સાથે  આરોપીઑ પોલીસ ઝપટે ચડી રહ્યા છે તેવામા આજે ભરૂચ જિલ્લાના અંકલેશ્વર નજીક આવેલ વાલિયાથી સુરત જવાના માર્ગ પર રૂ. 7 લાખથી વધુની કિંમતનો ગાંજાનો જથ્થો પોલીસે ઝડપી લીધો હતો. ગાંજાના જથ્થા સાથે પોલીસે 4 શખ્સોને દબોચી લઇ કાયદેસરની કાર્યવાહી હાથ ધરી હતી.

બેગમાંથી ગાંજાના 38 પેકેટ ઝડપાયા
અંકલેશ્વરની વાલિયા ચોકડીથી સુરત જવાના માર્ગ પરથી SOG પોલીસ સહિત અંકલેશ્વર GIDC પોલીસે ગાંજાની હેરાફેરીનો પર્દાફાશ કર્યો છે. પોલીસ કાફલો પેટ્રોલીંગમાં હતો તે દરમ્યાન 4 પરપ્રાંતિયો શંકાસ્પદ હાલતમા હાથમાં ટ્રાવેલ બેગ લઈને નજરે પડ્યા હતા. હાઇવે પરના સર્વિસ રોડ પર તપાસ દરમિયાન શખ્સો ઝડપાયા હતા  આથી પોલીસે તમામને અટકાવી આરોપીઑની પૂછપરછ કરી તલાશી લીધી હતી. જે દરમિયાન  તેમની પાસે રહેલી બેગમાંથી 38 જેટલા પેકેટ મળી આવ્યા હતા. જેને ખોલતા અંદરથી નશાકારક માદક પદાર્થ ગાંજો મળી આવ્યો હતો. 

76 કિલો ગાંજા સાથે 4 શખ્સોની ધરપકડ
જેને લઇને પોલીસે સ્ટાફ પણ ચોંકી ઉઠ્યો હતો. ત્યારબાદ પોલીસે FSLને બોલાવી સેમ્પલ લેબમાં મોકલી આપ્યા હતા. સાથે જ 76 કિલો 300 ગ્રામ ગાંજાના વિપુલ જથ્થાને જપ્ત કરી ઓરિસ્સાના ખોરદા જિલ્લાના બાનપુર તાલુકાના 4 આરોપી પ્રસાદ પ્રમોદ પાંડા, દિનેશ રમેશ શાહુ, મનોજ ચાંદ ભગવાન ચાંદ અને રાકેશ ગદાધર પ્રધાનની 3 મોબાઈલ મળી કુલ રૂપિયા 7.68 લાખના મુદ્દામાલ સાથે ધરપકડ કરવામાં આવી હતી. સમગ્ર મામલે જીઆઇડીસી પોલીસે નારકોટિક્સ ડ્રગ્સ એન્ડ સાઈકોટ્રોપીક સબસ્ટન્સ એક્ટ હેઠળ ચારેય ઇસમો વિરુદ્ધ ગુનો નોંધી વધુ તપાસ હાથ ધરી છે.