- 128 તાલુકામાં સિઝનનો 100% વરસાદ નોંધાયો
- 4 તાલુકામાં 60% થી ઓછો વરસાદ પડ્યો
- સિઝનનો સૌથી વધુ વરસાદ કપરાડામાં 130.75 ઈંચ
રાજ્યના 128 તાલુકામાં સિઝનનો 100% વરસાદ નોંધાયો છે. 4 તાલુકામાં 60% થી ઓછો વરસાદ પડ્યો છે. રાજ્યનાં 206 જળાશયોમાં કુલ જળસંગ્રહ 95.19% થયો છે. 31 જળાશયોમાં 50%થી ઓછો જળસંગ્રહ થયો છે. રાજ્યના 71 જળાશયો સંપૂર્ણ પણે ભરાયા છે. જ્યારે 14 જળાશયોમાં 98% થી વધુ જળસંગ્રહ થયો. સરદાર સરોવર 24.04 કરોડ લીટર જળસંગ્રહ સાથે 95.19% ભરાયો છે.
જળસંગ્રહની સ્થિતિ
રાજ્યમાં જળસંગ્રહની સ્થિતિ વિશે વાત કરીએ તો ઉત્તર ઝોનમાં 15 ડેમમાં જળ સગ્રંહ 156760 છે, જેમાં 81.11 ટકા જળ જથ્છો છે. મધ્યના 17 ડેમમાં 228189 જળસંગ્રહ છે જેમાં 97.89 ટકા છે. સૌરાષ્ટ્રમાં 141 ડેમમાં 212592માં કુલ જથ્થો 82.13 ટકા છે. અત્રે જણાવીએ કે, કુલ 207 ડેમમાં જળસંગ્રહ 1469578 છે જેમાં કુલ જથ્થો 93 ટકા છે.
સૌથી વધુ અને સૌથી ઓછો વરસાદ
સિઝનમાં સૌથી વધુ વરસાદ કપરાડામાં 130.75 ઈંચ નોંધાયો છે જ્યારે ખેરગામમાં 104.75 ઈંચ, વિસાવદરમાં 98.75 ઈંચ, ઉમરગામમાં 90.75 ઈંચ તેમજ વાપીમાં 95 ઈંચ વરસાદ નોંધાયો છે. જ્યારો સૌથી ઓછા વરસાદ વાળા પાંચ તાલુકાની વાત કરવામાં આવે તો દેત્રોજ-રામપુરમાં 12.25 ઈંચ જ્યારે બાવળામાં 13 ઈંચ આમોદમાં 14.50 ઈંચ ચાણસ્મામાં 14.50 ઈંચ ધોળકામાં 14.50 ઈંચ વરસાદ નોંધાયો છે.
ચોમાસાની વિદાય !
હવામાન વિભાગના જણાવ્યાનુસાર 25 સપ્ટેમ્બરથી ચોમાસાએ વિદાય લેવાની શરૂ કરી દીધી છે. હવામાન નિષ્ણાંતોએ આગાહી કરી છે કે, અરબી સમુદ્રમાં થઈ રહેલા હવામાનના ફેરફારના કારણે તા. 12થી 20 ઓક્ટોબરમાં વાવાઝોડાની અસર શરૂ થશે. આ સમય દરમિયાન મુંબઈ, દક્ષિણ ગુજરાત અને દક્ષિણ સૌરાષ્ટ્રમાં ભારેથી અતિ ભારે વરસાદ પડશે. રાજ્યમાં 12 થી 20 ઓક્ટોબરની વચ્ચે પણ આવો માહોલ સર્જાશે.
