ટેક્નોલોજી / WhatsAppનું નવું AI ફીચર નાના વેપારીઓ માટે બનશે ગેમ ચેન્જર,24x7 મળશે AI આધારિત ગ્રાહક સેવા

WhatsApp Business વાપરતા નાના અને મધ્યમ વેપારીઓ માટે મોટી ખુશખબર આવી છે. Meta એ ભારતમાં નવું Business AI ફીચર લોન્ચ કરવાની જાહેરાત કરી છે. આ ફીચરની મદદથી હવે બિઝનેસ ગ્રાહકોના પ્રશ્નોના જવાબ દિવસ-રાત કોઈપણ સમયે આપી શકશે તે પણ અલગ મોટી ટીમ અથવા વધારાના સોફ્ટવેર વગર. કંપનીનું કહેવું છે કે આ AI આધારિત સિસ્ટમ નાના વેપારીઓને ગ્રાહક સેવા સુધારવામાં નવા ગ્રાહકો સુધી પહોંચવામાં અને વેચાણ વધારવામાં મદદ કરશે.

24x7 મળશે ઓટોમેટિક જવાબ

નવા Business AI ફીચરની સૌથી મોટી ખાસિયત એ છે કે તે હંમેશા એક્ટિવ રહી શકે છે. એટલે કે જો કોઈ ગ્રાહક મોડીરાત્રે પણ મેસેજ કરે તો તેને તરત જવાબ મળી જશે. આ AI સિસ્ટમ સામાન્ય પ્રશ્નોના જવાબ આપવા, અપોઇન્ટમેન્ટ બુક કરવા, લીડ્સ એકત્ર કરવા અને પ્રોડક્ટ સંબંધિત માહિતી આપવા સક્ષમ હશે. તેના કારણે નાના વેપારીઓને દરેક સમયે ફોન અથવા ચેટ સંભાળવાની જરૂર ઓછી પડી શકે છે.

બિઝનેસની માહિતી પરથી ટ્રેન થશે AI

WhatsAppનું આ AI ફીચર બિઝનેસની પોતાની માહિતીના આધારે કામ કરશે. એટલે કે દુકાનદાર અથવા કંપની પોતાના પ્રોડક્ટ્સ, સેવાઓ, કિંમતો, ઑફર્સ, ડિલિવરી અને અન્ય જરૂરી માહિતી તેમાં ઉમેરી શકશે. ત્યારબાદ AI ગ્રાહકોના પ્રશ્નોના જવાબ તે માહિતી મુજબ આપશે. આથી વારંવાર એક જેવા પ્રશ્નોના જવાબ આપવા માટે લાગતો સમય બચી શકે છે.

ભારતીય ભાષાઓમાં પણ કરશે વાતચીત

કંપનીએ જણાવ્યું છે કે આ AI ભારતમાં બોલાતી વિવિધ ભાષાઓમાં વાતચીત કરી શકશે. એટલે કે ગ્રાહકો પોતાની પસંદગીની ભાષામાં પ્રશ્ન પૂછશે અને તેમને તે જ ભાષામાં જવાબ મળવાની શક્યતા રહેશે. આવનારા સમયમાં તેમાં UPI પેમેન્ટ સપોર્ટ પણ ઉમેરવામાં આવશે, જેથી ગ્રાહકો સીધા ચેટની અંદર જ પેમેન્ટ કરી શકશે.

AI સંપૂર્ણ રીતે માણસોની જગ્યા નહીં લે

જોકે આ ફીચર ઘણું સ્માર્ટ હશે, છતાં બિઝનેસ માલિકોનો નિયંત્રણ સંપૂર્ણ રીતે યથાવત રહેશે. જો કોઈ વાતચીતમાં માનવીય મદદની જરૂર જણાશે, તો વેપારીઓ પોતે ચેટ સંભાળી શકશે. એટલે કે AI માત્ર સહાય કરશે, સંપૂર્ણ રીતે માણસોની જગ્યા નહીં લે.

નાના વેપારીઓ માટે આ મોટો બદલાવ કેમ છે?

ભારતમાં મોટી સંખ્યામાં નાના બિઝનેસ WhatsApp દ્વારા ગ્રાહકો સાથે જોડાયેલા રહે છે. Meta મુજબ દેશમાં મોટા ભાગના ઑનલાઇન યુઝર્સ દર અઠવાડિયે કોઈને કોઈ બિઝનેસ સાથે ચેટ કરે છે. આવી સ્થિતિમાં મર્યાદિત સ્ટાફ અને સાધનો ધરાવતા નાના વેપારીઓ માટે દરેક ગ્રાહકને તરત જવાબ આપવો મુશ્કેલ બની જાય છે. કંપનીનું માનવું છે કે AI આ સમસ્યાનો મોટો ભાગ ઉકેલી શકે છે.

આ પણ વાંચોઃ લાખો કર્મચારીઓ માટે ખુશખબર, મોંઘવારી ભથ્થામાં વધારાનું એલાન

આ ફીચર કેવી રીતે મળશે?

Eligible બિઝનેસ યુઝર્સ WhatsApp Business એપના “Tools” વિભાગમાં જઈ “Your Business AI” વિકલ્પ દ્વારા આ ફીચર સેટઅપ કરી શકશે. કંપની આવનારા અઠવાડિયાઓમાં ધીમે ધીમે આ સુવિધા તમામ યોગ્ય બિઝનેસ એકાઉન્ટ્સ સુધી પહોંચાડશે. બિઝનેસ ઇચ્છે તો પછીથી આ ફીચરમાં ફેરફાર કરી શકે છે અથવા તેને બંધ પણ કરી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ