રાજકોટ / પહેલા કહ્યું કાળાબજારી ચાલે છે, હવે પરત ખેંચી અરજી: બાગેશ્વર સરકારના દિવ્ય દરબારમાં થયેલા વિવાદનો અંત

 

• રાજકોટના હેમલ વિઠ્ઠલાણીએ અરજી પરત ખેંચી
• ધીરેન્દ્ર શાસ્ત્રી વિરુદ્ધ કરેલી અરજી પરત ખેંચી
• રૂપિયા મળતા હેમલ વિઠ્ઠલાણીએ અરજી પરત ખેંચી

રાજકોટ ખાતે રેસકોર્ષ ગ્રાઉન્ડમાં બાગેશ્વર ધામનો મહા દિવ્ય દરબાર યોજાયો હતો. બાગેશ્વર ધામના ધીરેન્દ્ર શાસ્ત્રીએ વશીકરણ કરીને રૂપિયા પડાવ્યાની પોલીસ કમિશનરને લેખિતમાં અરજી કરવામાં આવી હતી. જે બાદ હવે રાજકોટના અરજદાર હેમલ વિઠ્ઠલાણીએ અરજી પરત ખેંચી છે. રૂપિયા પરત મળતા હેમલ વિઠ્ઠવાલીએ પોતાની અરજી પાછી ખેંચી છે. આયોજક કમિટીએ રૂપિયા પરત આપતા ફરિયાદીએ પોલીસમાં કરેલી અરજી પરત ખેંચી છે.

શું હતો સમગ્ર મામલો?
રાજકોટના રેસકોર્ષ ગ્રાઉન્ડ ખાતે બે દિવસ બાગેશ્વર ધામનો મહા દિવ્ય દરબારનું આયોજન કરવામાં આવ્યું હતું. ત્યારે બાગેશ્વર ધામના ધીરેન્દ્ર શાસ્ત્રી સામે રાજકોટ પોલીસ કમિશનર કચેરીમાં લેખિત અરજી કરવામાં આવી હતી. રાજકોટના હેમલ વિઠ્ઠલાણી નામના વ્યક્તિએ પોલીસ કમિશનરને અરજી કરી હતી. 

મને બાબાએ ખીસ્સુ ખાલી કરવા કહ્યું હતુંઃ હેમલ 
જેમાં હેમલ વિઠલાણીએ કહ્યું હતું કે, 'શાસ્ત્રીજીએ મને હીપ્નોટાઈસ કરીને મારા સ્થાનેથી બોલાવીને ખીસ્સુ ખાલી કરવાનું કીધું, તે સંદર્ભે હું ડરીને મારા ખીસ્સામાંથી કાઢીને રૂપિયા 13 હજાર આપી દીધા હતા. મને એમ હતું કે દરબાર પછી મને બોલાવીને રૂપિયા પરત આપી દેશે. પરંતુ આવું થયું નહોતું. હું ડરી ગયો હતો કે જો હું મારું ખીસ્સુ ખાલી ન કરું તો બાબા ચમત્કાર કરીને મારી ઉપર કોઈ દિવ્ય શક્તિથી વસમા કરી લેશે. મારી નમ્ર અરજ છે કે આવો ફ્રોડ બીજા કોઈ શ્રદ્ધાળુ સાથે ન થાય તેને ધ્યાનમાં લઈને યોગ્ય કાર્યવાહી કરે અને મેં આપેલા રૂપિયા મને પાછા મળી રહે. એવી મારી આપને નમ્ર અરજ છે.'

અરજી બાદ પરત આપ્યા રૂપિયા
જોકે, હવે રાજકોટના હેમલ વિઠ્ઠલાણીએ અરજી પરત ખેંચી લીધી છે. હેમલ વિઠ્ઠલાણીની અરજી બાદ આયોજક કમિટીએ 13 હજાર રૂપિયા પરત આપતા યુવકે અરજી પાછી ખેંચી લીધી છે.