રાહતના સમાચાર / '...તો 15 દિવસમાં તેલના ભાવ ઘટી જશે', સિંગતેલના રેકૉર્ડતોડ ભાવ વચ્ચે SOMAના ચેરમેનનું મોટું નિવેદન

• સિંગતેલ ડબ્બાના ભાવે રેકોર્ડ તોડ્યો
• ટુંક સમયમાં તેલના ભાવમાં થઈ શકે છે ઘટાડો
• સૌરાષ્ટ ઓઇલ મિલર અને નાફેડની બેઠક યોજાઇ

છેલ્લા કેટલાય સમયથી સતત વધતી જતી મોંઘવારીથી લોકો પરેશાન થઇ ગયા છે. દૂધ, શાકભાજી, પેટ્રોલ-ડીઝલના ભાવ આસમાને છે. એટલે વધતી જતી મોંઘવારીએ સામાન્ય જનતાની કમરતોડી નાખી છે. ત્યારે આજે સિંગતેલના ભાવમાં 60થી 70 રૂપિયાનો વધારો થયો છે. સિંગતેલનો અત્યાર સુધી સૌથી ઉંચો ભાવ નોંધાયો છે. સિંગતેલના ડબ્બાનો ભાવ રૂ.3000એ પહોંચ્યો છે. આ વચ્ચે એક રાહતના સમાચાર સામે આવી રહ્યા છે. સિંગતેલના ભાવમાં ટુંક સમયમાં ઘટાડો થઈ શકે છે.

સિંગતેલના ભાવ ઘટે તેવી સંભાવના
રાજકોટ નાફેડની બેઠકમાં સોમા(સૌરાષ્ટ્ર ઓઈલ મિલ એસોસિએશન)ના ચેરમેન કિશોર વીરડિયાએ કહ્યું છે કે, નાફેડની મગફળી ઓઇલ મિલરોને અપાય તો તેલના ભાવ ઘટી શકે છે. નવી મગફળીની 15 દિવસમાં આવક થશે તો ભાવમાં રાહત થશે. મહત્વનું છે કે, રાજકોટમાં હાલ સૌરાષ્ટ ઓઇલ મિલર અને નાફેડની બેઠક યોજાઇ છે. નાફેડ પાસેની 70 હજાર મેટ્રિક ટન મગફળીના વેચાણ મુદ્દે નિર્ણય લેવાશે. સીંગતેલના ડબ્બાના ભાવ હાલ રૂ.3 હજારની ઐતિહાસિક સપાટી પર છે.

સિંગતેલમાં જ બે દિવસમાં 60 રૂપિયાનો વધારો
સિંગતેલમાં જ બે દિવસમાં 60 રૂપિયાનો વધારો થયો છે. જેને લઇને એક ડબ્બાનો ભાવ ઐતિહાસિક સપાટી વટાવી ચૂક્યો છે. તેલના 15 લિટરના ડબ્બાનો ભાવ પહેલી વખત રૂ.3000ને પાર પહોંચ્યો છે. 15 દિવસમાં સીંગતેલના ભાવમાં રૂ.180નો વધારો થયો છે. સટ્ટા ખોરીના કારણે સીંગતેલના ભાવ આસમાને પહોંચ્યા છે.

જનતા પર મોંઘવારીનો માર વધી રહ્યો છે. સતત વધી રહેલ મોઘવારીથી માધ્યમવર્ગ સૌથી વધુ પરેશાન છે. દૂધ, ખાદ્યતેલ, રાંધણગેસ, શાકભાજી જેવી જીવન જરૂરિયાતની ચીજવસ્તુઓના ભાવ આસમાને પહોંચ્યા છે. ખાદ્યપદાર્થોના ભાવમાં વધારો થતા માધ્યમવર્ગની મુશ્કેલીમાં વધારો થઇ રહ્યો છે. ત્યારે છેલ્લા એક મહિનામાં દૂધના ભાવમાં પણ લિટરે 4 રૂપિયા જેવો વધારો થયો છે. તો રાંધણગેસનો ભાવ રૂ.1060થી લઈ રૂ.1072 પર પહોંચ્યો છે. મર્યાદિત આવકમાં બે છેડા કઈ રીતે ભેગા કરવા તે સવાલ છે.