BIG NEWS / ભારત સહિત 16 દેશોની યાત્રા પર પ્રતિબંધ: ફરી કોરોના વાયરસ ફેલાતા સાઉદી અરબનું ફરમાન

• કોરોનાના કેસો વધતા સાઉદી અરેબિયાનો મોટો નિર્ણય
• પોતાના નાગરિકો માટે 16 દેશોની યાત્રા પર પ્રતિબંધ મૂક્યો
• પ્રતિબંધ મૂકેલા દેશોમાં ભારત પણ સામેલ

સમગ્ર વિશ્વમાં વધતા જતા કોરોનાના કેસો વચ્ચે સાઉદી અરેબિયામાં પણ કોરોનાના કેસ ઝડપથી વધી રહ્યાં છે. ત્યારે કોરોનાના વધતા જતા સંક્રમણને જોતા સાઉદી અરેબિયાએ પોતાના નાગરિકો માટે 16 દેશોની યાત્રા પર પ્રતિબંધ લગાવી દીધો છે. જેમાં ભારતનો પણ સમાવેશ થાય છે.

દેશમાં મંકીપોક્સનો એક પણ કેસ મળ્યો નથી: આરોગ્ય મંત્રાલય

સાઉદી અરેબિયાના આરોગ્ય મંત્રાલયે લોકોને ખાતરી આપી છે કે, દેશમાં મંકીપોક્સનો એક પણ કેસ મળ્યો નથી. સ્વાસ્થ્ય મંત્રાલય દ્વારા કહેવામાં આવ્યું છે કે, દેશમાં મંકીપોક્સના કેસ શોધી કાઢવાની અને જો કેસ મળી આવે તો તે સંક્રમણ સામે લડવાની અમારી ક્ષમતા છે.

કોરોના વાયરસ ફેલાતા સાઉદી અરેબિયાએ પોતાના નાગરિકો માટે ભારત સહિત 16 દેશોની યાત્રા પર લગાવ્યો પ્રતિબંધ#Coronavirus #SaudiArabia #vtvcard pic.twitter.com/0rYZ5qASCt

— VTV Gujarati News and Beyond (@VtvGujarati) May 23, 2022

WHOએ અત્યાર સુધીમાં 11 દેશોમાં મંકીપોક્સના 80 કેસની પુષ્ટિ કરી

ડેપ્યુટી હેલ્થ મિનિસ્ટર અબ્દુલ્લા અસીરીએ કહ્યું કે, અત્યાર સુધી મનુષ્યો વચ્ચે મંકીપોક્સના સંક્રમણના કેસો ખૂબ જ મર્યાદિત છે અને આથી તેનાથી ફેલાતા પ્રકોપની સંભાવના ઓછી રહેલી છે. એટલે સુધી કે એવાં દેશોમાં પણ કે જ્યાં ખરેખર કેસ મળી આવ્યા છે. WHOએ અત્યાર સુધીમાં 11 દેશોમાં મંકીપોક્સના 80 કેસની પુષ્ટિ કરી છે. WHOએ કહ્યું કે, તે સંક્રમણ ફેલાવવાનું કારણ શોધવાનો પ્રયાસ કરી રહ્યું છે.

સાઉદી અરેબિયામાં ઝડપથી વધી રહ્યાં છે કોરોના કેસ

શનિવારે સાઉદી અરેબિયામાં કોરોનાના નવા 414 કેસ નોંધાયા છે. સ્વાસ્થ્ય મંત્રાલયના જણાવ્યાં અનુસાર, દેશમાં અત્યાર સુધીમાં કોરોનાના કુલ 7,62,575 કેસ નોંધાયા છે. એટલું જ નહીં, અત્યાર સુધી અહીં કોરોનાથી 9128 લોકોના મોત પણ નિપજ્યાં છે. મંત્રાલય તરફથી કહેવામાં આવ્યું કે, વર્તમાન કેસમાં 81 લોકોની હાલત ગંભીર છે. સાઉદી અરેબિયામાં છેલ્લાં 24 કલાકમાં 474 લોકો કોરોનાથી સાજા થયા છે. દેશમાં હજુ પણ 6448 એક્ટિવ કેસ છે.