સ્પોર્ટસ / 2023માં બાપુનો દબદબો : રવીન્દ્ર જાડેજાએ બનાવ્યો ઐતિહાસિક રેકૉર્ડ, સ્ટાર્ક અને કમિન્સ તો ક્યાંય આસપાસ પણ નથી

• ટીમ ઈન્ડિયાના ઓલરાઉન્ડર રવિન્દ્ર જાડેજા માટે વર્ષ 2023 બોલર તરીકે સારું રહ્યું
• રવિન્દ્ર જાડેજાએ આંતરરાષ્ટ્રીય ક્રિકેટના ત્રણેય ફોર્મેટમાં સૌથી વધુ વિકેટ લીધી
• રવિન્દ્ર જાડેજાએ વર્ષ 2023માં ત્રણેય ફોર્મેટમાં મળીને સૌથી વધુ 66 વિકેટ લીધી

Ravindra Jadeja News : ટીમ ઈન્ડિયા વર્ષ 2023માં ભલે ODI વર્લ્ડ કપ જીતવામાં સફળ ન રહી હોય, પરંતુ આ વર્ષ ટીમ ઈન્ડિયાના કેટલાક ખેલાડીઓ માટે ઘણું સારું રહ્યું છે. ખાસ કરીને ટીમ ઈન્ડિયાના સ્ટાર ઓલરાઉન્ડર રવિન્દ્ર જાડેજા માટે વર્ષ 2023 બોલર તરીકે ઘણું સારું રહ્યું છે. વાત જાણે એમ છે કે, આ વર્ષે રવિન્દ્ર જાડેજાએ આંતરરાષ્ટ્રીય ક્રિકેટના ત્રણેય ફોર્મેટમાં સૌથી વધુ વિકેટ લીધી હતી. આ મામલે રવિન્દ્ર જાડેજાએ ઓસ્ટ્રેલિયાના ફાસ્ટ બોલર મિચેલ સ્ટાર્ક અને પાકિસ્તાનના શાહીન શાહ આફ્રિદીને પાછળ છોડી દીધા છે.

જાડેજાએ વર્ષ 2023માં લીધી સૌથી વધુ વિકેટ  
વર્ષ 2023માં રવિન્દ્ર જાડેજાએ ટીમ ઈન્ડિયા માટે ત્રણેય ફોર્મેટમાં ક્રિકેટ રમી છે. રવિન્દ્ર જાડેજાએ વર્ષ 2023માં ત્રણેય ફોર્મેટમાં મળીને સૌથી વધુ 66 વિકેટ લીધી છે. ટીમ ઈન્ડિયાનો સ્પિન બોલર કુલદીપ યાદવ આ યાદીમાં બીજા સ્થાને છે. કુલદીપ યાદવે આ વર્ષે ક્રિકેટના ત્રણેય ફોર્મેટમાં 63 વિકેટ લીધી છે. આ યાદીમાં ઓસ્ટ્રેલિયાનો ઝડપી બોલર મિચેલ સ્ટાર્ક પણ 63 વિકેટ સાથે ત્રીજા સ્થાને છે. પાકિસ્તાનના ફાસ્ટ બોલર શાહીન શાહ આફ્રિદીનું નામ આ યાદીમાં 62 વિકેટ સાથે ચોથા સ્થાન પર છે. ટીમ ઈન્ડિયાના ફાસ્ટ બોલર મોહમ્મદ સિરાજનું નામ પાંચમા નંબર પર આવે છે. મોહમ્મદ સિરાજે વર્ષ 2023માં 60 વિકેટ પોતાના નામે કરી છે.

જાડેજા બીજી ટેસ્ટમાં રમશે ? 
ભારતીય ટીમ હાલમાં દક્ષિણ આફ્રિકા સાથે 2 મેચની ટેસ્ટ શ્રેણી રમી રહી છે. શ્રેણીની પ્રથમ મેચ હાર્યા બાદ ટીમ ઈન્ડિયા 0-1થી પાછળ રહી ગઈ છે. હવે શ્રેણીની બીજી અને છેલ્લી મેચ કેપટાઉનમાં રમાશે. આ મેચમાં રવિન્દ્ર જાડેજા રમે તેવી શક્યતા છે. રવિન્દ્ર જાડેજાને પ્રથમ ટેસ્ટ મેચમાં પ્લેઈંગ ઈલેવનમાં તક મળી ન હતી.