રાહત / 80 કરોડ લોકોને મોટી ખુશખબર આપવાની તૈયારીમાં સરકાર, 6 મહિના સુધી મળી શકે મફત અનાજ

• પીએમ ગરીબ કલ્યાણ અન્ન યોજના લંબાવવાની સરકારની તૈયારી
• 30 સપ્ટેમ્બરે યોજનાની મુદત પૂરી થઈ રહી છે
• તે પહેલા સરકારે યોજના લંબાવવાનો આપ્યો સંકેત 
• ખાદ્ય સચિવે કહ્યું- 30 સપ્ટેમ્બરથી આગળ વધારાનો નિર્ણય લેવાશે

પ્રધાનમંત્રી ગરીબ કલ્યાણ અન્ન યોજના એટલે કે પીએમજીકેએવાયના લાભાર્થીઓને ફરી ખુશખબર મળી શકે છે. કેન્દ્ર સરકારે વધુ ત્રણથી છ મહિના સુધી મફત રાશન આપવાની તૈયારી કરી રહી હોવાનું જાણવા મળ્યું છે. 

ગરીબ કલ્યાણ યોજના 30 સપ્ટેમ્બરથી આગળ વધારાનો નિર્ણય લેવાશે- ખાદ્ય સચિવ 
સરકાર ગરીબોને મફત અનાજ આપવા માટે પ્રધાનમંત્રી ગરીબ કલ્યાણ અન્ન યોજના (પીએમજીકેએવાય) ને 30 સપ્ટેમ્બરથી આગળ વધારવાની જાહેરાત ટૂંક સમયમાં કરી શકે છે. તાજેતરમાં કેન્દ્રીય ખાદ્ય સચિવ સુધાંશુ પાંડેએ કહ્યું હતું કે, પીએમજીકેએવાયને 30 સપ્ટેમ્બરથી આગળ વધારવાનો નિર્ણય ટૂંક સમયમાં લેવામાં આવશે તો બીજી તરફ સૂત્રોએ જણાવ્યું કે સરકાર આગામી 3-6 મહિના સુધી ગરીબોને 5 કિલો મફત અનાજ આપવાની યોજના બનાવી રહી છે. ઉલ્લેખનીય છે કે 30 સપ્ટેમ્બરે પીએમ ગરીબ કલ્યાણ યોજનાની મુદત પુરી થઈ રહી છે પરંતુ તે પહેલા સરકાર તેને લંબાવવાની જાહેરાત કરી શકે છે. 

3 મહિના યોજના લંબાવવાથી સરકારી તિજોરી પર પડશે 800 અબજનો બોજો 
પીએમ ગરીબ કલ્યાણ યોજના લંબાવવાને કારણે સરકારને 10 અબજ ડોલરનું વધુ નુકસાન થઈ શકે છે.  ભારતે એપ્રિલ 2020 થી અત્યાર સુધીમાં તેના મફત ભોજન કાર્યક્રમ 'પ્રધાનમંત્રી ગરીબ કલ્યાણ અન્ન યોજના' પર લગભગ 43 અબજ ડોલરનો ખર્ચ કર્યો છે. એક સરકારી અધિકારીના જણાવ્યા અનુસાર છ મહિનાના આ વધારાથી સરકારને વધારાના 800 અબજ રૂપિયા (10 અબજ ડોલર)નું નુકસાન થઈ શકે છે.

શું છે ગરીબ કલ્યાણ અન્ન યોજના 
પ્રધાનમંત્રી ગરીબ કલ્યાણ અન્ન યોજના માર્ચ 2020માં શરૂ કરવામાં આવી હતી. આ યોજના હેઠળ રાષ્ટ્રીય ખાદ્ય સુરક્ષા અધિનિયમ (એનએફએસએ)માં સામેલ લગભગ 80 કરોડ લાભાર્થીઓને દર મહિને વ્યક્તિ દીઠ પાંચ કિલો અનાજ વિના મૂલ્યે આપવામાં આવી રહ્યું છે.