- પત્નીની યાદમાં પતિની અનોખી યાત્રા
- 12 હજાર કિ.મી.ની પગપાળા યાત્રા
- ઉઘાડા પગે 12 જ્યોતિર્લિંગ-ચારધામ યાત્રા પૂર્ણ કરી
- પત્નીનું અવસાન થતા મોક્ષ માટે કરી યાત્રા
કોરોના વાયરસમાં કેટલાય લોકોએ પોતાના વ્યક્તિઓને ગુમાવ્યા હતા. જોકે હાલ માં જ એક એવો કિસ્સો સામે આવ્યો કે તેના વિશે જાણીને તમે પણ કહેશો કે, આ પ્રેમ છે સાહેબ. બલિદાન, પ્રેમ, મોહ માયાનો ત્યાગ આવી વાતોને ફિલ્મી વાતો ગણવામાં આવે છે. આજના સમયમાં કોઈ વ્યક્તિ કોઈના માટે પોતાનું સર્વસ્વ છોડી દે એવી વાત સાંભળીએ તો નવાઈ પામી જવાય. બોટાદના ગઢડા તાલુકાના ઢસા ગામના એક પતિએ આજના યુવાનોને પ્રેમ શું કહેવાય તેનું સર્વોત્તમ ઉદાહરણ પૂરું પાડ્યું છે.
શું છે સમગ્ર મામલો ?
બોટાદના ગઢડા તાલુકાના ઢસા ગામના રણજીતભાઈ ગોલેતરે પોતાની પ્રેમીકા પત્નિના વિયોગમાં શરીર પર માત્ર એક ધોતી પહેરીને ઉઘાડા પગે 12 જ્યોર્તિલિંગ અને ચારધામની યાત્રા કરી છે. આ તરફ યાત્રા પૂર્ણ કરી તેઓ પરત ફરતા ઢસા ગામ દ્વારા રણજીતભાઈને હાથીની અંબાડી પર બેસાડી ઘોડા-ઊંટ અને ઢોલ-નગારા, DJ સાથે ભવ્ય શોભાયાત્રા યોજી સન્માન કર્યું હતું.
અઢી અક્ષરનો શબ્દ એટલે પ્રેમ. પ્રેમ માટે ઈતિહાસ રચાયો છે, પ્રેમ માટે કેટલાય લોકોએ બલીદાન આપ્યા છે, પ્રેમને પામવા કેટલાય લોકો સાહસ કરતા હોય છે, પ્રેમને અમર કરવા પ્રેમીઓ પોતાની પ્રેમિકાની યાદ માટે કોઈ તાજ મહેલ બનાવી પ્રેમ ને અમર કરે છે. પરંતુ ગઢડા તાલુકાના ઢસા ગામના યુવાને પોતાની પ્રેમિકા પત્નિના નિધન બાદ તેના મોક્ષ માટે શરીર પર ફક્ત એક ધોતી પહેરીને ઉઘાડા પગે 12 જ્યોર્તિલિંગ અને ચાર ધામની યાત્રા કરી છે.
ટ્રાવેલ્સના વ્યવસાય સાથે સંકળાયેલા હતા રણજીતભાઈ ગોલેતર
બોટાદ જિલ્લાના ગઢડા તાલુકાના ઢસા ગામે રહેતા રણજીતભાઈ ગોલેતર ટ્રાવેલ્સના વ્યવસાય સાથે સંકળાયેલા હતા. આ તરફ વર્ષ 2017માં ઢસા ગામે ખાનગી શાળામાં નોકરી કરતા જિગનાસાબેન સાથે તેમની આંખ મળી અને પ્રેમસંબંધ બંધાયો. જે બાદમાં બંનેએ પ્રેમ લગ્ન કર્યા તે પછી 2022માં ગુજરાત-દેશ સહિત દુનિયામાં કોરોના વાયરસનો કહેર હતો. આ દરમિયાન બંને પતિ-પત્નિનો કોરોના રિપોર્ટ પોઝીટીવ આવ્યો.
કોરોના આવ્યો અને પત્નિનો સાથ છૂટ્યો
કોરોના વાયરસ સામેની જંગમાં રણજીતભાઈ તો જીતી ગયા, પરંતુ તેમની પત્નિ જિગનાસાબેન નિધન થયું. જે બાદમાં પત્નિના નિધનથી ભાંગી પડેલ રણજીતભાઈ નેઆધાત લાગ્યો અને તેમણે ચાર ધામ યાત્રા કરવાનો વિચાર આવ્યો. જે બાદમાં 19 એપ્રિલ 2022ના રોજ તેઓ ફક્ત એક ધોતી પહેરીને ઉઘાડા પગે 12 જ્યોર્તિલિંગ અને ચારધામની યાત્રાએ નીકળી ગયા.
1 વર્ષ અને 12 દિવસમાં પૂર્ણ કરી 12 જ્યોર્તિલિંગ અને ચારધામની યાત્રા
રણજીતભાઈએ એક વર્ષ અને 12 દિવસે 12 જ્યોર્તિલિંગ અને ચારધામની યાત્રા પૂર્ણ કરી હતી. જે બાદમાં તેઓ પોતાના માદરે વતન પરત ફર્યા હતા. જ્યાં તેમણે ગઢડા BAPS મંદિરે સંતોના દર્શન અને આશીર્વાદ લીધા હતા અને ત્યાર બાદ પોતાના ગામ ઢસા જવા રવાના થયા હતા. આ દરમિયાન 100 જેટલી કારનો કાફલા ગઢડાથી સાથે નિકળ્યા હતા. ગઢડામા જીનનાકા, સામાકાઠે તેમજ રસ્તામાં આવતા રણીયાળા, ગુદાળા, માલપરા, પાટણા ગામોમાં ઠેર ઠેર લોકોએ ભવ્ય સ્વાગત કર્યું હતું.
રણજીતભાઈને હાથીની અંબાડી પર બેસાડ્યા
રણજીતભાઈ પોતાના વતન ઢસા પહોંચતા ગામ લોકોએ રણજીતભાઈને હાથીની અંબાડી પર બેસાડી ઘોડા, ઊંટ, DJના તાલે ભવ્ય શોભાયાત્રા યોજી સ્વાગત કર્યુ હતું,. રણજીતભાઈ ગોલેતરે પણ ખુશી વ્યક્ત કરી હતી અને હવે સમાજ સેવા કરવાનું વિચાર્યું છે તેમ કહ્યું હતું. મહત્વનું છે કે, રણજીતભાઈએ યાત્રામાં એક પગે તપ, કેદારનાથમાં એક મહિનો બરફ વચ્ચે રહીને શિવપુરાણનું પઠન કરેલ જેથી આ યાત્રા અલૌકિક છે.
