માંગણી / 'ભાજપ-કોંગ્રેસ 5-5 ટિકિટ આપે' અમદાવાદ ખાતે રબારી સમાજના સંમેલનમાં આગેવાનોએ પુરાવ્યો સૂર

• વિધાનસભાની ચૂંટણી પહેલા સામાજિક સંગઠનો દ્વારા સંમેલન 
• રબારી સમાજ દ્વારા અમદાવાદ ખાતે યોજાયું સંમેલન
• ભાજપ-કોંગ્રેસ પાસે 5 -5 ટિકિટ આપવા માંગ

ગુજરાત વિધાનસભાની ચૂંટણી જાહેર થતા જ ભાજપ- કોંગ્રેસ દ્વારા ઉમેદવારોની પસંદગી પ્રક્રિયા ચાલી રહી છે. બીજી બાજુ ગુજરાત વિધાનસભાની ચૂંટણી પહેલા સામાજીક સંગઠનો દ્વારા સંમેલનનો દૌર જામ્યો છે ત્યારે રબારી સમાજ દ્વારા અમદાવાદ ખાતે સંમેલનનું આયોજન કરવામાં આવ્યું હતું. જેમાં ટિકિટની માંગ કરવામાં આવી હતી.

રબારી સમાજની ૭ ટકા વસ્તિ પ્રમાણે ટીકીટ આપવા માંગ 
વિધાનસભાની ચૂંટણીમાં યોગ્ય નેતૃત્વ માટેની માંગને લઇને સંમેલન યોજાયું હતું. જેમાં મોટી સંખ્યામાં રબારી સમાજના આગેવાનો ઉપસ્થિત રહ્યા હતા. આ દરમિયાન રાજ્યમાં રબારી સમાજની ૭ ટકા વસ્તિ પ્રમાણે ટીકીટ આપવા આગેવાનોએ માંગ ઉઠાવી હતી. જેમાં ઉપસ્થિત તમામ લોકો એકસૂર થયા હતા અને ભાજપ કોંગ્રેસ પાસેથી ૫-૫ ટીકીટ આપવા માંગ ઉઠાવી હતી. ઉપરાંત અમદાવાદની બેઠક પરથી પણ સમાજના નેતાને ટીકીટ આપવા રબારી સમાજે માંગણી કરી હતી.

પ્રજાપતિ સમાજે પણ ઉઠાવી માંગ
ઉલ્લેખનીય છે કે આજે જ ગાંધીનગરમાં પ્રજાપતિ સમાજની બેઠક યોજાઇ હતી આ વેળાએ સમાજના આગેવાન નેતાઓએ પોતાના સમાજના પ્રતિનિધિને ટિકિટ મળે તેવી માગ ઉઠાવી હતી. વધુમાં ભાજપ પાસે 10 ટિકિટની માગ કરવામાં આવી છે. આ ઉપરાંત અગાઉ પણ અનેક સમાજ દ્વારા પોતાના સમાજને ટિકિટ ફાળવવાની માંગ કરવામાં આવી હતી. જેથી આ વખતે ભાજપ માટે ઉમેદવારો પસંદ કરવા કપરા ચઢાણ સાબિત થાય તો નવાઇ નહિ. રાજ્યમાં ૪૨ બેઠકો પ્રજાપતિ સમાજ પ્રભાવિત અને ૩૦ બેઠકો પર સમાજ નિર્ણાયક ભૂમિકામાં છે.  આથી ભાજપ પાસેથી ૧૦ ટીકીટોની માંગણી કરવામાં આવી છે.  આ વખતે ટીકીટ નહી આપે તો સમાજ આક્રોશ સાથે વિરોધ નોંધાવશે. તેવી અંતમાં ચીમકી ઉચ્ચારી હતી.