ભાવનગર / સુરકા ગામે સગીરાના હેરાનગતિથી આપઘાતનો મામલો, પોલીસે 3 આરોપીને દબોચ્યા, કેસ રૂવાળા ઊભા કરી દે તેવો

• સિહોર તાલુકાના મોટા સુરકા ગામે સગીરાની આત્મહત્યાનો મામલો
• ચકચારી પ્રકરણમાં 3 આરોપીની ધરપકડ 
• દસ દિવસથી વોન્ટેડ ફરાર આરોપીઓ આખરે પોલીસના સકંજામાં

ભાવનગરના સિહોર તાલુકામાં આવેલ મોટા સુરકા ગામે સગીરાએ આત્મહત્યા કરી લેતા ચકચાર મચી જવા પામી હતી.જેની તપાસમાં સુરકા ગામના આવારા તત્વોએ સગીરાને શારીરિક સંબંધ બાંધવા તેમજ માનસિક ત્રાસ આપતા હોવાથી દસ દિવસ પહેલા સગીરાએ પોતાના ઘરમાં આત્મહત્યા કરી લીધી હતી.ત્યારબાદ પોલીસે તપાસમાં ચક્રો ગતિમાન કરી દસ દિવસથી વોન્ટેડ ફરાર આરોપીઓને દબોચી લીધા છે. સગીરાને મરવા મજબૂર કરનાર વિપુલ જોટાણા, હર્ષિલ જોટાણા અને મહેશ જોટાણાની પોલીસે ધરપકડ કરી કાર્યવાહી આગળ ધપાવી છે.

આરોપીઓની તાત્કાલિક ધરપકડ કરવા IGએ આદેશ કર્યા હતા

મહત્વનું છે કે ધોરણ 12 માં અભ્યાસ કરતી મૃતક સગીરાને આરોપીઓ છેલ્લા ચારથી છ મહિના સુધી સતત પરેશાન કરતા હતા. જેને પગલે સગીરાએ કંટાળી જઈ મોત વ્હાલું કરી લીધું હતું.
 ત્યારબાદ દસ દિવસથી પરિવાર ન્યાયની માંગ કરી રહ્યો હતો જેને આખરે ન્યાય મળ્યો છે. લોકોના  રોષને પગલે પોલીસે તાત્કાલિક 3 આરોપીઓને ઝડપી લીધા છે. જો કે આ મામલે ભાવનગર રેન્જ IG ગૌતમ પરમાર સુરકા ગામેં દોડી ગયા હતા અને ગ્રામજનો સાથે બેઠક કરીને IG ગૌતમ પરમારે આશ્વાસન આપ્યુ હતુ. ત્યારબાદ આરોપીઓની તાત્કાલિક ધરપકડ કરવા IGએ આદેશ કર્યા હતા.  જેના પરિણામેં પોલીસે આરોપીઓને દબોચી લીધા છે.

શુ હતી સમગ્ર ઘટના ?

ભવનગરના સિહોર તાલુકાના સુરકા ગામની સગીરા સિહોરમાં અભ્યાસ માટે અપડાઉન કરતી હતી. આ દરમિયાન ગામના જ માથાભારે શખ્સોએ તેને પરેશાન કરતા અંતે તેને મોત વ્હાલું કરી લીધું હતું. ગામના જ કેટલાક યુવકો તેમને પજવણી કરતા હતા અને તેનાથી આ વાત સહન નહીં થતા તેને 10 ડિસેમ્બરના રોજ ઝેરી દવા પી આત્મહત્યા કરી લીધી હતી. પરંતુ બદનામીના ડરે   પરિવારે કોઈને જાણ કરી ન હતી. છતાં પણ મૃતક યુવતીની બહેન પાણી દ્વારા આ કિસ્સો પ્રકાશમાં આવ્યો હતો. ત્યારબાદ સુરતના પાટીદાર આગેવાનોએ હર્ષ સંઘવીને રજુઆત કરી હતી. જેને લઈને ઉચ્ચકક્ષાએથી આદેશ છૂટ્યા હતા.