- મહારાષ્ટ્ર કેબિનેટમાં સામેલ કરાયેલા નવા ધારાસભ્યોને ખાતાની ફાળવણી
- અજીત પવારને સૌથી મહત્વનું નાણા સોંપાયું
- શિવસેના અને ભાજપ પાર્ટીના ગઠબંધન બાદ નવા સભ્યોને ખાતા સોંપાયા
મહારાષ્ટ્રના રાજકારણમાં ભારે ઉથલપાથલ બાદ રાજકીય તણાવ જેવો માહોલ સર્જાયો હતો. બાદમાં હવે મહારાષ્ટ્ર રાજ્યના કેબિનેટમાં સામેલ કરાયેલા નવા એનસીપીના ધારાસભ્યોને ખાતા ફાળવી દેવામાં આવ્યા છે. જેમાં એનસીપીના અજીત પવારને સૌથી મહત્વનું ગણાતું નાણા અને આયોજનનું ખાતું સોંપવામાં આવ્યું છે. બીજી બાજુ છગન ભુજબળને ખાધ્ય નાગરિક પુરવઠા અને ગ્રાહક સુરક્ષા વિભાગની જવાબદારી સોંપાઈ છે. ઉપરાંત ડ્રગ એન્ડ એડમિનિસ્ટ્રેશનની જવાબદારી ધરમરાવબા આત્રામને આપવામાં આવી છે. મહત્વનું છે કે શરદ પવારની આગેવાની હેઠળની એનસીપીનું વિસર્જન થયા બાદ સત્તાધારી શિવસેના અને ભાજપ પાર્ટીના ગઠબંધન બાદ નવા સભ્યોને ખાતા સોંપાયા છે.
દેવેન્દ્ર ફડણવિસ પાસે ગૃહ સિંચાઈ અને ઉર્જા વિભાગ
વધુમાં પ્રથમ મહિલા મંત્રી તેવા અદિતિ તટકરેને મહિલા અને બાળ વિકાસ મંત્રાલયની જવાબદારી સોંપવામાં આવી છે. તો અબ્દુલ સત્તારને અલ્પસંખ્યાક મંત્રી બનાવ્યા છે. સાથે સાથે હસન મુશ્રીફને તબીબ અને શિક્ષણ મંત્રાલય, તો કૃષિ મંત્રાલયની જવાબદારી ધનજય મુન્ડેના શિરે મૂકવામાં આવી છે. બીજી બાજુ શિવસેના એકનાથ સિંધે જૂથના અબ્દુલ સતાર અને સંજય રાઠોડના કૃષિ અને એફડીઆઈ વિભાગો એનસીપી જૂથને આપી દેવામાં આવ્યા છે. સંજય રાઠોડને જળ સંરક્ષણ વિભાગની જવાબદારી અને દેવેન્દ્ર ફડણવિસ પાસે ગૃહ સિંચાઈ અને ઉર્જા વિભાગ અપાયું છે.
રિસામણા મનામણાં બાદ અંતે જાહેરાત
વધુમાં દિલીપ પાટીલ સહકારી વિભાગ તથા અનિલ પાટીલ રાહત અને પુનર્વસન તથા આપત્તિ વ્યવસ્થાપનની જવાબદારી સંભાળી છે. તો રમત ગમત અને યુવા કલ્યાણ તથા બંદર વિભાગની જવાબદારી સંજય બંસોડને અપાઇ છે. કહેવામાં આવી રહ્યું છે કે નવા ખાતાની ફાળવણી બાદ આંતરિક ઝઘડો શરૂ થયો હતો. આથી અજીત પવાર અને એકનાથ શિંદે જૂથની મડાગાંઠને કારણે કેબિનેટ વિસ્તરણમાં વિલંબ થયો હતો.જોકે રિસામણા મનામણાં બાદ અંતે જાહેરાત કરાઈ છે.
