નવા ચૂંટણી કમિશ્નરોની નિમણૂક માટેના નામોને અંતિમ રૂપ આપવા માટે વડા પ્રધાનના નેતૃત્વ હેઠળની ઉચ્ચ સત્તાવાળી સમિતિ 15 માર્ચે મળશે. ગયા મહિને ચૂંટણી કમિશનર અનુપ ચંદ્ર પાંડેની નિવૃત્તિ અને અરુણ ગોયલના અચાનક રાજીનામાને કારણે ચૂંટણી કમિશ્નરની બે જગ્યાઓ ખાલી પડી છે. વડાપ્રધાનની અધ્યક્ષતાવાળી પસંદગી સમિતિમાં કેન્દ્રીય મંત્રી અને લોકસભામાં કોંગ્રેસના નેતા અધીર રંજન ચૌધરીનો સમાવેશ થશે.
ચૂંટણી કમિશ્નરની પસંદગીનો મુદ્દો
પસંદગી સમિતિ 15 માર્ચે બેઠક કરશે અને ચૂંટણી કમિશ્નર તરીકે નિમણૂક માટે નામોને અંતિમ રૂપ આપશે. આ પછી રાષ્ટ્રપતિ દ્વારા ચૂંટણી કમિશનરોની નિમણૂક કરવામાં આવશે. ચૂંટણી પંચ દ્વારા લોકસભા ચૂંટણીના કાર્યક્રમની સંભવિત જાહેરાતના થોડા દિવસો પહેલા અરુણ ગોયલે શનિવારે ચૂંટણી કમિશ્નરના પદ પરથી રાજીનામું આપી દીધું હતું. રાષ્ટ્રપતિ દ્રૌપદી મુર્મુએ શનિવારે તેમનું રાજીનામું સ્વીકારી લીધું હતું અને કાયદા મંત્રાલયે એક સૂચના જારી કરીને તેની જાહેરાત કરી હતી.
બે ચૂંટણી કમિશ્નરની નિમણૂક અંગે નિર્ણય લેવામાં આવશે
આ સાથે મુખ્ય ચૂંટણી કમિશ્નર રાજીવ કુમાર ચૂંટણી પંચમાં એકમાત્ર સભ્ય તરીકે બાકી છે. કાયદા પ્રધાન અર્જુન રામ મેઘવાલની આગેવાની હેઠળની સર્ચ કમિટી પહેલા બંને પદ માટે પાંચ-પાંચ નામોની બે અલગ-અલગ પેનલ તૈયાર કરશે. આ સમિતિમાં ગૃહ સચિવ અને ડિપાર્ટમેન્ટ ઓફ પર્સોનેલ એન્ડ ટ્રેનિંગ (DOPT)ના સચિવ સામેલ હશે. બીજી તરફ, અરુણ ગોયલના રાજીનામા પાછળના કારણો સંબંધિત સવાલ પર સૂત્રોએ જણાવ્યું કે, તેમણે અંગત કારણોસર રાજીનામું આપ્યું હોઈ શકે છે.
વધુ વાંચોઃ લોકસભા ચૂંટણી પૂર્વે INDIA ગઠબંધનને વધુ એક ઝટકો, TMC બાદ હવે આ પાર્ટી એકલી ચૂંટણી લડશે
અરુણ ગોયલ અને રાજીવ કુમાર વચ્ચેના મતભેદોની અટકળોને ફગાવી દેતા, સૂત્રોએ જણાવ્યું હતું કે આંતરિક સંદેશાવ્યવહાર અને નિર્ણયોના રેકોર્ડ્સ દર્શાવે છે કે ગોયલના પક્ષમાંથી કોઈ મતભેદ નોંધવામાં આવ્યો નથી. શુક્રવારે સવારે રાજીનામું આપનાર અરુણ ગોયલે ચૂંટણી ફરજ માટે સમગ્ર ભારતમાં કેન્દ્રીય દળોની તૈનાતી અને હિલચાલ સુનિશ્ચિત કરવા માટે ચૂંટણી પંચ અને ગૃહ મંત્રાલય અને રેલવેના ઉચ્ચ અધિકારીઓ વચ્ચેની નિર્ણાયક બેઠક છોડી દીધી હતી.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
