કરૂણાંતિકા / સુરતના સિટીલાઈટ વિસ્તારમાં 21 વર્ષીય યુવકનું મોત, રીલ્સ બનાવાની મોજમાં યુવકને જીવ ગુમાવવો પડ્યો

• સુરતના સિટીલાઈટ વિસ્તારમાં યુવકનું મોત 
• રીલ્સ બનાવવા જતા યુવકનું મોત થયું 
• હોસ્પિટલ પહોચતા તબીબોએ યુવકને મૃત જાહેર કર્યો 

આજના યુવાનોમાં શોર્ટ વીડિયો બનાવાનો ક્રેઝ હવે દિવસેને દિવસે વધી રહ્યો છે. તેમા પણ હવે ઈન્સ્ટાગ્રામ પર રિલ્સ મોટા ભાગના લોકો બનાવતા થઈ ગયા છે. ખાસ કરીને કોલેજમાં અભ્યાસ કરતા યવુક અને યુવતીઓ રિલ્સ વધારે બનાવતા હોય છે. પરંતુ આ રિલ્સના ચક્કરમાં ક્યારેંક લેવાના દેવા થઈ જાય છે અને જીવ પણ જોખમમાં મુકાઈ જતો હોય છે. 

ઈન્સ્ટાગ્રામ પર યુવક રીલ્સ બનાવતો હતો 

સુરતના સિટીલાઈટ વિસ્તારમાં કઈક એવોજ બનાવ સામે આવ્યો છે. જેમા એક યુવક ઈન્સ્ટાગ્રામ પર રીલ્સ બનાવી રહ્યો હતો તે સમયે અચાનક કઈક એવું થયું કે તેનું મોત નિપજ્યું છે. મૃતક યુવકનું નામ પ્રથમ વાધવા હોવાનું સામે આવ્યું છે અને તેની ઉંમર 21 વર્ષની હતી. સુરતના સિટીલાઈટ વિસ્તારની આ ઘટના છે. જ્યા યુવકનું કરૂણ મોત થયું છે.

સિટીલાઈટ વિસ્તારનો બનાવ 

સિટીલાઈટ વિસ્તારમાં આવેલ કેનાલ રોડ પર વીડિયો બનાવતી વખતે યુવક જમીન પર ઢળી પડ્યો જેથી તે યુવકને તાત્કાલિક તેના મિત્રોએ સારવાર અર્થે હોસ્પિટલમાં ખસેડ્યો હતો. જોકે સારવાર અર્થે યુવકને જેવો હોસ્પિટલ પહોચાડવામાં આવ્યો કે ત્યા હોસ્પિટલમાં હાજર તબીબોએ યુવકને મૃત જાહેર કર્યો છે. 

પીએમ રિપોર્ટમાં મોતનું કારણ જાણી શકાશે

ઉલ્લેખનીય છે કે યુવકના મોતને કારણે તેના પરિવાર પર આભ તૂટી પડ્યું છે. તેનું મોત કેવી રીતે થયું તેનું સાચુ કારણ પીએમ રિપોર્ટ પછીજ સામે આવી શકશે. જોકે અગાઉ પણ સુરતમાં રીલ્સ બનાવાના ચક્કરમાં એક યુવકનું મોત થયું હતું અને આવોજ બનાવ ફરીથી બન્યો છે. જેના કારણે શહેરમાં ચકચાર મચી જવા પામી છે.