અકસ્માત / 3 યુવાનો કાળનો કોળિયો બની ગયા, ગઢડામાં ડમ્પરે બાઈક અડફેટે લેતા 2ના મોત, જેતપુરમાં એક યુવકને કારે ઉલાળ્યો

• બોટાદ જિલ્લાના ગઢડાના ઢસા ગામ પાસે ગમખ્વાર અકસ્માત
• ખોડિયાર મંદિર નજીક અકસ્માતમાં 2ના મોત
• જેતપુરના વાડાસડા ગામે અકસ્માતમાં યુવાનનું મોત

બોટાદ જિલ્લાના ગઢડાના ઢસા ગામનો માર્ગ વધુ એક વખત રાકતરંજીત બન્યો છે. જેમાં ખોડિયાર મંદિર નજીક ડમ્પર અને બાઇક વચ્ચે સર્જાયેલા ગમખ્વાર અકસ્માતમાં 2 યુવાનના કમકમાટીભર્યા મોત નિપજયા હોવાનું સામે આવત્તા પંથકમાં ગમગીની છવાઈ છે. બેફામ સ્પીડે આવતા ડમ્પર ચાલકે સ્ટેરિંગ પરનો કાબૂ ગુમાવી દેતા ડમ્પરે બાઈકને અડફેટે લીધું હતું. જેમાં બાઈક સવાર અનિલ પરમાર અને સુરેશ ઝાપડીયા નામના યુવાનના બનેં યુવાનના મોત નિપજયા હતા. આ મામલે જાણ થતા સ્થાનિક પોલીસ કાફલો ઘટનાસ્થળે દોડી ગયો હતો. જ્યા મૃતદેહને કબ્જે કરી પી.એમ અર્થે ગઢડા હોસ્પિટલ ખાતે ખસેડવા કાર્યવાહી હાથ ધરી હતી.

જેતપુરના વાડાસડા ગામેં કાર અને બાઇક વચ્ચે અકસ્માત 

અકસ્માતની વધુ એક ઘટના જેતપુરના વાડાસડા ગામેં સામે આવી હતી. કાર અને બાઇક વચ્ચે અકસ્માત સર્જાયો. જેમાં બાઇક ચાલક યુવાનનું ઘટનાસ્થળે જ કરુણ મોત નીપજ્યું હતું. આ ઘટનાની જાણ થતા સ્થાનિક પોલીસ કાફલો ઘટનાસ્થળે દોડી ગયો હતો. ઇજાગ્રસ્ત થયેલ લોકોને સારવાર અર્થે ખસેડવામાં આવ્યા હતા. બીજી બાજુ યુવાનને કાળ આંબી જતા જેતપુર તાલુકા પોલીસે મૃતદેહનો કબજો સંભાળી કાર્યવાહી આગળ ધપાવી હતી.પોલીસે મૃતદેહને પીએમ અર્થે સરકારી હોસ્પિટલ ખાતે ખસેડી અકસ્માતે મોતનો ગુનો નોંધી તપાસ તેજ બનાવી છે.

આ ઉપરાંત અકસ્માતની વધુ એક ઘટનામાં રાજકોટના કુવાડવા ગામનો જયેશ ઉર્ફે ચીકી સવજીભાઇ ગોહેલ (ઉં.વ.10) પોતાના ઘર પાસેથી પસાર થઈ રહ્યો હતો. આ વેળાએ જીજે.03.એચઆર.5584 નંબરની વેગનઆર કારના ચાલકે અડફેટે લેતા જયેશને ગંભીર ઇજા થવા પામી હતી. જ્યા માથા તથા શરીરે ગંભીર ઇજા થતા સારવાર માટે ખસેડવામાં આવ્યો હતો. જ્યા તેનું મોત નીપજ્યું હોવાનું સામે આવ્યું હતું.