World Health Day 2023 / આરોગ્ય જીવનનું સાચું સુખ: દર વર્ષ કેમ મનાવવામાં આવે છે વર્લ્ડ હેલ્થ ડે, જાણો તેનું મહત્વ અને ઈતિહાસ

• WHO તેની 75મી વર્ષગાંઠની ઉજવણી કરી રહ્યું છે
• 1950 માં પહેલી વખત 7 મી એપ્રિલના રોજ વિશ્વભરમાં વિશ્વ આરોગ્ય દિવસની ઉજવણી કરવામાં આવી હતી
• આ વર્ષે વિશ્વ આરોગ્ય દિવસની થીમ ‘હેલ્થ ફોર ઓલ’ રાખવામાં આવી છે

World Health Day 2023: દર વર્ષે WHO દ્વારા સમગ્ર વિશ્વમાં 7 એપ્રિલના રોજ વિશ્વ આરોગ્ય દિવસ(વર્લ્ડ હેલ્થ ડે) ઉજવવામાં આવે છે. વિશ્વ આરોગ્ય સંસ્થા આ દિવસનું આયોજન લોકોમાં આરોગ્ય સંબંધિત મુદ્દાઓ વિશે જાગૃતિ ફેલાવવા અને ચિકિત્સા ક્ષેત્રમાં થઈ રહેલા રિસર્ચ તથા નવી દવાઓ વિશે લોકોને જાણકારી આપવાના ઉદ્દેશ્ય સાથે કરે છે.

વર્લ્ડ હેલ્થ ડે એટલે કે વિશ્વ આરોગ્ય દિવસની શરૂઆત WHO ના પાયો આ દિવસે મૂકવામાં આવી હતી. દર વર્ષે આ દિવસ માટે એક થીમ નક્કી કરવામાં આવે છે અને તેના આધારે આ દિવસે યોજાતા કાર્યક્રમોનું આયોજન કરવામાં આવે છે. તો આવો જાણીએ આ દિવસનો ઈતિહાસ અને તેની ઉજવણીનો હેતુ.

વર્લ્ડ હેલ્થ ડેનો ઇતિહાસ અને મહત્વ
સ્વાસ્થ્યને પ્રોત્સાહન આપવા, નબળા લોકોની સેવા કરવા અને વિશ્વને સુરક્ષિત રાખવાના હેતુ સાથે વર્ષ 1948માં વિશ્વના તમામ દેશોએ સાથે મળીને WHOનો પાયો મૂક્યો હતો. જેથી દરેક વ્યક્તિ સ્વસ્થ રહી શકે. આ દિવસે WHOની સ્થાપના દિવસ તરીકે વિશ્વ આરોગ્ય દિવસની શરૂઆત કરવામાં આવી હતી. આના બે વર્ષ પછી એટલે કે 1950 માં પહેલી વખત 7 મી એપ્રિલના રોજ વિશ્વભરમાં વિશ્વ આરોગ્ય દિવસની ઉજવણી કરવામાં આવી હતી, જે ઉજવણી આજે પણ યથાવત છે. 

વર્લ્ડ હેલ્થ ડે 2023 થીમ
WHO એટલે કે વિશ્વ આરોગ્ય સંસ્થા દર વર્ષે વર્લ્ડ હેલ્થ ડેની થીમ નક્કી કરે છે અને થીમના આધારે આ દિવસ ઉજવવામાં આવે છે. આ વર્ષે વિશ્વ આરોગ્ય દિવસની થીમ ‘હેલ્થ ફોર ઓલ’ રાખવામાં આવી છે. જે એ વિચારને રજૂ કરે છે કે આરોગ્ય એ મૂળભૂત માનવનો અધિકાર છે. જ્યારે પણ કોઈને સ્વાસ્થ્ય સંબંધી કોઈ મદદની જરૂર હોય, ત્યારે તેણે કોઈપણ આર્થિક મુશ્કેલી વિના તે મળવી જોઈએ.

WHO ની 75મી વર્ષગાંઠ
આ વર્ષે WHO તેની 75મી વર્ષગાંઠની ઉજવણી કરી રહ્યું છે. આ દિવસને વિશેષ બનાવવા માટે WHO જાહેર આરોગ્યની સફળતાઓનું પણ મૂલ્યાંકન કરશે જેણે છેલ્લા સાત દાયકા દરમિયાન જીવનની ગુણવત્તામાં સુધારો કર્યો છે.

WHOના અનુસાર આ રીતે છે વિશ્વની આરોગ્યની સ્થિતિ
1. WHO મુજબ બે અબજ લોકો સ્વાસ્થ્ય સુવિધાઓથી વંચિત રહી જાય છે. તેનું કારણ છે કે તેમની પાસે સ્વાસ્થ્ય પર ખર્ચ કરવા માટે પૈસા નથી.
2. વિશ્વભરમાં લગભગ 930 મિલિયન લોકોએ તેમના ઘરના બજેટના 10 ટકા અથવા તેનાથી વધુ સ્વાસ્થ્ય પર ખર્ચ કરવો પડે છે. જેના કારણે તેમની આર્થિક સ્થિતિ ખરાબ થઈ રહી છે.
3. અત્યાર સુધી વિશ્વની 30 ટકા વસ્તી આવશ્યક આરોગ્ય સેવાઓ સુધી પણ પહોંચી શકી નથી.

 Disclaimer: અહીં આપેલી માહિતી માત્ર અનુમાન અને માહિતી પર આધારિત છે. આથી અત્રે અહીં ઉલ્લેખ કરવો જરૂરી છે કે VTV ગુજરાતી આવી કોઈ પણ પ્રકારની માહિતીની પુષ્ટિ કરતું નથી.