T-20 / કાર્તિક પહેલાં અક્ષર શા માટે? આ છે ભારતની હારનાં મુખ્ય પાંચ કારણ

• ભારતીય ટીમનું ટી-20 મેચમાં કંગાળ પ્રદર્શન 
• ટીમના 100 રન પહેલા અડધી ટીમ પેવેલિયનમાં 
• ટોપના બોલરોનું પણ રહ્યું ખરાબ પ્રદર્શન

કોની ભૂલથી હાર્યા મેચ 
દક્ષિણ આફ્રિકા સામે બીજી ટી-20 મેચમાં ગઈકાલે ભારતે હારનો સામનો કરવો પડ્યો. મહેમાન ટીમે એક સમયે 11 ઓવરમાં 100 રન બનાવવા હતા. તેના ટોચના બેટ્સમેન આઉટ થઈ ચૂક્યા હતા, આમ છતાં દ. આફ્રિકાની ટીમે 10 બોલ બાકી હતા ત્યારે મેચ પોતાના નામે કરી લીધી. હવે સવાલ એ ઊઠે છે કે ભારતના પરાજયમાં ભૂલ કોની હતી? ટીમ ઇન્ડિયાની ભૂલ ક્યાં થઈ? આજે અહીં હારના મુખ્ય પાંચ કારણ પર એક નજર કરી.

1. સારી શરૂઆતનો ફાયદો ઉઠાવી ના શક્યા
ટીમ ઇન્ડિયાએ ભલે પ્રથમ ઓવરમાં જ ઋતુરાજ ગાયકવાડની વિકેટ ગુમાવી દીધી હોય, આમ છતાં ઈશાન કિશન 34 (21 બોલ) અને શ્રેયસ ઐયર 40 (35 બોલ)એ ટીમને સારી શરૂઆત અપાવતા સ્કોર 50 રનની નજીક પહોંચાડી દીધો હતો. અહીં આગળ 100 રનના સ્કોર સુધી પહોંચતાં પહોંચતાં ભારતની અડધી ટીમ પેવેલિયનમાં પાછી ફરી ચૂકી હતી.

2. મધ્યક્રમે નિરાશ કર્યા
ગઈ કાલની મેચમાં દક્ષિણ આફ્રિકાને જીત માટે 149 રનનું આસાન લક્ષ્ય મળ્યું હતું. આનું મુખ્ય કારણ બન્યું ટીમ ઇન્ડિયાના મધ્યક્રમનું નિષ્ફળ રહેવું. ઋષભ પંત માત્ર પાંચ રન બનાવીને આઉટ થઈ ગયો. હાર્દિક પણ માત્ર નવ રન જ બનાવી શક્યો.

3. અક્ષરને શા માટે છઠ્ઠા ક્રમે બેટિંગમાં મોકલાયો ? 
દિનેશ કાર્તિક ગઈ કાલની મેચમાં રેગ્યુલર બેટ્સમેન તરીકે રમી રહ્યો હતો. વિકેટકીપર તરીકેની જવાબદારી ઈશાન કિશને સંભાળી હતી. સસ્તામાં ટોચના બેટ્સમેનો આઉટ થયા બાદ આશા હતી કે કાર્તિક મેદાનમાં આવશે અને ટીમને સ્થિર આપશે, પરંતુ કેપ્ટન પંતે અક્ષર પટેલને કાર્તિકની પહેલાં બેટિંગ માટે ઉતાર્યો, જેના કારણે કાર્તિકને ઓછા બોલ રમવાની તક મળી. જોકે કાર્તિકે બે ચોગ્ગા અને બે છગ્ગાની મદદથી 21 બોલમાં અણનમ 30 રન બનાવીને ભારતને 148 રનના સ્કોર સુધી પહોંચાડ્યું.

4. ભુવીને કોઈનો સાથ ના મળ્યો
149 રનના આસાન લક્ષ્યનો પીછો કરવા ઊતરેલી દક્ષિણ આફ્રિકાની ટીમ માટે ભુવનેશ્વરકુમારે શરૂઆતમાં જ મુશ્કેલી ઊભી કરી દીધી. માત્ર 29 રનના સ્કોર મહેમાન ટીમના ટોચના ત્રણ બેટ્સમેનોને ભુવીએ પેવેલિયનમાં મોકલી આપ્યા હતા. ભુવીએ કુલ ચાર વિકેટ ઝડપી, પરંતુ હર્ષલ પટેલ, આવેશ ખાનનો સહયોગ નહીં મળવાને કારણે દ. આફ્રિકાએ મેચમાં વાપસી કરી.

5. યુઝી-અક્ષરનું કંગાળ પ્રદર્શન
સામાન્ય રીતે યુઝવેન્દ્ર ચહલ અને અક્ષર પટેલ પાસેથી એવી આશા રાખવામાં આવે છે કે તેઓ એક ટી-20 મેચની સાતથી પંદરમી ઓવરમાં હરીફ ટીમની વિકેટ ઝડપે અને તેમના રનની ગતિ પર કાબૂ રાખે. ચહલ અને અક્ષર આ જવાબદારી સંભાળવામાં નિષ્ફળ રહ્યા. ચહલે ચાર ઓવરમાં એક વિકેટ ઝડપી, પરંતુ 49 રન લૂટાવી દીધા. આ જ રીતે અક્ષરે એક ઓવરમાં 19 રન ખર્ચી નાખ્યા હતા.