હડકંપ / ચીનથી ભારતમાં વાયરસનો ફેલાવો વધ્યો, આગ્રા આવેલો શખ્સ કોરોના પોઝિટીવ, હોમ ક્વોરન્ટાઈન

• ચીનમાં કોરોનાને લઈને વિકટ સ્થિતિ
• ચીનથી બે દિવસ પહેલા આગ્રા આવેલા 40 વર્ષના યુવાનનો કોરોના વળગ્યો
• યુવાનને પોતાના ઘરે આઈસોલેશનમાં રાખવામાં આવ્યો

ચીનમાં કોરોનાને લઈને વિકટ સ્થિતિનું નિર્માણ થયું છે. કોરોના સંક્રમણ અને કોરોનાથી થતા મોતનો આંકડો વધી રહ્યો છે ત્યારે ચીનથી બે દિવસ પહેલા આગ્રા આવેલા 40 વર્ષના યુવાનનો કોરોના રિપોર્ટ પોઝિટિવ આવતા તંત્ર દોડતું થયું છે. જેને લઈને સલામતની ભાગરૂપે યુવાનને પોતાના ઘરે આઈસોલેશનમાં રાખવામાં આવ્યો છે.

વ્યક્તિના રિપોર્ટમાં કોરોનાના ચેપની પુષ્ટિ

આ મામલે આગ્રાના ચીફ મેડિકલ ઓફિસર અરુણ શ્રીવાસ્તવે કહ્યું હતું કે કોરોનાની ઝપટે ચડેલા વ્યક્તિના સેમ્પલને જીનોમ સિક્વન્સિંગ માટે લખનઉ મોકલવામાં આવશે. હાલ આ વ્યક્તિ તેના ઘરે આઈસોલેટ કરાયા છે. જ્યારે આરોગ્ય વિભાગની ટીમને કોરોનાના દર્દીના પરિવારના સભ્યો અને તેના સંપર્કમાં આવેલા લોકોની તપાસ માટે આદેશ જારી કરવામાં આવ્યા છે. આ વ્યક્તિ 23 ડિસેમ્બરે ચીનથી દિલ્હી થઈને આગ્રા પરત ફર્યો હતો. ત્યારબાદ કોરોનાના શંકાસ્પદ લક્ષણ જાણતા તેણે એક ખાનગી લેબમાં પોતાનો ટેસ્ટ કરાવ્યો હતો. જે વ્યક્તિના રિપોર્ટમાં કોરોનાના ચેપની પુષ્ટિ થઈ છે.

27 ડિસેમ્બરે 'મોક ડ્રિલ' યોજવા આદેશ

ચીન સહિત કેટલાક દેશોમાં કોવિડના કેસોમાં વધારોને પગલે ચીન, જાપાન, દક્ષિણ કોરિયા, સિંગાપોર અને થાઈલેન્ડથી આવતા મુસાફરો માટે આરટી-પીસીઆર ટેસ્ટ ફરજિયાત કરવામાં આવશે. રાજ્યોને 27 ડિસેમ્બરે 'મોક ડ્રિલ' યોજવા જણાવ્યું હતું, જેમાં તબીબી ઓક્સિજન ઉત્પાદન પ્લાન્ટ સહિત આરોગ્ય સુવિધાઓની તૈયારીનો સમાવેશ થાય છે. વધુમાં આગ્રામાં આરોગ્ય વિભાગે વિદેશી પ્રવાસીઓની તપાસ શરૂ કરી છે અને તાજમહેલ, આગ્રાનો કિલ્લો અને અકબરના મકબરો પર અને ભીડભાડ વાળા સ્થળોએ સેમ્પલ લેવાઈ રહ્યા છે.