લંડન / ભારતવંશી સુએલા બ્રેવરમેનને બ્રિટનના ગૃહ મંત્રી પદેથી હટાવાયા, જાણો PM સુનકે કેમ ભર્યું પગલું

• બ્રિટનના પ્રધાનમંત્રી ઋષિ સુનકે ગૃહ મંત્રી સુએલા બ્રેવરમેનને બરખાસ્ત કર્યાં 
• લંડન પોલીસ પર આપ્યું હતું વિવાદાસ્પદ નિવેદન
• વિવાદાસ્પદ નિવેદન પર દબાણ વધતાં પીએમ સુનકે ભર્યું પગલું 

બ્રિટિશ વડાપ્રધાન ઋષિ સુનકે ભારતીય મૂળના રાજકારણી સુએલા બ્રેવરમેનને દેશના ગૃહમંત્રી પદેથી બરતરફ કરી દીધા છે. સુએલાની હકાલપટ્ટી પાછળનું કારણ તેનું વિવાદાસ્પદ નિવેદન હોવાનું માનવામાં આવી રહ્યું છે. એક અખબારને આપેલી મુલાકાતમાં તેમણે લંડન પોલીસને પેલેસ્ટીનીઓની સમર્થક ગણાવી હતી. આ નિવેદન પર ભારે હોબાળો થયો હતો અને બ્રેવરમેનને હટાવવા માટે પીએમ સુનક પર દબાણ આવ્યું હતું અને આખરે દબાણને વશ થતાં પીએમ સુનકે તેમને આજે હોદ્દા પરથી બરખાસ્ત કર્યાં હતા અને નવા ગૃહ મંત્રીની શોધ શરુ કરી હતી. બ્રિટનના આંતરિક મંત્રી અને ભારતીય મૂળના બ્રિટિશ રાજનેતા સુએલા બ્રેવરમેનને તણાવ ભડકાવવા અને વિવાદિત ભાષણ આપવાના આરોપમાં બરતરફ કરવામાં આવ્યા છે. 

શું હતો કેસ
શનિવારે લંડનના માર્ગો પર લગભગ 30,000 લોકોએ પેલેસ્ટીનીઓના સમર્થનમાં રેલી કાઢી હતી. આ રેલીને સંસદ સુધી લઇ જવામાં આવી હતી. આ દરમિયાન ઇઝરાયેલના સમર્થકો પણ રસ્તા પર આવી ગયા હતા. બંને પક્ષો વચ્ચે ઝપાઝપી થઈ હતી. પોલીસે આ ઘટના પર કાર્યવાહી કરીને લગભગ 100 લોકોની ધરપકડ કરી હતી. આ માર્ચ પર સુએલાએ નિવેદન આપ્યું હતું કે લંડન પોલીસ પેલેસ્ટાઈનના સમર્થકોની જેમ કામ કરી રહી છે. તેમણે આરોપ લગાવ્યો કે પોલીસે માત્ર ઈઝરાયલનું સમર્થન કરનારાઓની ધરપકડ કરી છે. તેમના આ નિવેદનની વ્યાપક ટીકા થઈ હતી.

દબાણને વશ થતાં પીએમ સુનકે હટાવ્યાં 
સુએલા બ્રેવરમેનના નિવેદન બાદ સુનક સરકાર પર તેમને હટાવવાનું દબાણ સતત વધી રહ્યું હતું. સુએલાની આ કેસમાં તણાવ વધારવા અને જમણેરી દેખાવકારોને લંડનની સડકો પર ઉતરવા માટે પ્રોત્સાહિત કરવા બદલ પણ ટીકા કરવામાં આવી હતી.