રશિયા અને યુક્રેનના રાષ્ટ્રપતિઓએ ભારતમાં સામાન્ય ચૂંટણીઓ પૂર્ણ થયા બાદ વડાપ્રધાન નરેન્દ્ર મોદીને પોતાના દેશોની મુલાકાત લેવા આમંત્રણ આપ્યું છે. અધિકારીઓએ જણાવ્યું હતું કે રશિયાના રાષ્ટ્રપતિ વ્લાદિમીર પુતિન અને યુક્રેનના રાષ્ટ્રપતિ વોલોદિમીર ઝેલેન્સકી સાથે અલગ-અલગ ટેલિફોન વાતચીતમાં મોદીએ બંને દેશો વચ્ચે ચાલી રહેલા સંઘર્ષના વહેલા અને શાંતિપૂર્ણ ઉકેલ માટે ભારતની પ્રતિબદ્ધતાનો પુનરોચ્ચાર કર્યો હતો.
તેમણે કહ્યું કે બંને નેતાઓએ કહ્યું કે તેઓ વડાપ્રધાન મોદીને 'શાંતિ નિર્માતા' તરીકે જુએ છે. એક અધિકારીએ જણાવ્યું હતું કે, "પુતિન અને ઝેલેન્સકી બંનેએ ભારતમાં સામાન્ય ચૂંટણીઓ પૂર્ણ થયા પછી મોદીને પોતપોતાના દેશોની મુલાકાત લેવા આમંત્રણ આપ્યું છે." વડા પ્રધાને ભૂતકાળમાં વિદેશી નેતાઓ દ્વારા તેમને તેમના દેશોની મુલાકાત લેવા માટે આપવામાં આવેલા આમંત્રણોને ટાંક્યા હતા અને દાવો કર્યો હતો કે તેઓ લોકસભા ચૂંટણી જીત્યા પછી સત્તામાં પાછા આવવાના છે. દેશમાં લોકસભાની ચૂંટણી 19 એપ્રિલથી શરૂ થશે અને જૂનના પહેલા સપ્તાહમાં સમાપ્ત થશે.
વિદેશી નેતાઓએ તેમને આમંત્રણ આપ્યું
ગયા મહિને પાર્ટી કોન્ફરન્સમાં BJPના હજારો પ્રતિનિધિઓને સંબોધતા વડાપ્રધાન મોદીએ કહ્યું હતું કે જુલાઇ, ઓગસ્ટ અને સપ્ટેમ્બરમાં ઘણા વિદેશી નેતાઓએ તેમને આમંત્રણ આપ્યું હતું. તેમણે કહ્યું હતું કે આ દર્શાવે છે કે આ દેશો પણ જાણે છે કે 'માત્ર મોદી જ આવશે'. પુતિન સાથેની વાતચીતમાં મોદીએ તેમને તેમના પાંચમા કાર્યકાળ પર અભિનંદન પાઠવ્યા હતા અને કહ્યું હતું કે સંવાદ અને રાજદ્વારી એ રશિયા-યુક્રેન સંઘર્ષને ઉકેલવા તરફ આગળ વધવાનો માર્ગ છે. પુતિને પણ મોદીને ચૂંટણી માટે શુભેચ્છા પાઠવી હતી. ઝેલેન્સકી સાથે વાત કરતા મોદીએ કહ્યું કે ભારત સંઘર્ષના વહેલા અને શાંતિપૂર્ણ ઉકેલ માટેના તમામ પ્રયાસોને સમર્થન આપે છે.
આ પણ વાંચોઃ 1800 કિમી દૂરનો માણસ વડનગરમાં મર્યો, પ્રાચીન નગરીના સદીઓ જુના કંકાલોનું ખુલ્યું રહસ્ય
ભારતના સતત સમર્થનની વાત કરી
મોદીએ 'X' પર એક પોસ્ટમાં કહ્યું, "ભારત-યુક્રેન ભાગીદારીને મજબૂત કરવા પર રાષ્ટ્રપતિ ઝેલેન્સકી સાથે સારી વાતચીત થઈ. તમામ શાંતિ પ્રયાસો અને ચાલી રહેલા સંઘર્ષના વહેલા અંત માટે ભારતના સતત સમર્થનની વાત કરી. ભારત તેના લોકો-કેન્દ્રિત અભિગમ દ્વારા સંચાલિત માનવતાવાદી સહાય પૂરી પાડતું રહેશે.” ઝેલેન્સકીએ યુક્રેનના લોકો માટે ભારતની સતત માનવતાવાદી સહાયની પ્રશંસા કરી, એમ એક નિવેદનમાં જણાવાયું છે. તેમના જણાવ્યા અનુસાર, બંને નેતાઓએ વિવિધ ક્ષેત્રોમાં તેમની દ્વિપક્ષીય ભાગીદારીને વધુ મજબૂત કરવાના માર્ગો પર ચર્ચા કરી.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
