અમદાવાદ / 200 રૂપિયા નહીં આપતાં યુવકે મિત્રને છરી મારી દીધી, પછી કહ્યું જો તું અહીં આવીશ તો તને જાનથી મારી નાખીશ, મામલો પોલીસ સ્ટેશનમાં

• 200 રૂપિયા નહીં આપવા બાબતે યુવકે મિત્ર પર હુમલો
• છરીનો ઘા મારી દેતાં મામલો પોલીસ સ્ટેશન સુધી પહોંચ્યો
• હરીશ ચાવડાએ હાર્દિક પાસે 200 રૂપિયા ઉછીના માગ્યા હતા

અમદાવાદમાં શહેરના દાણીલીમડા વિસ્તારમાં ગઇ કાલે ઉછીના 200 રૂપિયા નહીં આપવા બાબતે યુવકે મિત્ર પર છરીનો ઘા મારી દેતાં મામલો પોલીસ સ્ટેશન સુધી પહોંચ્યો છે. મણિનગર વિસ્તારમાં આવેલી રામાભાઇની ચાલીમાં રહેતા હાર્દિક પરમારે દાણીલીમડા પોલીસ સ્ટેશનમાં હરીશ ઉર્ફે ગામુ ચાવડા વિરુદ્ધ મારામારીની ફરિયાદ કરી છે. હાર્દિક પરમાર ગેસ સિલિન્ડર ડિલિવરી કરવાનું કામ કરીને પોતાનું તેમજ પરિવારનું ગુજરાન ચલાવે છે. 

છરી મારી દીધી
હાર્દિકને દાણીલીમડા વિસ્તારમાં ગેસ સિલિન્ડર ડિલિવરી કરવાનાં હોવાથી તે તેનો લોડિંગ ટેમ્પો દાણીલીમડા આંબેડકરબ્રિજના છેડે પાર્ક કરે છે. ગઇ કાલે હાર્દિક પોતાનું કામ કરીને લોડિંગ રિક્ષા બ્રિજની નીચે પાર્ક કરવા માટે ગયો હતો ત્યારે તેને હરીશ ઉર્ફે ગામુ ચાવડા નામનો મિત્ર મળ્યો હતો. હરીશ ચાવડાએ હાર્દિક પાસે 200 રૂપિયા ઉછીના માગ્યા હતા. હાર્દિકે રૂપિયા આપવાનો ઇનકાર કરી દીધો હતો. જેથી હરીશ ઉશ્કેરાયો હતો અને ગાળો બોલવા લાગ્યો હતો. હાર્દિકે ગાળો બોલવાની ના પાડતાં હરીશે તેની પાસે રહેલી છરી કાઢી હતી અને તેને હુલાવી દીધી હતી. 

જાનથી મારી નાખવાની ધમકી 
હરીશ બીજી છરીનો ઘા મારવા ગયો ત્યારે આસપાસના લોકો દોડી આવ્યા હતા. લોકોનાં ટોળાંને જોઇને હરીશ ત્યાંથી ભાગી ગયો હતો અને હાર્દિકને ધમકી આપતો ગયો કે હે હવે જો તું અહીં આવીશ તો તને જાનથી મારી નાખીશ.