FIFA World Cup / લિયોનલ મેસ્સીએ રચ્યો ઇતિહાસ, આ દેશને પેનલ્ટી શૂટઆઉટમાં હરાવી આર્જેન્ટિનાએ સેમિ ફાઇનલમાં એન્ટ્રી મારી

• આર્જેન્ટિના અને નેધરલેન્ડ વચ્ચે રમાઈ બીજી ક્વાર્ટર ફાઇનલ મેચ
• નેધરલેન્ડને પેનલ્ટી શૂટઆઉટમાં હરાવી સેમિ ફાઇનલમાં પહોંચ્યું આર્જેન્ટિના
• લિયોનેલ મેસ્સીએ રચ્યો ઇતિહાસ,  વર્લ્ડ કપમાં કર્યા 10 ગોલ

FIFA વર્લ્ડ કપ આર્જેન્ટિના vs નેધરલેન્ડ્સ: FIFA વર્લ્ડ કપ 2022 સીઝનમાં શુક્રવારે મોડી રાત્રે ખૂબ જ રોમાંચક બીજી ક્વાર્ટર ફાઈનલ રમાઈ હતી. આ મેચમાં લિયોનેલ મેસ્સીની ટીમ આર્જેન્ટિનાની ટક્કર નેધરલેન્ડ સાથે થઈ હતી. આ મેચ ખૂબ જ રોમાંચક રહી, જેમાં આર્જેન્ટિનાએ પેનલ્ટી શૂટઆઉટમાં 4-3થી જીત મેળવી અને સેમિફાઇનલમાં પ્રવેશ કર્યો છે.

આર્જેન્ટિના અને ક્રોએશિયા વચ્ચે રમાશે સેમિફાઇનલ
હવે મેસ્સીની ટીમ આ વખતે ચેમ્પિયન બનવાથી બે જીત દૂર છે. આર્જેન્ટિના ટીમ હવે સેમિફાઇનલમાં ક્રોએશિયા સામે ટકરાશે. ક્રોએશિયાએ તેની ક્વાર્ટર ફાઈનલ મેચમાં નેમારની ટીમ બ્રાઝિલને પેનલ્ટી શૂટઆઉટમાં હરાવ્યું હતું. હવે આર્જેન્ટિના અને ક્રોએશિયા વચ્ચેની આ સેમિફાઇનલ મેચ 13 ડિસેમ્બરે બપોરે 12.30 કલાકે રમાશે.

નેધરલેન્ડે આ રીતે મેચમાં કરી વાપસી
બીજા હાફમાં આ મેચ ખૂબ જ રોમાંચક રહી. નેધરલેન્ડની ટીમે 83મી મિનિટે પ્રથમ ગોલ કરતા મેચ 2-1ની બરાબર હતી. ત્યારપછી ઈન્જરી ટાઈમની લગભગ છેલ્લી મિનિટોમાં નેધરલેન્ડે બીજો ગોલ કરીને મેચ 2-2થી બરાબરી કરી હતી. આ પછી પેનલ્ટી શૂટઆઉટમાં આર્જેન્ટિનાએ મેચ 4-3થી જીતી લીધી હતી.

મેસ્સીએ રચ્યો ઈતિહાસ
મેસ્સીના નામે વર્લ્ડ કપ ઈતિહાસમાં 10 ગોલ થઈ ગયા છે. આ સાથે મેસ્સીએ ગેબ્રિયલ બતિસ્તુતાની બરાબરી કરી લીધી છે. મેસ્સી અને ગેબ્રિયલ હવે સંયુક્ત રીતે વર્લ્ડ કપમાં સૌથી વધુ ગોલ કરનાર આર્જેન્ટિનાના ખેલાડી બની ગયા છે. મેરાડોનાના વર્લ્ડ કપમાં 8 ગોલ છે. મેસ્સીએ આ સિઝનમાં અત્યાર સુધીનો ચોથો ગોલ કર્યો છે.

મેચમાં આર્જેન્ટિના અને નેધરલેન્ડની સ્ટાર્ટિંગ-11
આર્જેન્ટિના ટીમ: લિયોનેલ મેસ્સી (કેપ્ટન), એમિલિયાનો માર્ટિનેઝ (ગોલકીપર), ક્રિસ્ટિયન રોમેરો, લિસાન્ડ્રો માર્ટિનેઝ, નિકોલસ ઓટામેન્ડી, નાહુએલ મોલિના, માર્કોસ એક્યુના, રોડ્રિગો ડી પૌલ, એલેક્સિસ મેકએલિસ્ટર, એન્ઝો ફર્નાન્ડીઝ અને જુલિયન અલવારેઝ.

નેધરલેન્ડની ટીમ: વર્જિલ વાન ડાઈક (કેપ્ટન), એન્ડ્રીસ નોપર્ટ (ગોલકીપર), ડેલી બ્લાઇન્ડ, નાથન એકે, જુરીયન ટિમ્બર્સ, ડેન્ઝેલ ડમફ્રીઝ, માર્ટેન ડી રૂન, સ્ટીવન બર્ગવિજન, ફ્રેન્કી ડી જોંગ, કોડી ગૈક્પો અને મેમ્ફિસ ડેપે.