સુનાવણી / દીકરી ભલે પરિણીત હોય પરંતુ પિતાને આશ્રિત હોવાથી વળતર મેળવવા હકદાર, હાઇકોર્ટની વીમા કંપનીને ટકોર

• ગુજરાત હાઈકોર્ટે વીમા કંપનીને ટકોર કરી
• પિતા અને દીકરીનો સંબંધ લોહીનો કહેવાયઃ HC
• પરિણીત દીકરીને અપરિણીત દીકરીની સમાન મળવું જોઈએ વળતર

ભાવનગરની એક મહિલાની અરજી પર સુનાવણી કરતા ગુજરાત હાઈકોર્ટે વીમા કંપનીને ટકોર કરી હતી કે, પરિણીત દીકરી પિતા પર આશ્રિત હોય તો તેમને અપરિણીત દીકરીની સમાન જ વળતર મળવું જઈએ. આ અંગે વીમા કંપનીએ જવાબ રજૂ કરવા સમય માગ્યો હોવાથી હવે આ મામલે સુનાવણી 20 ફેબ્રુઆરીએ થશે.

ચુકાદાને હાઈકોર્ટમાં પડકાર્યો 
ભાવનગરના શોભના પરમારના પિતાનું અકસ્માતમાં મોત થયું હતું. જેથી પિતા પર આશ્રિત દીકરી શોભના પરમારે વીમા કંપની પાસે વળતર મેળવવા દાવો કર્યો હતો. જોકે, વીમા કંપનીએ એવું કહીને દાવો ફગાવી દીધો હતો કે પરણેલી દીકરી વળતર મેળવવા માટે હકદાર નથી. જેથી શોભનાબેને આ ચુકાદાને હાઈકોર્ટમાં પડકાર્યો હતો. 

અરજદારે હાઈકોર્ટમાં કરી હતી રજૂઆત
તેમણે હાઈકોર્ટમાં રજૂઆત કરી હતી કે, તેમના પતિએ તેમને તરછોડીને બીજે લગ્ન કરી લીધા હતા. જેથી તેઓ તેમના પિતાના ઘરે આવી ગયા હતા અને વર્ષોથી પિતાને આશ્રિત રહેતા હતા. આ બનાવ વખતે તેઓ પિતાને આશ્રિત હોવાથી તેઓ વળતર મેળવવા હકદાર છે. તેમણે કોર્ટમાં કહ્યું હતું કે, કેનેડામાં રહેતા મારા ભાઈને વળતર મળે તો મને શા માટે નહીં? તો વીમા કંપનીએ એવી દલીલ કરી હતી કે, બંન્ને દીકરીઓ પરિણીત હોવાથી વળતર મેળવવા હકદાર નથી. 

જસ્ટિસ ગીતા ગોપીએ કરી ટકોર
અરજદારની રજૂઆત પર હાઈકોર્ટના જસ્ટિસ ગીતા ગોપીએ વીમા કંપનીને એવી ટકોર કરી હતી કે, પિતા અને દીકરીનો સંબંધ લોહીનો કહેવાય. આ કેસમાં દીકરી ભલે પરિણીત હોય પરતું તેના પિતાને આશ્રિત હોવાથી તે વળતર મેળવવા હકદાર છે. પરિણીત દીકરી આશ્રિત હોય તો તેમને અપરિણીત દીકરીની જેમ જ વળતર મળવું જોઈએ. 

પરણેલી સ્ત્રીઓ માટે કાયદો ઘણો ક્રુરઃ હાઈકોર્ટ
હાઈકોર્ટ ટકોર કરતા કહ્યું હતું કે, પરણેલી સ્ત્રીઓ માટે કાયદો ઘણો ક્રુર છે. પરિણીત દીકરીને કાયદામાં ઘણો અન્યાય થઇ રહ્યો છે.  અનેક કિસ્સામાં સાસુને, ભત્રીજીને મિલકતમાં હક મળે છે તો પરણેલી દીકરીને કેમ નહી? આ કેવી રીતે ચલાવી લેવાય? પરણેલી દીકરીને પિતા પાસે ન મળે તો એ કયા જાય? આ અન્યાયી છે. પરિણીત દીકરી કમાતી હોય તેમ છતા તેમને વળતર મળે. જ્યારે પરિણીત દીકરીઓ ન કમાતી હોય તેમ છતાં તેમને વળતર ન મળે. આ કેવી સમજ છે? આ અંગે વીમા કંપનીએ જવાબ રજૂ કરવા સમય માગ્યો છે. જેની સુનાવણી 20 ફેબ્રુઆરીએ થશે.