અનામત / ચૂંટણી પહેલા સરકારની ચિંતામાં વધારો: SCના મરાઠા અનામત પર સ્ટે બાદ પાટીદારોને અનામતનો છેદ!

• મરાઠા અનામત પર સુપ્રીમનો સ્ટે
• 13 ટકા આપી હતી અનામત 
• પાટીદાર, જાટ સમાજની અનામત સંકટમાં

ગુજરાતમાં અગામી સમયમાં ચુંટણીઓ આવી રહી છે ત્યારે સરકાર માટે ચિંતામાં થઇ વધારો શકે છે. કેન્દ્ર સરકારે પાટીદાર, જાટ વગેરે સમાજના આંદોલનોને શાંત પાડવા માટે EWS અનામત આપી છે. EWS અનામત રદ થાય તો આગમી સમયમાં  આંદોલનો પાછાં શરૂ થાય તેવા એંધાણ મળી રહ્યા છે. મરાઠા મામલે ચૂકાદો વિરોધમાં જાય તો પાટીદારોને પણ અનામત મળવાની કોઈ સંભાવના નથી. 

કેન્દ્રએ પાટીદાર, જાટ જેવા સમાજને EWS અનામત આપી 

સુપ્રીમ કોર્ટે મહારાષ્ટ્રમાં મરાઠા સમુદાયને 13 ટકા અનામત સામે સ્ટે આપ્યો છે. સુપ્રીમે જણાવ્યું હતુ કે, અનામતનું પ્રમાણ કોઈ પણ સંજોગોમાં 50 ટકાથી વધવું ના જોઈએ. મરાઠા સમુદાયને આર્થિક અને સામાજિક રીતે પછાતમાં ગણીને 13 ટકા અનામત અપાયું હતુ. મરાઠા સમુદાય ને 13 ટકા અનામત અપાતા અનામતનું પ્રમાણ 62 ટકાએ પહોચ્યું હતું. 

SCના ચુકાદાથી EWS માટે કરેલી 10 ટકા અનામત પણ ગેરકાયદે ઠરી શકે

અનામતનું પ્રમાણ 62 ટકાની આસપાસ થઈ જતાં મરાઠા અનામતને SCમાં પડકારાઈ હતી. SCએ દલીલને માન્ય રાખીને મરાઠા અનામત પર સ્ટે આપ્યો છે. SCના આ ચુકાદાથી EWS માટે કરેલી 10 ટકા અનામત પણ ગેરકાયદેસર ઠરી શકે છે. ગુજરાતમાં પણ EWSનો  લાભ આપી પાટીદાર અનામત આંદોલનને શાંત કરવામાં આવ્યું હતુ. 

ગુજરાતમાં થયું હતુ પાટીદાર આંદોલન

ગુજરાતમાં પણ 2015માં પાટીદાર આંદોલન થયું હતુ જેને પરિણામે ગુજરાતમાં તત્કાલિન મુખ્યમંત્રી આનંદીબેન પટેલે ખુરશી છોડવાનો વારો આવ્યો હતો ત્યારે ફરીથી ચુંટણી પહેલા પાટીદાર અનામતનું ભૂત ધુણશે તો ગુજરાતમાં ભાજપ માટે લોઢાના ચણા ચાવવા જેવી સ્થિતિ થઈ જશે.