બ્રેક / શેર બજારમાં 2 દિવસની તેજી પર ફૂલસ્ટોપ, સેન્સેક્સ 200 અંક ગગડ્યો, આ શેરોમાં મુનાફાવસૂલીથી બજાર બેઠું

• શેર બજારમાં આજે સતત બે દિવસની તેજી પર બ્રેક
• BSE Sensex માં 223 અંકનો નોંધાયો ઘટાડો
• તેજીની ગાડી પર એકાએક બ્રેક

શેર બજારમાં બુધવારે સતત બે દિવસની તેજી બાદ ભારે વેચવાલી જોવા મળી હતી. BSE Sensex 223 અંકના ઘટાડા સાથે 65,393 પર બંધ રહ્યો હતો. આવી જ રીતે NIFTY પણ 55 અંક ગગળીને 19,384 પર બંધ રહ્યું હતું. બજારમાં મોંઘવારી અને Q1ના પરિણામ પહેલા વેચવાલી જોવા મળી હતી. ગઇ કાલે BSE Sensex 273 અંકના ઉછાળા સાથે 65,617 પર બંધ રહ્યો હતો. જોકે આજે તેજીની ગાડી પર એકાએક બ્રેક લાગી હતી.

ટાટા મોટર્સ, ઇન્ફોસિસ અને અલ્ટ્રાટેક સિમેન્ટના શેર ઘટ્યા
Sensexમાં આજે ટાટા મોટર્સ, ઇન્ફોસિસ અને અલ્ટ્રાટેક સિમેન્ટના શેરમાં એક ટકાથી વધુનો ઘટાડો નોંધાયો, આવી જ રીતે એનટીપીસી, ઇન્ડસઇન્ડ બેંક, લાર્સન એન્ડ ટર્બો, એચસીએલ ટેક, પાવરગ્રીડ, મારુતિ અને એચડીએફસીના શેર 0.50 ટકાના ઘટાડા સાથે બંધ થયા હતા. આ સિવાય ટાટા સ્ટીલ, ભારતી એરટેલ, ટીસીએસ, એક્સિસ બેંક, હિન્દુસ્તાન યુનિલીવર લિમિટેડ અને આઇસીઆઇસીઆઇ બેંકના શેર પણ લાલ નિશાન સાથે બંધ થયા હતા. 

આ શેરમાં જોવા મળી તેજી

શેર બજારમાં ભલે મોટાભાગે આજે લાલ આંકડા જ જોવા મળ્યા હોય પરંતુ કેટલાક એવા પણ શેર હતા જેમાં રોકાણકારોને લીલા આંકડા જોવા મળ્યા, આ શેરમાં કોટક મહિન્દ્રા બેંક, એશિયન પેઇન્ટ્સ, સન ફાર્મા, નેસ્લે ઇન્ડિયા, ટાઇટન અને એસબીઆઇના શેરનો સમાવેશ થાય છે. બીજી બાજુ અમેરિકન ડોલરની સરખામણીમાં રૂપિયો 12 પૈસા મજબૂત થયો છે. જે હાલ 82.24ના સ્તર પર ક્લોઝ થયો છે. આ પહેલા સત્રમાં ડોલરના મુકાબલે રૂપિયો 82.36ના સ્તરે પહોંચ્યો હતો.