તમારા કામનું / 10 મીનિટમાં ઘટાડો વજન! દરરોજનાં આટલા દોરડાં કૂદશો તો ફટાફટ થશે વેઈટ લોસ, જાણી લો સાચી ટેકનિક

• દોરડાં કૂદવાથી ઝડપથી વજન ઊતરે છે
• દરરોજ દસથી પંદર મિનિટ દોરડાં કૂદવાં જોઈએ
• દોરડાં કૂદતાં પહેલાં પાંચથી દસ મિનિટ વોર્મઅપ કરો

જિમ, એરોબિક્સ, વોકિંગ-રનિંગ, ઝુમ્બા જેવી એક્સર્સાઇઝથી કંટાળી ગયાં હો અને કંઈક ચેન્જ જોઈતો હોય તો દોરડાં કૂદો. નાનપણમાં આપણે બધાંએ દોરડાં કૂદવાની રમત રમી હશે. એ સમયે ખ્યાલ પણ નહોતો કે જેને આપણે સામાન્ય રમત સમજતાં હતાં એ વ્યાયામનો શ્રેષ્ઠ પ્રકાર છે. દોરડાં કૂદવાથી મોટા પ્રમાણમાં કેલરી બર્ન થાય છે. વજન ઘટાડવા ઇચ્છતા હોય એવા લોકોએ દરરોજ દસથી પંદર મિનિટ દોરડાં કૂદવાં જોઈએ

વજન ઝડપથી ઘટવા લાગશે
આ કસરતની ખાસિયત એ છે કે તમારે ક્યાંય બહાર જવાની કે પૈસા ખર્ચવાની જરૂર નથી. બાલ્કની કે ટેરેસમાં અથવા લિવિંગરૂમ મોટો હોય તો ઘરમાં જ દોરડાં કૂદવાનો આનંદ લઈ વજનને નિયંત્રણમાં રાખી શકાય છે. દોરડાંકૂદ એરોબિક્સ જેવી એક્સર્સાઇઝ છે. જમ્પ મારતી વખતે હૃદયની ગતિ વધવાથી આખા શરીરમાં ઓક્સિજનનો પુરવઠો ઝડપથી પહોંચે છે. ઓછા સમયમાં શરીરના દરેક અવયવને પૂરતા પ્રમાણમાં ઓક્સિજન મળી રહેતાં સ્ફુર્તિ અને ઊર્જાનો સંચાર થાય છે. આ એક્સર્સાઇઝમાં શરીરના સ્નાયુઓ ખેંચાતાં સ્ટેમિના વધે છે. દાદરા ચઢતી વખતે થાક લાગતો હોય એવી વ્યક્તિ દોરડાં કૂદે તો પગની તાકાત વધે છે. વજન ઘટાડવા માટેની બેસ્ટ એક્સર્સાઇઝ ગણાય છે.

કઈ રીતે દોરડાં કૂદવાં?
દોરડાં કૂદવાની ટેકનિક છે. ઝડપથી વજન ઘટાડવાની લાયમાં ઘણા લોકો સવારે ઊઠતાંવેંત ઠેકડા મારવા લાગે છે. આ રીત ખોટી છે. કોઈ પણ એક્સર્સાઇઝ કરતાં પહેલાં બોડીને તૈયાર કરવી પડે. એ માટે વોર્મઅપ કરવું જરૂરી છે. દોરડાં કૂદતાં પહેલાં પાંચથી દસ મિનિટ વોર્મઅપ કરો. નિયમિત જુદી જુદી જમ્પિંગ એક્સર્સાઇઝ કરવાની ટેવ હોય તો બસ્સો-ત્રણસો જમ્પ મારવામાં વાંધો નથી, પરંતુ જો શરૂઆત કરવાની હોય તો પહેલાં ચાર દિવસ વીસથી ચાળીસ દોરડાં કૂદવાં. એ પછી બીજા ચાર દિવસ પચાસથી સાઠ કૂદવાં. અઠવાડિયા બાદ ૧૦૦ જેટલાં કૂદી શકાય. બોડી ટેવાઈ જાય પછી વધારતાં જવું. 

કોણે દોરડાં ના કૂદવાં જોઈએ?
દોરડાં કૂદવાની એક્સર્સાઇઝ સાવ સરળ, સસ્તી અને અસરકારક છે, પરંતુ બધાં માટે નથી. દોરડાં કૂદતી વખતે કઈ બાબતોને ધ્યાનમાં રાખવી જોઈએ. તમે લાઇફમાં ક્યારેય એકસર્સાઇઝ કરી ના હોય તો દોરડાં કૂદવાથી શરૂઆત કદા‌િપ ન કરવી. પચાસની વય બાદ ઘૂંટણ ઘસાઈ જાય છે તેથી દોરડાં કૂદવાની કસરત જોખમી છે. તમારું વજન ખૂબ વધારે હોય ત્યારે આ એક્સર્સાઇઝ ન કરવાની સલાહ છે. સ્થૂળ શરીર ધરાવતી વ્યક્તિ જમ્પ મારવા જાય તો એન્કલમાં દુખાવો થાય છે. તેથી પહેલાં બીજી એક્સર્સાઇઝ અને ડાયટ દ્વારા વજન ઘટાડવું. આમ તો આ કાર્ડિયો એક્સર્સાઇઝ છે પણ બ્લડપ્રેશર અને હાર્ટના દરદીઓએ દોરડાં કૂદવાની રમતથી દૂર રહેવું.