અકસ્માત મોત / સુરતમાં માતા-પિતા માટે લાલબત્તી સમાન કિસ્સો, બાળકીને હવામાં ઉછાળી તો ચાલુ પંખાની પાંખ વાગી, થયું મોત

• સુરતનાં લિંબાયત વિસ્તારનો બનાવ
• બાળકીને અધર ઉછળતા ચાલુ પંખાની પાંખ વાગી
• બાળકીને ગંભીર ઈજાઓ પહોંચતા સારવાર દરમ્યાન મોત નિપજ્યું

સુરતમાં માતા પિતા માટે લાલબત્તી સામાન કિસ્સો સામે આવ્યો છે.સુરતના લીંબાયતમાં ઘરમાં ત્રણ મહિનાની બાળકીને પિતા રમાડતી વખતે ઉછાળી રહ્યા હતા. ત્યારે બાળકીને માથામાં પંખાની પાંખ વાગતા ગંભીર ઈજા પહોંચી હતી.જેને લઇ બાળકીને જુદી જુદી ત્રણ હોસ્પિટલમાં માં સારવાર માટે લઇ જવાઇ આખરે સારવાર દરમ્યાન બાળાનું મોત નીપજ્યું હતું. બાળકીને રમાડવાનો હરખનો માહોલ પરિવાર માટે માતમમાં છવાય ગયો હતો.ત્યારે ઘટનાને પગલે લિંબાયત પોલીસે અકસ્માત મોતનો ગુનો નોંધી તપાસ હાથ ધરી છે.

બાળકીને ઉછાળતા પંખાની પાંખ માથામાં વાગતા ગંભીર ઈજા પહોંચી
સુરતના લિંબાયત વિસ્તારના ખાનપુર ખાતે ભાડાના મકાનમાં રહેતા મસરુદીન શાહ મજૂરી કામ કરી ત્રણ પુત્રી, એક પુત્ર તેમજ પત્નીનું ભરણપોષણ કરે છે.શ્રમજીવી મસરુદીનને ત્રણ મહિના પહેલા જ ઝોયા નામની ત્રીજી દીકરીનો જ્ન્મ થયો હતો. તેઓ 13 મી મેના રોજ સવારે માસૂમ પુત્રી જોયાને ૨માડી રહ્યા હતા. દરમિયાન તેણીને અધર ઉછળતા ચાલુ પંખાની પાંખ પુત્રી ઝોયાને માથામાં વાગી જતા તેણીને ગંભીર ઇજા પહોંચી હતી.ઘટનાને પગલે ત્રણ માસની ઝોયાને માથાના ભાગમાં ગંભીર ઇજા પહોંચી હતી. જેથી પરિવાર દ્વારા તાત્કાલિ ઝોયાને સારવાર માટે સ્મીમેર હોસ્પિટલ ખસેડાઇ હતી. જ્યા યોગ્ય સારવાર ન મળતી હોવાનું લાગતા ત્યાથી ખાનગી હોસ્પિટલ ખસેડાઇ હતી.અને બાદમાં નવી સિવિલ હોસ્પિટલમાં સારવાર માટે લવાઈ હતી. 

સારવાર દરમ્યાન બાળકીનું મોત નિપજ્યું
બાળકીનું સારવાર બાદ સિવિલ હોસ્પિટલમાં મોત નિપજતાં બનાવની જાણ લિંબાયત પોલીસને કરાઈ હતી.ત્યારે આ બનાવ અંગે લિંબાયત પોલીસને અકસ્માત મોતનો ગુનો નોંધી કાયદેસરની કાર્યવાહી કરી વધુ તપાસ શરૂ કરી હતી.