ઠગ ટોળકી સક્રિય / આ સરનામું બતાવો ને...: અમદાવાદીઓ ચેતજો!, એડ્રેસ પૂછવાના બહાને લૂંટતી ગેંગનો વધ્યો આતંક

• જગતપુર વિસ્તામાં યુવકને બંટી-બબલીએ લૂંટી લીધો
• યુવકને સરનામું પૂછવાનાં બહાને ઉભો રાખી મૂઢ માર માર્યો
• યુવકે આ બાબતે ચાંદખેડા પોલીસે મથકે ફરિયાદ નોંધાવી

 અમદાવાદના જગતપુર  વિસ્તારમાં યુવકને બંટી-બબલીએ લૂંટી લીધો હોવાની એક ચોંકાવનારી ઘટના બની છે. બંટી બબલીએ સરનામું પૂછવાના બહાને યુવકને ઊભો રાખ્યો તે ત્યાર બાદ મૂઢ માર મારીને ૨૭ હજારની મતાની લૂંટ ચલાવીને ફરાર થઇ ગયાં છે. આ બંટી બબલી સાથે નાનાં છોકરાં પણ હતાં.
ચાંદલોડિયાના હરેકૃષ્ણ સોસાયટીમાં રહેતા કરણ પવારે લૂંટની ફરિયાદ ચાંદખેડા પોલીસ સ્ટેશનમાં નોંધાવી છે. કરણ ખાનગી કંપનીમાં સોફ્ટવેર એન્જિનિયર તરીકે કામ કરે છે.
સરનામું પૂછવાનાં બહાને યુવક પાસે આવી યુવકને માર મારી લૂંટી લીધો
ત્રણ દિવસ પહેલા રાત્રીના નવ વાગ્યાની આસપાસ નોકરી પરથી કરણ એક્ટિવા લઈને ઘરે જવા નીકળ્યો હતો. રાતના સમયે ગણેશ જેનેસિસની પાછળના રોડ પરથી તે પસાર થઇ રહ્યો હતો. આ વખતે અચાનક બે એક્ટિવા તેની નજીક આવ્યાં હતાં. આ બંને એક્ટિવા પર નાનાં છોકરાં હતાં. તેમને આગળ ઉતારી બે એક્ટિવાચાલક કરણ પાસે આવ્યાં હતાં. જેમાં એક યુવક   અને યુવતી હતાં. તેમણે કરણને સરનામું પૂછવાના બહાને રસ્તામાં ઊભો રાખ્યો હતો.
યુવક યુવતીએ કરણનાં એક્ટિવાની ચાવી કાઢી લીધી હતી અને તેમણે કરણને કહ્યું હતું કે તારી પાસે જે કાંઈ હોય તે આપી દે નહીં તો તને જાનથી મારી નાખીશું. કરણ આ સમયે ગભરાઈ ગયો હતો. આ બંને કરણનાં ખિસ્સામાં હાથ નાખી તપાસ કરતાં હતાં ત્યારે કરણે પ્રતિકાર કરતાં યુવક યુવતીએ તેને મૂઢ માર માર્યો હતો. યુવક યુવતીએ કરણ પાસેથી આઈફોન ૧૧, રેડમી નોટ ૭ તેમજ ચાર્જર મળી કુલ ૨૭ હજારની લૂંટ કરી હતી ત્યાર બાદ બંને એક્ટિવાની ચાવી ફેંકીને ત્યાંથી જતાં રહ્યાં હતાં. આ બંને એક્ટિવાચાલક યુવક યુવતી દૂર ઊભેલાં નાનાં છોકરાંને લઇ જગતપુર બાજુ નાસી ગયાં હતાં. કરણે યુવક યુવતી વિરુદ્ધ ફરિયાદ નોંધાવી હતી. પોલીસે ફરિયાદના આધારે તપાસ શરૂ કરી છે.
અમદાવાદમાં ચોરી અને લૂંટની ઘટનામાં દિન પ્રતિદિન વધારો
ઉલ્લેખનીય છે કે, આ સિવાય પણ અગાઉ શહેરમાં એકલ દોકલ વ્યક્તિઓને રસ્તામાં રોકી કિંમતી વસ્તુઓ કે રૂપિયાની લૂંટ થઇ   હોય તેવા અનેક બનાવો સામે આવ્યા છે.  આ મામલે પોલીસ કાર્યવાહી કરી રહી છે. અમદાવાદમાં લૂંટની ઘટનાઓના કાબૂમાં લેવા માટે પોલીસ તંત્ર અત્યારે કાર્યવાહી હાથ ધરી રહ્યું છે. પરંતુ નવાઈની વાત એ છે કે, હવે યુવતીઓ પણ લૂંટની ઘટનાઓમાં સામેલ થઈ રહી છે.