મંજૂરી / સુરતની દુષ્કર્મ પીડિતાને સેશન્સ કોર્ટેની ગર્ભપાત માટે મંજૂરી, લગ્નના બહાને યુવકે આચર્યું દુષ્કૃત્ય, બાદમાં મેડિકલ ચેકઅપ કરાવતા ઘટસ્ફોટ

• યુવતીને ગર્ભપાતની કોર્ટની મંજૂરી 
• લગ્નની લાલચ આપી યુવકે આચર્યું દુષ્કર્મ 
• ગર્ભ રહી જતા લગ્નની પાડી ના

Surat News: સુરતમાં દુષ્કર્મનો ભોગ બનેલી યુવતીને ગર્ભપાતની કોર્ટે મંજૂરી આપી છે. કોર્ટે યુવતીની અરજી મંજૂર કરી નોંધ્યું હતું કે ગર્ભપાત સંબંધોની કાર્યવાહીમાં DNA ટેસ્ટ માટે જરૂરી સેમ્પલ નિયમોનુસાર લેવાના રહેશે. મહત્વનું છે કે, સુરતમાં થોડા મહિના અગાઉ યુવકે લગ્નની લાલચ આપી દુષ્કર્મ આચરી યુવતીને ગર્ભવતી બનાવી હતી.

યુવકે યુવતીને લગ્નની આપી હતી લાલચ
સમગ્ર મામલે વિગતવાર વાત કરીએ તો મૂળ ડાંગ જિલ્લાની અને હાલ સુરતના કાપોદ્રા ખાતે રહેતી 21 વર્ષીય યુવતી ત્રણ માસ અગાઉ એક યુવકના સંપર્કમાં આવી હતી. જે બાદ બંને વચ્ચે ફોન પર વાતચીત થતી હતી. આ દરમિયાન યુવકે યુવતીને લગ્ન કરવાની લાલચ આપી હતી. યુવકે યુવતીને વિશ્વાસમાં લઈને તેની સાથે શારીરિક સંબંધ બાંધ્યો હતો. 

હોસ્પિટલમાં રિપોર્ટ કરાવતા ગર્ભ હોવાનું આવ્યું સામે
થોડા દિવસ બાદ યુવતીની તબિયત બગડતા તે હોસ્પિટલ ખાતે પહોંચી હતી, હોસ્પિટલમાં શારીરિક પરીક્ષણ કરાવતા ગર્ભ હોવાનું બહાર આવ્યું હતું. યુવતીને ગર્ભવતી બનાવ્યા બાદ યુવકે લગ્ન કરવાનો ઈનકાર કર્યો હતો અને મોબાઈલ ફોન પણ બંધ કરી દીધો હતો.

યુવતીએ કોર્ટમાં કરી હતી અરજી
જે બાદ યુવતીએ અરજી કરીને સેશન્સ કોર્ટ પાસે ગર્ભપાતની મંજૂરી માંગી હતી. યુવતીના વકીલ તરફથી કોર્ટમાં દલીલ કરવામાં આવી હતી કે જો ગર્ભપાતની મંજૂરી આપવામાં નહીં આવે તો આવનારા બાળક પર, અરજદાર પર તેમજ સમાજ પર ઊંઘી અસર પડશે અને તેમનું અપમાન થશે. જેથી ગર્ભને નિકાલ કરવો જરૂરી હોઇ મંજૂરી આપવી. જે બાદ કોર્ટે આ મામલાને ગંભીરતાથી લઈ 14 અઠવાડિયાના ગર્ભને ટર્મિનેટ કરવાની મંજૂરી આપી હતી.