વિવાદિત ટિપ્પણી / વિદેશમાં PM મોદીનું સન્માન જોઈ ઉશ્કેરાયા સંજય રાઉત, કહ્યું 'તેમને લાગ્યું કે કોઈ જાદૂગર આવ્યો છે..'

• પાપુઆ ન્યૂ ગિનીનાં PMએ પ્રધાનમંત્રી મોદીનાં ચરણ સ્પર્શ્યાં
• આ જોઈ શિવસેના UBTનાં નેતા સંજય રાઉતે કરી ટિપ્પણી
• કહ્યું 'ત્યાં બ્લેક મેજિકમાં માને છે, તેમને લાગ્યું હશે કે જાદૂગર આવ્યો'

પ્રધાનમંત્રી નરેન્દ્ર મોદી આજે પાપુઆ ન્યૂ ગિનીનાં પ્રવાસે છે ત્યારે ત્યાંનાં PM  જેમ્સ મારપેએ PM મોદીનું એરપોર્ટ પર સ્વાગત કર્યું હતું. આ સમયે તેમણે PM મોદીનાં ચરણ સ્પર્શ કર્યાં હતાં. આ ઘટના બાદ શિવસેના (UBT)નાં નેતા સંજય રાઉતે ટિપ્પણી કરી છે જેના કારણે મામલો ગરમાયો છે. રાઉતે કહ્યું કે તેમને( જેમ્સ મોરપેને) લાગ્યું હશે કે ભારતથી કોઈ જાદૂગર આવ્યો છે.

'પાપુઆ ન્યૂ ગિની દેશ બ્લેક મેજીકમાં વિશ્વાસ રાખે છે '
સંજય રાઉતે કહ્યું કે' પાપુઆ ન્યૂ ગિની દેશ બ્લેક મેજીકમાં વિશ્વાસ રાખે છે અને ત્યાં ઘણો ચાલે પણ છે. તેમને ( PM જેમ્સ મોરપેને) લાગ્યું હશે કે કોઈ ઘણો મોટો જાદૂગર આવ્યો છે જે તેમને જાદૂ શીખવાડશે. તેમણે આગળ જણાવ્યું કે આ સારી વાત છે. તેમણે PM નરેન્દ્ર મોદીનાં ચરણો સ્પર્શ્યાં. તે વડીલ છે. અમે પણ જ્યારે PM  મોદીને મળીએ છીએ તો તેમને નમીને પ્રણામ કરીએ છીએ. પરંતુ આજની બાબતનું BJP જે રીતે પ્રચાર કરી રહી છે તે યોગ્ય નથી.'

'BJPએ પાપુઆ ન્યૂ ગિનીનો ઈતિહાસ જાણવો જોઈએ'
સંજય રાઉતે તીખા પ્રહારો કરતાં કહ્યું કે આ પહેલાં જવાહરલાલ નહેરુ, લાલ બહાદુર શાસ્ત્રી અને ઈન્દિરા ગાંધી વિદેશોમાં ગયાં છે તો તેમનાં પણ ચરણ સ્પર્શવામાં આવ્યાં છે. BJPએ પાપુઆ ન્યૂ ગિનીનો ઈતિહાસ જાણવો જોઈએ. એ દેશની આબાદી 80 લાખ છે અને ત્યાં 850 ભાષાઓ બોલવામાં આવે છે. અનેક દ્વીપ છે જે એકબીજા સાથે સંકળાયેલા નથી. એ દેશનાં લોકો બ્લેક મેજિકમાં વિશ્વાસ ધરાવે છે તેથી તેમને લાગ્યું હશે તે મોદીજીનું સમ્માન થવું જોઈએ.