એક્શન / અમદાવાદની નુતન નાગરિક સહકારી બેંક પર RBIએ ફટકાર્યો રૂ.26 લાખનો દંડ, જાણો શું છે મામલો

• નૂતન નાગરિક સહકારી બેંકને 26 લાખનો દંડ
• કેન્દ્રીય બેંકના નિર્દેશોનું પાલન ન કરવા બદલ કાર્યવાહી
• અગાઉ આપવામાં આવી હતી નોટિસ

ભારતીય રિઝર્વ બેંક (RBI)એ કેન્દ્રીય બેંકના નિર્દેશોનું પાલન ન કરવા બદલ નૂતન નાગરિક સહકારી બેંક, અમદાવાદ પર રૂ. 26 લાખનો નાણાકીય દંડ ફટકાર્યો છે. આ દંડ બેંકિંગ રેગ્યુલેશન એક્ટ, 1949 હેઠળ આરબીઆઈને આપવામાં આવેલી સત્તાનો ઉપયોગ કરીને લાદવામાં આવ્યો છે.

આ કારણે ફટકારાયો દંડ
RBIએ 'કોઓપરેટિવ બેંક- ડિપોઝિટ પર વ્યાજ દર' અને 'UCBs દ્વારા ATM-કમ-ડેબિટ કાર્ડ ઇશ્યૂ કરવા માટેની માર્ગદર્શિકા' પર આરબીઆઈના નિર્દેશોનું પાલન ન કરવા બદલ દંડ લાદવામાં આવ્યો છે. આ દંડ બેંકિંગ રેગ્યુલેશન એક્ટ, 1949ની કલમ 46 (4) (i) અને કલમ 56 સાથે વાંચવામાં આવેલી કલમ 47 A (1) (c) હેઠળ ભારતીય રિઝર્વ બેંકને આપવામાં આવેલી સત્તાના ઉપયોગથી લાદવામાં આવ્યો છે.

અગાઉ બેંકને આપવામાં આવી હતી એક નોટિસ 
31 માર્ચ, 2020ના રોજ બેંકની નાણાકીય સ્થિતિના સંદર્ભમાં ભારતીય રિઝર્વ બેંક દ્વારા કરવામાં આવેલ વૈધાનિક નિરીક્ષણ (statutory inspection) અને જોખમ મૂલ્યાંકન રિપોર્ટ અને તેને લગતા તમામ પત્રવ્યવહારની તપાસથી અન્ય વાતોની સાથે-સાથે તે પણ જાણવા મળ્યું કે બેંક (1) ફિક્સ્ડ ડિપોઝિટ ખાતાઓની બચત જમા રકમ પર તેમની ચૂકવણીના સમયે લાગુ પડતા દરે વ્યાજ ચૂકવવામાં નિષ્ફળ રહી અને (2) ચોક્કસ એકાઉન્ટ ધારકોને એટીએમ-કમ-ડેબિટ કાર્ડ આપવામાં આવ્યા હતા. ઉપરોક્ત આધારે બેંકને એક નોટિસ આપવામાં આવી હતી. જેમાં તેને દંડ શા માટે ફટકારવવામાં ન આવે તે અંગે કારણ દર્શાવવા કહેવામાં આવ્યું હતું.

નિર્દેશોનું પાલન ન કરવા બદલ દંડ 
નોટિસ પર બેંકનો જવાબ, તેના દ્વારા કરવામાં આવેલી વધારાની રજૂઆતો અને વ્યક્તિગત સુનાવણી દરમિયાન કરવામાં આવેલી મૌખિક રજૂઆતોને ધ્યાનમાં લીધા પછી ભારતીય રિઝર્વ બેંક એવા નિષ્કર્ષ પર આવે છે કે ભારતીય રિઝર્વ બેંક દ્વારા જારી કરાયેલ ઉપરોક્ત નિર્દેશોનું પાલન ન કરવાનો આરોપ પ્રમાણિત થયો છે અને આવા નિર્દેશોનું પાલન ન કરવા બદલ દંડ લાદવો જરૂરી છે.