લોકસભા ચૂંટણી 2024 / કોંગ્રેસના સમર્થનમાં ખુલ્લેઆમ મેદાને ઉતર્યા પાટીદારો, કહ્યું 'લોકસભામાં અમે ચંદનજીને મોકલી...', જુઓ Viral Video

પાટણમાં કોંગ્રેસના ઉમેદવાર ચંદનજી ઠાકોરના ઘરે યોજાયેલી સભામાં ચૂંટણીપંચની ગાઈડલાઈનની ઐસીતૈસી થઈ હતી. ધર્મ અને આસ્થાના નામે મત માગી શકાતા નથી પરંતુ ચંદનજીના ઘરે યોજાયેલી એક સભામાં પાટીદારોને માં-ઊમા ખોડલના સોગંદ લેવડાવીને ભાજપને મત નહી આપવા હાકલ થઈ. ચંદનજીના ઘરે થયેલી સભાનો એક વીડિયો આવ્યો છે જેમાં પાટીદારોને ચંદનજીના પક્ષે મત કરવા માટે હાકલ કરવામાં આવી રહી છે. મિટિંગ ચંદનજીના ઘરે જ થઈ હતી પરંતુ વીડિયોમાં ચંદનજી દેખાતા નથી. મોટેભાગે કોંગ્રેસમાં રહેલા અને કોંગ્રેસ સમર્થક  પાટીદારોની મિટિંગ હોવાનું ચર્ચાઈ રહ્યું છે. ચંદનજી પોતે એક વેપારી છે અને એમને તમામ વર્ગો સાથે અંગત સંબંધો હોવાનો પણ પોતે દાવો કરી રહ્યાં છે. આ મિટિંગનો હેતુ ચંદનજીની તરફેણ સિવાય શું હતો તે મહત્વનું છે. મિટિંગમાં વર્તમાન સાંસદ ભરતસિંહ ડાભી પાંચ વર્ષ દરમિયાન દેખાયા ન હોવાનો વીડિયો વાયરલ થયો હતો.