અકસ્માત / અમદાવાદમાં AMTSની અડફેટે વૃદ્ધનું ઘટનાસ્થળે જ કમકમાટીભર્યું મોત, બસચાલક ફરાર

 

• અમદાવાદમાં AMTS બસની અડફેટે વૃદ્ધનું મોત
• શાહપુર ચાર રસ્તા પાસે સર્જાયો અકસ્માત 
• અકસ્માત બાદ બસનો ડ્રાઈવર બસ મૂકીને ફરાર થઈ ગયો 

અમદાવાદમાં દૂતની જેમ ચાલતી અને અમદાવાદીઓની જીવાદોરી સમાન AMTS બસની અડફેટે વધુ એક વ્યક્તિનું મોત નીપજ્યું છે. શહેરના શાહપુર વિસ્તારમાં AMTS બસના ચાલકે વૃદ્ધને અડફેટે લેતાં વૃદ્ધનું ઘટનાસ્થળે જ મોત નીપજ્યું છે. હાલ સમગ્ર મામલે પોલીસે તપાસ હાથ ધરી છે.

AMTS બસે વૃદ્ધને અડફેટે લીધા
મળતી માહિતી અનુસાર,  અમદાવાદ શહેરના શાહપુર ચાર રસ્તા પાસે ફૂલ સ્પીડમાં આવી રહેલી AMTS બસે રાહદારી વૃદ્ધને અડફેટે લીધા હતા. જે બાદ વૃદ્ધનું ઘટના સ્થળે જ મૃત્યુ નીપજ્યું હતું. આ બનાવને પગલે સ્થાનિકોના ટોળેટોળા અકસ્માત સ્થળે એકઠા થઈ ગયા હતા. જોકે, AMTS બસનો ચાલક અકસ્માત સર્જીને બસ મુકીને ફરાર થઈ ગયો હતો. 

સ્થાનિકોમાં રોષ 
આ અંગેની જાણ પોલીસને કરવામાં આવતા પોલીસની ટીમ તાત્કાલિક શાહપુર ચાર રસ્તા પાસે દોડી આવી હતી. જે બાદ પોલીસ દ્વારા વૃદ્ધના મૃતદેહને પોસ્ટ મોર્ટમ અર્થે ખસેડવાની તજવીજ હાથ ધરવામાં આવી હતી. હાલ પોલીસ દ્વારા બસ ચાલક સામે ગુનો નોંધી આગળની કાર્યવાહી હાથ ધરવામાં આવી છે. તો વૃદ્ધના મૃત્યુ બાદ સ્થાનિકોમાં રોષ જોવા મળી રહ્યો છે. 

વિશાલા સર્કલ પાસે સર્જાયો હતો અકસ્માત
આપને જણાવી દઈએ કે અમદાવાદમાં માતેલા સાંઢની માફક દોડતી AMTS બસે કોઈનો જીવ લીધો હોય તેવી આ પહેલી ઘટના નથી, અગાઉ પણ આવા ઘણા બનાવો સામે આવી ચૂક્યા છે. ગત માર્ચ મહિનામાં વિશાલા સર્કલ પાસે  AMTS બસે અકસ્માત સર્જો હતો. જુહાપુરાથી વાસણા જતા રસ્તા પર વિશાલા સર્કલ પાસે લાલ સિગ્નલ લાગતા વાહનો થંભી ગયા હતા. વાહનો જ્યારે સિગ્લનને કારણે થોભ્યા હતા ત્યારે AMTS બસ ફૂલ સ્પીડ હોવાથી તેમાં બ્રેક લાગી ન હતી. AMTS બસે રિક્ષા અને બે કારને અડફેટે લેતા એક બાળકી અને મહિલાને ઈજા પહોંચી હતી.

સળગતા સવાલ

• AMTS બસના અકસ્માતો પર ક્યારે લાગશે બ્રેક?
• શું AMTS ડ્રાઈવર ઉંઘમાં બસ ચલાવી રહ્યો હતો?
• બેદરકાર ડ્રાઈવર વિરુદ્ધ કાર્યવાહી થશે?
• AMTSની બસો મોત બનીને ક્યાં સુધી રોડ પર દોડતી રહેશે?
• યમરાજ બનીને ફરતા AMTSના લાલ ડબ્બાના ચાલકો ક્યારે દંડાશે?
• ડ્રાઈવરો માટે કોઈ સ્પીડ લિમીટ રાખવામાં આવી છે કે કેમ?
• બેદરકારીપૂર્ણ ડ્રાઈવિંગ કરનાર ડ્રાઈવરને સસ્પેન્ડ કરશો?